काठमाडौं- बालबालिकाका लागि काम गर्ने अन्तर्राष्ट्रिय परोपकारी संस्था ‘सेभ द चिल्ड्रेन’ले म्यानमारका सेनाले ३५ जनाभन्दा बढी सर्वसाधारणको हत्या गरेको आरोप लगाएको छ।
बेलायतको राजधानी लन्डन मुख्यालय रहेको सेभ द चिल्ड्रेनले म्यानमारको काया राज्यमा शुक्रबार घटेको यस घटनामा कम्तीमा ३८ जनाको ज्यान गएको दाबी गरेको छ। तीमध्ये अधिकांशको शव फेला परेको छ।
सेभ द चिल्ड्रेनले आफ्नो विज्ञप्तिमा काया प्रदेशमा सेनाले गाडीबाट निकालेर मानिसको शव जलाएको र पक्राउ गरी हत्या गरेको जनाएको छ। मृत्यु हुनेमा बालबालिका र महिला पनि रहेको दाबी गरिएको छ ।
यस्तै, सेभ द चिल्ड्रेनले म्यानमारमा आफ्ना दुई कर्मचारी विगत दुई दिनदेखि बेपत्ता भएको बताएको छ। विज्ञप्तिमा भनिएको छ, ‘बेपत्ता भएका उनका दुवै कर्मचारी संस्थाको मानवीय काम सकेर बिदा काटेर घरतर्फ जाँदै थिए।’
दुवै जना सेनाको कारवाहीमा पक्राउ परेको र त्यसयता बेपत्ता रहेको सेभ द चिल्ड्रेनले जनाएको छ। सेभ द चिल्ड्रेनले आफ्नो निजी गाडीमा आक्रमण गरी आगजनी गरेको दाबीसमेत गरेको छ ।
सेभ द चिल्ड्रेनले सर्वसाधारण निर्दोष जनता र आफ्ना कर्मचारीमाथि हुने हिंसाका घटनाबाट स्तब्ध भएको बताएको छ। तर, म्यानमारको सेनाले मारिने सबै अतिवादी भएको दाबी गरेको छ। सेनाले यस क्षेत्रमा धेरै सशस्त्र लडाकुहरूलाई मारेको बताएको छ।
यो वर्षको फेब्रुअरीमा सेनाले निर्वाचित नेतृ आङ सान सुकीलाई हिरासतमा लिएर सैन्य ‘कू’ गरेको थियो। त्यसयता म्यानमारभर सर्वसाधारणको विरोध प्रदर्शन भइरहेको छ । सेनाले यी प्रदर्शनहरूलाई दबाउन अत्याधिक बल प्रयोग गरेको थियो। त्यसयता सेनामाथि कैयौं मानिसको हत्या गरेको आरोप लागेको छ ।
सोही महिनामा सुकीलाई चार वर्षको जेल सजाय सुनाइएको थियो। पछि यसलाई दुई वर्षमा घटाइयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
