काठमाडौं- नेकपा एकीकृत समाजवादीका वरिष्ठ नेता झलनाथ खनालले प्रमुख प्रतिपक्षी नेकपा एमालेले संसदमा गरिरहेको अवरोधलाई ‘मूर्खतापूर्ण बल प्रयोग’ को संज्ञा दिएका छन्।
बुधबार संसद बैठकपछि सञ्चारकर्मीहरुलाई प्रतिक्रिया दिँदै नेता खनालले एमालेले संसदलाई बन्धक बनाएर राष्ट्रलाई अराजकतातर्फ लैजान खोजेको आरोप लगाए।
‘यो एउटा अराजकतावादी कुरा हो। जोसँग तर्कहरु सिद्धिन्छन्, शक्ति सिद्धिन्छ। बौद्धिकता सिद्धिन्छ। मर्यादा सिद्धिन्छ। संवैधानिकता सिद्धिन्छ। त्यस्ता मानिसहरु बल प्रयोगमा लाग्छन् । मूर्खतापूर्ण बल प्रयोग,’ नेता खनालले भने, ‘यो मुर्खतापूर्ण बल प्रयोगभन्दा बढ्ता केही पनि होइन।’
उनले संसद जनताको आवाज उठाउने, राष्ट्रका आवाज उठाउने, जनताका विभिन्न समस्याहरु उठाउने थलो भएको बताउँदै यसलाई बन्धक बनाउनु राष्ट्रलाई अराजकतातर्फ लैजाने धुन्धुकारी प्रवृत्ति भएको बताए।
‘संसद राष्ट्रका नीति, कार्यक्रम, बजेट, ऐन, कानूनहरु, संकल्पहरु निर्माण गर्ने थलो हो यो। यो थलोलाई नै बन्द गरेपछि, बन्धक बनाएर राखेपछि राष्ट्र कसरी चल्छ? यो राष्ट्रलाई नै चल्न नदिने, राष्ट्रलाई अराजकताको खाडलतर्फ लाने धुन्धुकारी प्रवृत्ति हो। धुन्धुकारी प्रवृत्तिबाट प्रतिपक्षी पार्टीको नेतृत्व ग्रस्त छ’ नेता खनालले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
