काठमाडौं– प्रदेश २ को नाम र राजधानीको विषयमा प्रदेशसभामा प्रतिनिधित्व गर्ने विभिन्न दलसँग छलफल गर्न लोकतान्त्रिक समाजवादी पार्टी (लोसपा)ले समिति गठन गरेको छ।
प्रदेशको नाम मधेश र राजधानी जनकपुरधाम तोक्न सहमतिका लागि दलसँग छलफल गर्न लोसपाले प्रदेशसभा सदस्य रानी शर्मा तिवारीको संयोजकत्वमा सात सदस्यीय वार्ता समिति गठन गरेको हो। जनता समाजवादी पार्टीले प्रदेशको नाम मधेश र राजधानी जनकपुरधाममा सहमति जुटाउन विभिन्न राजनीतिक दलसँग संवाद थालेकै दिन मंगलबार लोसपाले पनि वार्ता समिति गठन गरेको हो।
लोसपाको वार्ता टोली सदस्यमा प्रदेशसभा सदस्य परमेश्वर साह, जैनुल राइन, अभिराम शर्मा, उपेन्द्र महतो, बाबुलाल साह र प्रह्लाद गिरी रहेका छन्। पार्टीको निर्णयबमोजिम प्रदेशको नाम मधेश र राजधानी जनकपुरधामका लागि प्रदेशसभाभित्र रहेका दलसँग छलफल र सहमतिका लागि वार्ता टोली गठन गरेको लोसपा प्रदेश संसदीय दलका नेता जितेन्द्र सोनलले बताए।
यही पुस ८ गते बस्ने प्रदेशसभाको बैठकमा प्रदेशको नाम र राजधानी तोक्ने प्रस्ताव प्रस्तुत हुने तयारी भइरहेका बेला प्रदेश सरकारको नेतृत्वकर्ता दल जसपा र लोसपाले दलीय सहमति जुटाउने कसरत सुरु गरेका हुन्।
जसपाका प्रदेशसभा सदस्यले मंगलबारै सत्तारूढ दल नेकपा माओवादी केन्द्र र नेकपा एकीकृत समाजवादी पार्टीका संसदीय दलका नेतालाई भेटेर सहमतिको प्रस्ताव गरेको प्रदेशसभा सदस्य मनिषकुमार सुमनले जानकारी दिए।
जसपाले पनि प्रदेशको नाम मधेश र राजधानी जनकपुर राख्ने प्रस्ताव गरेको छ। सोही प्रस्तावमा दलीय सहमति जुटाउन पहिलो चरणमा सत्तारुढ दलका नेता तथा प्रदेशसभा सदस्यलाई भेटेर सहमतिको लागि छलफल अघि बढाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।