बिहीबार पर्सामा आयोजित कार्यक्रममा एमाले अध्यक्ष केपी शर्मा ओली।
काठमाडौं- चितवन महाधिवेशनबाट निर्वाचित नेकपा एमालेको केन्द्रीय कमिटीको दोस्रो बैठकले गरेको निर्णय थियो- 'पुस मसान्तसम्म सबै तहका पार्टी कमिटीहरूले आ–आफ्नो कार्यक्षेत्र भित्रको पार्टी प्रवेश सम्भावनाको आकलन गर्ने, प्रवेश गर्ने सम्भावित व्यक्तिहरूको सूची तयार गर्ने र प्रवेशको तयारीका लागि निश्चित व्यक्तिलाई जिम्मेवारी प्रदान गर्ने।'
एमालेले गरेको यो निर्णयअनुसार माघ र फागुन महिनामा विशेष कार्यक्रम आयोजना गरी पार्टी प्रवेश अभियान सञ्चालन हुने थियो। तर, एमाले अध्यक्ष ओली यति हतारोमा देखिए कि कार्ययोजना भन्दा चाँडै नै यो निर्णय कार्यान्वयनमा सक्रिय बनेका छन्।
दुई दिनअघि कपिलवस्तुको बहादुरगञ्जमा 'ठूलै पार्टी प्रवेश कार्यक्रम' गरेर जनता समाजवादी पार्टी (जसपा)का केन्द्रीय सदस्य मंगलप्रसाद गुप्तालाई एमालेमा भित्र्याएका ओलीले बिहीबार पर्साको जगरनाथ पुगेर गाउँपालिका अध्यक्षसहित माओवादी केन्द्रका नेता-कार्यकर्तालाई पार्टी प्रवेश गराए।
आयोग र ओलीको मिल्दो लय
माओवादी केन्द्रबाट एमाले प्रवेश गरेका जगरनाथ गाउँपालिकाका अध्यक्ष जालिम मियाँलगायतलाई स्वागत गर्ने कार्यक्रममा ओलीले निर्वाचन सकेसम्म चाँडो हुनुपर्ने बताए। तत्कालीन नेकपामा संकट सिर्जना भएपछि गत पुस ५ मा प्रतिनिधि सभा विघटन गरेर निर्वाचन मिति तोकेका ओलीले बिहीबार पर्साको कार्यक्रममा भने, 'वर्तमान सरकार जनताले बनाएको पनि होइन। जनताका लागि पनि होइन। त्यसैले सकेसम्म चाँडो निर्वाचनमा जानुपर्छ।'
सरकारले चाँडै चुनावको मिति तय गर्ने एमालेको आकलन छ। स्थानीय तहको अवधि सकिनै लागेका बेला तीन तह (स्थानीय तह, प्रदेश र संघीय संसद) कै निर्वाचन एकैपल्ट गर्दा आयोगलाई सहज हुने बहस उठ्न थालेका छन्। एमाले अध्यक्ष ओलीले वर्खा लाग्नुअघि नै सरकारले निर्वाचन गराउन सक्ने सम्भावना देखेर चुनावकेन्द्रित गतिविधिलाई तीव्रता दिइरहेको देखिन्छ।
ओलीकै पालामा निर्वाचन आयोगको प्रमुख आयुक्त नियुक्त भएका दिनेशकुमार थपलियाले वैशाखभित्र स्थानीय तहको निर्वाचन सम्पन्न गराउने तयारी आयोगले गरिरहेको अभिव्यक्ति दिइरहेका छन्।
गत शुक्रबार संखुवासभाको खाँदबारीमा आयोजित कार्यक्रममा उनले स्थानीय तहको निर्वाचन वैशाखभित्र सम्पन्न गराउन आयोगले तयारी थालिसकेको बताएका थिए। बुधबार पनि उनले २० वैशाखभित्र स्थानीय तहको निर्वाचन एकै चरणमा गर्नेगरी आयोगले तयारी गरिरहेको बताए।
देशका सबै स्थानीय तहमा एकैसाथ निर्वाचन गर्नेगरी तयारी थालिएको उनको भनाइ छ। ‘केही दिन भित्रमा स्थानीय तहको निर्वाचनका लागि सरकारलाई मिति घोषणा गर्नका लागि सिफारिस गर्ने प्रक्रियामा छौं,’ उनले भने, ‘पुस २० गतेसम्म मतदाता नामावलीमा नाम दर्ताका लागि समय तोकिएकाले त्यसलगत्तै मिति घोषणा हुन्छ।’
यतिबेला देशैभर मतदाता नामावलीमा नाम दर्ताको काम चलिरहेको छ। यो प्रक्रिया आयोगले थप गरेर पुस २० गतेसम्म पुर्याएको छ। आयोगले सरकारलाई एकै चरणमा निर्वाचन गर्नुपर्ने आफ्नो धारणासहित सिफारिस गर्ने तयारी गरेको छ। यसअघि आयोगका पदाधिकारीहरुले प्रधानमन्त्रीसँग गरेको छलफलमा पनि एकै चरणमा निर्वाचन गर्नुपर्ने सुझाव दिइएको थियो।
यसरी हेर्दा ओली र आयोगको लय मिल्न थालेको देखिएको छ। सकेसम्म तीन तहकै निर्वाचन एकैपल्ट वैशाखमा, नभए स्थानीय तहका लागि भए पनि बलियो तयारी जरुरी रहेको ओलीको बुझाइ छ। पाँच दलीय गठबन्धनको सरकार भएकाले निर्वाचनसम्म पुग्दा आउने चुनौतीको आकलन समेत ओलीले गरेका छन्।
ओलीका भाषण पनि चुनावी
ओली अहिले सहभागी हुने कार्यक्रममा चुनावलक्षित भाषण गरिरहेका छन्। उनले सम्बोधनको अधिकांश समय एमालेको ९ महिने शासनकालमा र आफूले साढे तीन वर्ष सरकार चलाउँदा गरेका कामको फेहरिस्त सुनाउने गरेका छन्।
बिहीबार पर्सामा पनि उनले एमालेको सरकारले ज्येष्ठ नागरिकलाई भत्ता दिन सुरु गरेको बताउँदै आफ्नो पालामा महिनामा चार हजार रुपैयाँ भत्ता पुर्याएको उल्लेख गरे। उनले भने, 'महिनाको सय रुपैयाँबाट सुरु गरेको ज्येष्ठ नागरिक भत्ता दिनको १३३ रुपैयाँ पुर्याइएको छ। ज्येष्ठ नागरिकलाई मात्रै होइन, समाजमा पछि परेका अशक्त, अपांगता भएका, एकल महिलालगायत सामाजिक जीवनका पछाडि परेकाहरुलाई भत्ता दिन सुरु गरेका छौं।'
सुरक्षाकर्मीलाई लक्षित गरेर आफूले २०५१ सालमा गृहमन्त्री हुँदा प्रहरी र सिपाहीलाई श्रेणीविहीनबाट श्रेणीमा रुपान्तरण गरेको ओलीले उल्लेख गरे। सडक बालबालिकाको उद्धार गरेको, सडक निर्माणलगायतका विषय पनि उनले दोहोर्याइरहेका छन्।
ओलीले थपे, 'नेकपा एमालेको सरकार रहेको साढे तीन वर्षमा कति उन्नति प्रगति भए, तपाईंहरुले देख्नुभयो। टोर्नाडोले ८९९ घर भत्किएका थिए। सरकारले केही महिनामै बनायो। २०७२ सालको भूइँचालोले भत्काएका ७ लाख बढी घर निर्माण भए। जनता आवास कार्यक्रम सञ्चालन गरेर घरविहीनलाई घर दिइयो। र, फुस र खरका छानालाई जस्तापाताबाट विस्थापित गरियो।'
केन्द्रमा तराई-मधेश
एमालेको दोस्रो बैठकपछि अध्यक्ष ओली दुई ठूला कार्यक्रममा सहभागी भए। दुवै तराई-मधेशका नेता कार्यकर्तालाई एमालेमा भित्र्याउने लक्ष्यअनुरुप तय भएका कार्यक्रम थिए। कपिलवस्तुको बहादुरगञ्जमा एमालेले 'आगामी उम्मेदवार' पार्टीमा प्रवेश गराएको छ।
२०४८ सालदेखि विभिन्न पार्टीबाट निर्वाचन लडिरहेका तर 'उपविजेता'मै चित्त बुझाइरहेका मंगलप्रसाद गुप्ता आगामी निर्वाचनमा कपिलवस्तु-३ मा एमालेका तर्फबाट उम्मेदवार बन्नेगरी भित्र्याइएका छन्।
यसैगरी, पर्सामा माओवादीबाट गाउँपालिका अध्यक्ष नै जितेका जालिम मियाँलगायतका नेता-कार्यकर्ता एमालेमा प्रवेश गराइएका छन्। एमालेले पछिल्लो समय तराई-मधेशलाई केन्द्रमा राख्न थालेको छ। प्रदेश २ कै रौतहटबाट समेत राजनीति गर्ने माधवकुमार नेपालले एमाले फुटाएर एकीकृत समाजवादी पार्टी गठन गरेपछि ओलीलाई 'प्रेसर' थपिएको छ।
नेपाल पार्टीमै हुँदा पनि प्रदेश २ मा एमाले कमजोर नै रहेको थियो। गएको निर्वाचनमा माओवादी केन्द्रसँग गठबन्धन गरेर देशभर पहिलो पार्टी बन्दा समेत प्रदेश २ मा चौंथोमा चित्त बुझाउनुपरेको थियो। समानुपातिकतर्फ प्रदेश २ मा एमालेले जम्मा १६ दशमलव २५ प्रतिशत मत पाएको थियो। गठबन्धन बनाएर चुनाव लड्दा प्रत्यक्षमा १४ सिट जितेको थियो।
स्थानीय तहको निर्वाचनमा एमालेको उपस्थिति झन् कमजोर देखियो। प्रदेश २ का १३६ स्थानीय तहमा जम्मा १८ वटामा एमालेले जितेको थियो।
नेताहरू पनि जिल्लामा केन्द्रित
एमालेले नेता-कार्यकर्तालाई आफ्नो निर्वाचन क्षेत्र केन्द्रित हुन निर्देशित समेत गरेको छ। धेरै एमाले नेताहरु यतिबेला आ-आफ्नो जिल्लामा पुगेका छन्।
यही सन्दर्भमा जिल्लामा माहोल बनाउनेगरी अधिवेशन तोकिएका छन्। पुस २३ गते जिल्ला र प्रदेश अधिवेशन माघ ८ गते गर्ने तयारी एमालेको छ।
जिल्ला र प्रदेशको नेतृत्व सकेसम्म सहमतिमै टुंग्याउनुपर्ने केन्द्रीय नीति छ। माओवादी केन्द्र छाडेर एमाले रोजेका नेता-कार्यकर्तालाई समेत 'सेटल' गर्नेगरी सहमति जुटाउन भनिएको छ। सहमतिमै नेतृत्व चयन हुँदा आगामी निर्वाचनमा प्रतिस्पर्धा गर्न सहज हुने एमालेको आकलन छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764170040.png)
-1764146706.png)
-1763721444.png)
-1763559424.jpg)
-1764080971.png)
