काठमाडौं– २०७४ को प्रतिनिधि सभा निर्वाचनमा कपिलवस्तु क्षेत्र नम्बर ३ का ‘उपविजेता’ मंगलप्रसाद गुप्तालाई नेकपा एमालेले उच्च प्राथमिकतामा राखेर पार्टी प्रवेश गराएको छ। उनलाई पार्टीमा प्रवेश गराउन मंगलबार अध्यक्ष केपी शर्मा ओलीका साथै उपाध्यक्ष विष्णु पौडेल, महासचिव शंकर पोखरेललगायतका नेताहरु कपिलवस्तु पुगेका छन्।
जनता समाजवादी पार्टीका केन्द्रीय सदस्यसमेत रहेका उनले गएको निर्वाचनमा उपेन्द्र यादव नेतृत्वको संघीय समाजवादी फोरमबाट चुनाव लडेका थिए। निर्वाचनमा उनी कांग्रेसका अभिषेकप्रताप साहसँग पराजित भए। साहको १९ हजार ९ सय ६६ मत आएको थियो भने गुप्ताको १५ हजार ८ सय ३ मत आएको थियो।
एमालेले आफ्नै उम्मेदवार नउठाएर हृदयेश त्रिपाठीका उम्मेदवार ईश्वर दयाल मिश्रलाई समर्थन गरेको थियो। उनी तेस्रो नम्बरमा थिए।
संगठनका हिसावले एमाले मधेशी समुदायबीच कमजोर छ। त्यहाँ एमालेले प्रभाव जमाउन उक्त समुदायमा भिजेको नेता आवश्यक भएका कारण गुप्तालाई रोजेको हो।
पहाडी समुदायमा भने एमालेको राम्रै पकड छ। राजमार्गको उत्तर भागमा पहाडी समुदायको वर्चस्व भएका कारणले एमालेले विजयनगर गाउँपालिका प्रमुख र शिवराज नगरपालिकामा मेयर जितेको छ।
राजमार्गको दक्षिणतर्फ मधेशवादी पार्टीको वर्चस्व भए पनि उत्तरतर्फको मत निर्णायक हुँदै आएको छ। त्यसैलाई मध्यनजर गर्दै संघीय समाजवादी फोरमबाट दुईपल्ट संविधानसभामा जितेका साह गएको निर्वाचनअघि कांग्रेस प्रवेश गरेर चुनाव लडेका थिए।
गुप्ता उक्त क्षेत्रमा लोकप्रिय रहे पनि फोरमबाट उठेका कारण पहाडी समुदायको मत पाएका थिएनन्। पहाडी समुदायको मत कांग्रेसका साह र एमालेले समर्थन गरेका मिश्रलाई गएको थियो। आफू यही मतले पराजित हुन पुगेको महशुस गरेर गुप्ताले एमाले रोजेका हुन्।
२०४८ र २०५६ मा उनी कांग्रेसबाट, २०७० मा तत्कालीन तराई मधेश लोकतान्त्रिक पार्टी (तमलोपा) र २०७४ मा फोरमबाट सांसद उठेका थिए। सवै निर्वाचनमा ‘उपविजेता’मै चित्त बुझाएका उनी आगामी निर्वाचन जित्नकै लागि एमाले प्रवेश गरेका हुन्।

एमाले प्रवेश गर्नुअघि उनले काठमाडौंमा अध्यक्ष ओलीलगायतसँग छलफल गरेका थिए। पार्टी प्रवेश र जिम्मेवारीको टुंगो लागेपछि विशेष कार्यक्रममार्फत आफ्नो क्षेत्रका कार्यकर्तासहित उनी पार्टी प्रवेश गरेका हुन्। गुप्तासँगै ठूलो संख्यामा जसपा कार्यकर्ता एमाले प्रवेश गरेका छन्।
कपिलवस्तुलाई केन्द्र बनाएर पत्रकारिता गर्दै आएका गोपाल भण्डारी आफ्नो क्षेत्रमा रहेको गुप्ताको लोकप्रियतामा एमालेका पार्टी प्रतिवद्ध मत जोडिँदा जितको बलियो सम्भावना रहेको बताउँछन्। उनी भन्छन्, ‘एउटा गाउँपालिका, एउटा नगरपालिका र केही वडामा एमालेले जितेको छ। गुप्तालाई ती मतसमेत आउँदा उनी बलियो उम्मेदवार बन्न सक्छन्।’
गुप्ताको एमाले प्रवेशसँगै कपिलवस्तु–३ को आगामी निर्वाचनमा एमाले र कांग्रेसबीच प्रतिस्पर्धा हुने देखिएको छ। निरन्तर हारेका कारण उनीमाथि एक प्रकारको सद्भावसमेत रहेको भण्डारीको ‘अब्जरवेशन’ छ।
गुप्ताको एमाले प्रवेशलाई उक्त क्षेत्रका वासिन्दाले समेत सकारात्मक रुपमा लिएको भण्डारी बताउँछन्। उनी भन्छन्, ‘उक्त क्षेत्रका दुवै प्रभावशाली नेताहरु शाह र गुप्ताको केन्द्रीय पार्टीमा प्रवेशले पहाडी र मधेशी समुदायमा बिग्रिएको साम्प्रदायिक सद्भाव राम्रो बन्नेछ। विगतमा जातीय–क्षेत्रीय नाराका कारण समस्या सिर्जना भएको थियो।’
उनका अनुसार धार्मिक र साम्प्रदायिक दुवै दृष्टिकोणले संवेदनशील क्षेत्र भएकाले गुप्ताको एमाले प्रवेशले राजनीतिक माहोलसमेत फरक बन्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।