काठमाडौं– नेपालमा बसेर युरोप–अमेरिकामा अनलाइन जुवा खेलाउने गरेको आरोपमा १२ जना पक्राउ परेका छन्। महानगरीय प्रहरी अपराध महाशाखाको टोलीले कीर्तिपुरबाट उनीहरुलाई बुधबार पक्राउ गरी सार्वजनिक गरेको छ।
पक्राउ पर्नेहरुमा कीर्तिपुर नगरपालिका–६ चोभारका ३३ वर्षीय सुजेन्द्र थापा, सोही ठाउँका १७ वर्षीय मनिष थापा, १७ वर्षकै समिर थापा, २७ वर्षीया कविता थापा, ३० वर्षीय रविन खड्का, कीर्तिपुर–१० का ४५ वर्षीय बुद्ध महर्जन र कीर्तिपुर–८ पाँगा का २० वर्षकी रोजा महर्जन छिन्।
यस्तै, १९ वर्षीय साहिल महर्जन, कीर्तिपुर–१० का १९ वर्षीया हनिशा महर्जन, कीर्तिपुर–९ नगाँउ बस्ने ३५ वर्षीय प्रदिपमान सिंह बस्नेत, बझाङ केदारसिउ गाउँपालिका–५ घर भइ कीर्तिपुर बस्ने १९ वर्षीय बिनोद ठगुन्ना र सिन्धुपाल्चोक मेलम्ची नगरपालिका–१३ घर भइ कीर्तिपुर बस्ने १७ वर्षीया रमादेवी श्रेष्ठ छन्।
जुवा खेलाउने गरेको भन्ने सूचनाका आधारमा खटिएको प्रहरी टोलीले कीर्तिपुर नगाउँ बाघभैरवस्थित विभिन्न घरहरु खानतलासी गर्दा अनलाइन जुवा खेलाउने गरेको प्रमाणसहित उनीहरुलाई पक्राउ गरेको हो।
अनलाइन जुवा खेलाउन प्रयोग भएको १७ थान मोबाइल, १४ थान ल्यापटप, २ थान सिपियु, २ थान कम्पुटर, गेमिङ विवरण लेखिएका रजिष्टरहरु, र ह्वाइट बोर्ड प्रहरीले बरामद गरेको छ।
पक्राउ परेका मध्ये सुजेन्द्र थापा, प्रदिपमान सिंह बस्नेत र बुद्द महर्जनले अनलाइन जुवा खेलाउन सम्पूर्ण व्यवस्था मिलाएर ३ वटा घरमा २४ सै घण्टा सिफ्टवाइजरुपमा जुवा खेलाउन कर्मचारीहरुसमेत राखेको महाशाखाका एसएसपी बसन्त कुँवरले बताए।
त्यसरी खटिएका कर्मचारीले फेसबुक आइडीमार्फत् युरोप-अमेरिकाका नागरिकलाई साथी बनाएर जुवा, फायर किरिङ, रिभर स्वीप्स, रिभर मोन्सटर, भेगास–एक्स लगायतका अनलाइन जुवा खेल्न लिंकहरु शेयर गर्ने गरेका थिए।
उक्त गेममा अमेरिकन डलर लोड गर्न लगाई खेलाउन तथा जित्ने पक्षलाई पुरस्कार दिने गरेका थिए। उनीहरुले १० महिना अघिदेखि यसरी जुवा खेलाउँदै आएको महाशाखाले जनाएको छ। यस अवधीमा १ लाख अमेरिक डलरभन्दा बढी रकम जुवा खेलाइसकेको खुलेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
