.JPG)
फाइल तस्बिर
काठमाडौं- नेपाली कांग्रेसका महामन्त्री गगन थापाले स्थानीय निर्वाचनका बारेमा कानुन संशोधन गरेर निर्णय गर्छौं भनेर बाहिर आइरहेको कुरा संविधानसम्मत नहुने बताएका छन्। शुक्रबार केन्द्रीय समितिको बैठकपछि सञ्चारकर्मीहरुसँगको कुराकानीमा उनले यस्तो धारणा राखेका हुन्।
‘संविधानसम्मत नहुने कुरालाई नेपाली कांग्रेसले बोक्नुपर्ने कुनै कारण छैन। बोक्नु हुँदैन भनेर हामीले सभापतिलाई भनिसकेका छौं,’ महामन्त्री थापाले भने, ‘गठबन्धनका नेताहरुले पनि यो कुरा बुझ्नुहुन्छ र संविधानसँग बाझिने गरेर गठबन्धनले निर्णय गर्दैन भन्ने विश्वास छ।’
उनले पार्टी सभापतिले आफूले यस विषयमा गठबन्धनको बैठकमा कुरा गर्ने बताएको जानकारी दिए। ‘सभापतिले पार्टीभित्र यस्तो कुरा आइरहेको छ भनेर गठबन्धनमा राख्छु भन्नुभएको छ। हामीले संविधान लेख्दा र कानुन बनाउँदा संविधानलाई व्याख्या गरेर नै बनाएको हो,’ उनले भने, ‘अहिले बाझियो भन्नु भनेको आफ्नो क्षमतामा नै अविश्वास गर्नु हो। अहिले कानुन र संविधान मिलेन भनेर भन्यौ भने सही नियतका साथ होइन। यो बाटोतर्फ जानु नै हुँदैन। भनेका छौं।’
उनले यस बारेमा पार्टीको कार्यसम्पादन समितिको बैठकमा पनि छलफल हुने बताए। महामन्त्री थापाले स्थानीय निर्वाचनको सम्बन्धमा नेपाली कांग्रेसको धारणा प्रस्ट रहेको भन्दै गठबन्धनका दलहरु पनि प्रस्ट भइसकेपछि सरकारले निर्वाचनको मिति घोषणा गर्ने बताए।
‘भोलि बस्ने गठबन्धनको बैठकबाट यसको छिनोफानो भइसकेपछि सरकार निर्वाचनको मिति घोषणा गर्ने बाटोमा जान्छ भन्ने विश्वास छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775464606-1775465458.jpg)
-1764146706.png)
