काठमाडौं- भारत प्रशासित कश्मीरमा आपराधिक षड्यन्त्र रचेको आरोपमा एक पत्रकारलाई पक्राउ गरिएको छ। भिडियो पोस्ट गरेको आरोपमा मुद्दा दर्ता भएसँगै पत्रकार सज्जाद गुल पक्राउ परेका हुन्। सज्जादले केही दिनअघि एउटा भिडियो पोस्ट गरेका थिए।
भिडियोमा श्रीनगरमा प्रहरी मुठभेडमा मारिएका लश्कर–ए–तैयबा चरमपन्थी सलेम परेको मृत्यु भएपछि उनका आफन्तहरु बन्दीपोराको हाजिन क्षेत्रमा विरोध प्रदर्शन र नाराबाजी गरिरहेका देखिन्छन्।
सज्जाद कश्मीरको केन्द्रीय विश्वविद्यालयबाट पत्रकारिता अध्ययन गर्दैछन् र ‘द कश्मीरवाला’ मिडिया हाउसमा ट्रेनी रिपोर्टरको रूपमा पनि काम गरिरहेका छन्।
‘द कश्मीर वाला’का सम्पादक फहद शाहका अनुसार सज्जादले यस विषयमा पहिले नै स्टोरी गरिरहेका थिए र त्यही क्रममा उनले सो भिडियो सामाजिक सञ्जालमा पोस्ट गरेका थिए।
शाहले सज्जादविरुद्ध प्रहरी कारबाही पहिलो पटक नभएको र उनको रिपोर्टिङविरुद्ध मुद्दा दर्ता भएको बताए। ‘रिपोर्टिङ गर्नु अपराध होइन, तर यहाँ उल्टो भइरहेको छ,’ उनले भने।
प्रहरीले सज्जादविरुद्ध आईपीसीको धारा १२० बी (आपराधिक षड्यन्त्र),१५३ बी (राष्ट्रिय एकताको लागि प्रतिकूल अवस्था सिर्जना गरेको) र ५०५ (सार्वजनिक असावधानी) अन्तर्गत मुद्दा दर्ता गरेको छ।
बान्दीपोराका एसपी मोहम्मद जैदले सज्जादले महिलाहरूलाई विरोध गर्न उक्साएको र पछि त्यही विरोधको क्लिप अपलोड गरेर भाइरल बनाएको आरोप लगाए।
‘सज्जद गुलविरुद्ध झुटा समाचार लेखेको भन्दै पहिले पनि मुद्दा दर्ता भएको थियो र अहिले पनि यस्तै झुट्टा कुरा सामाजिक सञ्चालमा फैलाइरहेका छन्,’ उनले भने।
तर, सज्जादका भाइ जावेद अहमदले प्रहरीले लगाएको आरोपलाई अस्वीकार गरेका छन्। उनले आफ्ना दाइले कसैलाई विरोध गर्न नउक्साएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
