काठमाडौं- नेकपा माओवादी केन्द्रको प्रदेश सम्मेलनको उद्घाटन शनिबार हुँदै छ। दिउँसो १ बजे पार्टी अध्यक्ष पुष्पकमल दाहाल ‘प्रचण्ड’ले बागमती प्रदेश सम्मेलनमा सहभागी भएर त्यहीबाट बाँकी प्रदेशको सम्मेलन भर्चुअल रुपमा गर्ने छन्।
प्रदेश सम्मेलनसँगै नेतृत्वमा आउन चाहने नेताहरुबीच प्रतिस्पर्धा चल्न थालेको छ। सात भौगोलिकसहित तीन गैरभौगोलिक प्रदेशको नेतृत्वका लागि नेताहरु आ–आफ्नो लविङमा लागेका छन्।
प्रदेश अध्यक्ष, उपाध्यक्ष र सचिव पदका लागि केन्द्रीय सदस्य भन्दा तलबाट हुन पाउने व्यवस्था गरिएको छ। केन्द्रीय सदस्य र प्रदेश पदाधिकारी दुवैमा बस्न नपाउने व्यवस्था भएपछि पार्टी केन्द्रीय सदस्यबाट राजीनामा दिएर भए पनि नेताहरु प्रदेश अध्यक्षमा दाबी गर्न थालेका छन्।
प्रदेश-१ मा केन्द्रीय सदस्यबाट अध्यक्ष दाबी, दुईमा पालिका अधिवेशन हुन बाँकी
प्रदेश-१ अध्यक्षका लागि सुदन किराती, इन्द्र आङबो, हेमराज भण्डारी, सुरेशकुमार राई प्रतिस्पर्धामा रहेको एक नेताले बताए। चारै जना पार्टी केन्द्रीय सदस्य छोडेरै भएपनि प्रदेश अध्यक्षमा जान इच्छुक भएका छन्।
हाल प्रदेश अध्यक्ष सुरेशकुमार राई सचिव हेमराज भण्डारी भए पनि दुवैले अध्यक्षमा इच्छा देखाएका छन्। यस्तै प्रदेश-२ अध्यक्ष प्रभु साह एमाले प्रवेश गरेपछि अध्यक्षमा प्रह्लाद बुढाथोकी र सचिवमा श्रवण यादव छन्। पार्टीबाट ढिलोगरी अध्यक्ष र सचिवको जिम्मेवारी तोकिएकाले पालिका सम्मेलन गर्न अझै बाँकी रहेकाले प्रदेश नेतृत्वका दाबेदार नदेखिएको केन्द्रीय सदस्य विश्वनाथ साहले बताए।
‘प्रदेश-२ मा अध्यक्ष र सचिव ढिलोगरी तोकियो। त्यसैले अझै ३० प्रतिशत भन्दा धेरै पालिकाको सम्मेलन हुन पाएको छैन’ साहले भने,‘आज प्रदेश सम्मेलन सकिएपछि पुस ३ गते मात्रै प्रदेशको बन्दसत्र हुने छ। त्यसपछि मात्रै प्रदेश नेतृत्वका दाबेदार देखिन सक्छन्।’ अहिले नै प्रदेश नेतृत्वमा को-को आउँछन् भन्न सकिने अवस्था नरहेको साहले बताए। प्रदेश अध्यक्ष बुढाथोकी सकेसम्म प्रदेश अध्यक्षमा दोहोर्याएर बस्ने पक्षमा देखिएका छैनन्।
बागमती र गण्डकीमा केन्द्रीय सदस्यबाट अध्यक्षमा दाबी
बागमती प्रदेश अध्यक्षमा नारायण दाहाल र सचिव अन्जना विशंखे छन्। दुबै नेता प्रदेश अध्यक्ष र सचिव नदोहोरिने पक्षमा छन्।
त्यसैले प्रदेश अध्यक्षका लागि सरल सहयात्री, प्रदेश सांसद विशाख खड्का, डिपी ढकाल, दिनानाथ गौतम दाबेदार देखिएका छन्। जसमध्ये सहयात्री, खड्का र गौतमबाटै एक जनाबाट अध्यक्ष र सचिव हुने देखिएको एक नेताले बताए। उनीहरु तीनै जना केन्द्रीय समितिमा समेत छैनन्।
यस्तै गण्डकी प्रदेश अध्यक्ष हरिराज अधिकारी र सचिव देवेन्द्र पराजुली छन्। दुवै जनाले अध्यक्षमा इच्छा देखाएका छन्। यस्तै केन्द्रीय सदस्य राजकाजी गुरुङ, नेता रामजी बरालले अध्यक्षमा दाबी गरेका छन्। तर, केन्द्रीय सदस्य देवेन्द्र पराजुलीले केन्द्रीय सदस्यबाट प्रदेश अध्यक्ष र सचिव नहुने दाबी गरे।
‘हामीले सकेसम्म केन्द्रीय सदस्यबाट प्रदेश अध्यक्ष र सचिव नबनाउने भन्ने छ’ पराजुलीले भने, ‘प्रदेश र जिल्ला कमिटीमा भएका साथीहरुबाट सर्वसम्मत रुपमा प्रदेश अध्यक्ष र सचिव बनाउने भन्ने छ।’
लुम्बिनी र कर्णालीमामा केन्द्रीय नेताकै दाबी
यस्तै लुम्बिनी प्रदेश अध्यक्षका लागि केन्द्रीय सदस्य हेमराज शर्मा ‘डाईमन’ दीपेन्द्र पुन‘सिजल’ र तेजबहादुर ओली प्रतिस्पर्धामा छन्। प्रदेश अध्यक्ष पाएमा तीनै जना केन्द्रीय सदस्य छोड्न तयार भएका छन्। त्यसमध्ये शर्मा र पुनमध्ये एक जना अध्यक्ष हुन सक्ने एक नेताले बताए। हाल प्रदेश अध्यक्ष ओन्सरी घर्ती र सचिव जगप्रसाद(जेपी) शर्मा छन्। यस्तै कर्णाली प्रदेश अध्यक्ष हुन सबैभन्दा धेरै मारामार छ। कर्णाली प्रदेशका हाल अध्यक्ष राजकुमार शर्मा, सचिव रामदीप आचार्य दुवै जना अध्यक्षको दावेदार रहेका छन्। यस्तै केन्द्रीय सदस्य टेकबहादुर बस्नेत, कालिबहादुर मल्ल, प्रदेश सांसद गोपाल शर्मा, सांसद विन्दमान विष्टले अध्यक्षमा इच्छा देखाएका छन्। यि अध्यक्षकै दाबेदारबाट अध्यक्ष र सचिव हुन सक्ने एक नेताले बताए।
यस्तै सुदूरपश्चिम प्रदेश अध्यक्ष र सचिव पदका लागि धेरै जनाले इच्छा देखाएका छन्। जसमा केन्द्रीय सदस्य विरमान चौधरी, नेबहादुर चौधरी, हरिलाल चौधरी,नरेन्द्र कुँवरले अध्यक्षमा दाबी गरेका छन्। हालका अध्यक्ष सरद्सिंह भण्डारी र सचिव देवीलाल चौधरीले पनि अध्यक्षमा इच्छा देखाएका छन्। सुदूरपश्चिम प्रदेशमा सबै समुदायको प्रतिनिधित्व हुने गरि अध्यक्ष र सचिव फरक फरक समुदायको बनाउने तयारी छ।
गैर भौगोलिकको अवस्था उस्तै
अहिले उपत्यका विशेष प्रदेश कमिटी अध्यक्ष लेखनाथ न्यौपाने, सम्पर्क समन्वय कमिटि अध्यक्ष सत्या पहाडी र प्रवास कमिटी अध्यक्ष ओम शर्मा छन्।
गैरभौगोलिक प्रदेश भएकाले अध्यक्ष र सचिवमा तुलनात्मक रुपमा भौगोलिक प्रदेश भन्दा कम प्रतिस्पर्धा देखिएको छ।
उपत्यका विशेष प्रदेश अध्यक्ष लेखनाथ न्यौपानेले अध्यक्ष नदोहोर्याउने बताइसकेका छन्। यसो हुँदा पूर्व विद्यार्थी नेताहरु रञ्जित तामाङ, सुरेन्द्र बस्नेत, तिलकराज भण्डारी, विजय गौतम, इन्द्र भुसाल, दिपेश पुन लगायत नेताले इच्छा देखाएका छन्। तर, पूर्व अखिल क्रान्तिकारीका अध्यक्ष रञ्जित तामाङले आफू उपत्यका विशेष प्रदेश कमिटी अध्यक्ष भन्दा पार्टी केन्द्रीय सदस्यमा जान खोजेको बताए।
यस्तै बागमती प्रदेश सांसद एवम् मजदुर नेता जगत सिंखडा समेतले अध्यक्ष दाबी गरेका छन्। यस्तै सम्पर्क समन्वय कमिटी अध्यक्ष सत्य पहाडीले सर्वसम्मत रुपमा प्रदेश पदाधिकारी टुंगो लगाउने बताइन्। अहिले नै प्रदेश नेतृत्वको विषयमा भन्न नसकिने पहाडीको भनाइ छ। यस्तै प्रवास कमिटीमा पुरानै टिम दोहोरिने सम्भावना रहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770957149.png)
-1764146706.png)
-1770562345.jpg)
