दमौली- तनहुँ जिल्लामा ११ हजारभन्दा बढी नयाँ मतदाता थपिएका छन्। जिल्ला निर्वाचन कार्यालय तनहुँले दुई चरणमा स्थानीय तहमा सञ्चालन गरेको अभियानअन्तर्गत ११ हजार ६२० नयाँ मतदाता थपिएका हुन्।
कार्यालयले नौ वटै स्थानीय तहबाट गत मंसिर १७ देखि पुस ९ गतेसम्म मतदाता नामावली अभियान सञ्चालन गरेको थियो। त्यसबाहेक जिल्ला निर्वाचन कार्यालय र जिल्ला प्रशासन कार्यालयबाट पनि मतदाता नामावली संकलन भइरहेको छ।
पहिलो चरणमा भीमाद नगरपालिका, घिरिङ गाउँपालिका, म्याग्दे गाउँपालिका, बन्दिपुर गाउँपालिका र देवघाट गाउँपालिका तथा दोस्रो चरणमा शुक्लागण्डकी नगरपालिका, ऋषिङ गाउँपालिका, आँबुखैरेनी गाउँपालिका र भानु नगरपालिकामा मतदाता नामावली संकलन गरिएको छ।
निर्वाचन कार्यालयका प्रमुख हरिप्रसाद ढकालले भानु नगरपालिकाबाट सबैभन्दा बढी मतदाता थपिएको जानकारी दिए। उनका अनुसार भानु नगरपालिकाबाट दुई हजार २६५, शुक्लागण्डकी नगरपालिकाबाट एक हजार ५३०, भीमाद नगरपालिकाबाट एक हजार १७, आँबुखैरेनी गाउँपालिकाबाट एक हजार तीन, बन्दिपुर गाउँपालिकाबाट ९२५, देवघाट गाउँपालिकाबाट ७१२, घिरिङ गाउँपालिकाबाट ७२९, म्याग्दे गाउँपालिकाबाट ५३५, ऋषिङ गाउँपालिकाबाट ८६८ मतदाता थपिएका छन्। थपिएकामध्ये महिलाको सङ्ख्या बढी रहेको छ।
यसैगरी जिल्ला निर्वाचन कार्यालयबाट ९५५ र जिल्ला प्रशासन कार्यालयबाट एक हजार ८१ मतदाता थपिएका छन्। यसैगरी बाहिरी जिल्लाका ६५ जनाले पनि जिल्ला प्रशासन कार्यालयबाट नामावली दर्ता गराएका छन्। 'दर्ता भएका विवरण रुजु गर्ने काम भइरहेको छ, नाम दोहोरिएको भए हट्छ,' प्रमुख ढकालले भने, 'परिचयपत्र हराएकाले पनि पुनःनाम दर्ता गराएको हुनसक्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
