काठमाडौं- आमरण अनसनरत आंशिक प्राध्यापक डा महेशकुमार गजुरेलको जीवन रक्षा गर्न राष्ट्रिय मानवअधिकार आयोगले सरकारलाई आग्रह गरेको छ।
आन्दोलनरत आंशिक प्राध्यापकको समस्या समाधानका लागि वार्तालाई सार्थक बनाउन र अनसनरत गजुरेलको जीवनरक्षा गर्न आयोगले आग्रह गरेको हो। विगत ८ दिनदेखि अनसनमा रहेका गजुरेल र वार्ता टोलीका सदस्यहरुसँग भेटेर आयोगले जानकारी समेत लिएको प्रवक्ता मोहना अन्सारीले बताइन्।
त्रिभुवन विश्वविद्यालय र सरकारसँग पटकपटक भएका सम्झौता कार्यान्वयन नभएको भन्दै आंशिक प्राध्यापकहरुलाई करार गर्नुपर्ने एक बुँदे माग राखी गजुरेल असोज ११ गतेदेखि आमरण अनसनमा छन्। उनको स्वास्थ्य अवस्था पनि कमजोर बन्दै गएको छ। उनी वीरेन्द्र बहुमुखी क्याम्पस चितवनमा कार्यरत छन्।
२०६६ भदौ ३१ गते शिक्षा मन्त्रालयले गरेको सम्झौता कार्यान्वयनका लागि त्रिविलाई पत्र पठाए पनि हालसम्म कार्यान्वयन नगरेको भन्दै समस्या समाधानका लागि आयोगले आजै प्रधानमन्त्री तथा मन्त्रिपरिषदको कार्यालय र शिक्षा मन्त्रालयलाई पत्राचार गरेको छ।
यस्तै, नेपाल प्रगतिशील प्राध्यापक संगठन, प्रजातन्त्रवादी प्राध्यापक संघ र नेपाल राष्ट्रिय प्राध्यापक संगठनले संयुक्त विज्ञप्ति जारी गरी विभिन्न चरणको आन्दोलन गरे पनि सरकारले सुनुवाइ नगरेको उल्लेख गर्दै अनसनरत गजुरेलको जीवन रक्षाको माग गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
