सन् २०१८ मा रसियामा हुने फिफा विश्वकप फुटबल प्रतियोगिताको छनोट चरण अन्तिमतिर पुगिरहँदा सबैको चासो दक्षिण अमेरिका छनोटमा छ। किनकि साबिक उपविजेता अर्जेन्टिना छनोटको कठिन मोडमा छ। वर्तमान पुस्ताका उम्दा खेलाडी लिओनल मेसीको कप्तानीमा अर्जेन्टिनाले शुक्रबार बिहान पेरुसँग निर्णायक खेल खेल्दैछ। यही खेलले अर्जेन्टिनाको मात्र होइन पेरुको पनि विश्वकप यात्राको बाटो कोर्नेछ।
अन्तिम २ खेल बाँकी छँदा अर्जेन्टिना २४ अंक जोडेर अंक तालिकाको पाँचौ स्थानमा छ। गोल अन्तरमा अघि रहेको चौथो स्थानको पेरुको पनि २४ अंक नै छ। दक्षिण अमेरिकाबाट ४ टिम सिधै विश्वकपमा छनोट हुनेछन्। पाँचौ हुने टिमको अन्तरमहादेशीय प्लेअफ खेलेर विश्वकपमा छनोट हुने सम्भावना बाँकी नै हुनेछ। त्यसैले चौथो र पाँचौ स्थानमा रहेका टिमको यो भिडन्तमा जित निकाल्नेको विश्वकप यात्रा सहज हुनेछ। हार्ने टिमको लागि विश्वकप छनोट कठिन बन्नेछ।
दक्षिण अमेरिका छनोटबाट शीर्ष स्थानको ब्राजिलले ३७ अंक जोडेर यसअघि नै रसियाको टिकट पक्का गरिसकेको छ। २७ अंक जोडेको उरुग्वे र २६ अंक जोडेको कोलम्बिया छनोटको नजिक छन्। २३ अंक जोडेर छैटौं स्थानमा रहेको चिली, २१ अंक जोडेर सातौं स्थानमा रहेको पाराग्वे र २० अंक जोडेर आठौं स्थानमा रहेको इक्वेइडरको पनि विश्वकपमा छनोट हुने सम्भावना बाँकी छ। जसले अर्जेन्टिनामाथि थप दबाब परेको छ। अर्जेन्टिनाले पेरुसँग प्रतिस्पर्धा गरेको दिन कोलम्बिया र पाराग्वे, चिली र इक्वेइडर, भेनेजुएला र उरुग्वे तथा बोलिभिया र ब्राजिलबीच खेल हुँदैछ। यी खेलमा चिली, पाराग्वे र इक्वेइडरको खराब नजिता आए अर्जेन्टिनालाई फाइदा पुग्नेछ।
पेरुसँग अंक गुमाएको अवस्थामा जित हात पार्ने चिली र पाराग्वेले अर्जेन्टिनालाई पछि पार्नेछन्। जसले अन्तिम खेलमा जित निकाले पनि अर्जेन्टिनाको सिधै विश्वकपमा छनोट हुने सम्भावना सकिनेछ। प्लेअफमा सम्भावना पनि कठिन हुनेछ। अन्तिम खेल १० अक्टोबरमा अर्जेन्टिनाले इक्वेइडरसँग तथा पेरुले कोलम्बियासँग खेल्नेछन्।
अर्जेन्टिनाका लागि अहिले आशा भनेकै कप्तान तथा फरवार्ड लिओनल मेसी हुन्। अर्जेन्टिनी टिममा मेसीसँगै अग्रपंक्तिमा पाब्लो डिबाला, सर्जियो अग्युरो र गोन्जालो हिग्युइन छन्। तर मेसीसँग तीनै फरवार्डको तालमेल मिल्न सकिरहेको छैन। यता अर्जेन्टनाका प्रशिक्षक जोर्जे बुरुचागाले पेरविरुद्ध कुनै हालतमा जित निकाल्नुपर्ने बताएका छन्। जोर्जे गत मेमा स्पेनिस क्लब सेभिल्ला छाडेर अर्जेन्टिनाको प्रशिक्षक बनेका थिए। अर्जेन्टिना फुटबल संघले इगार्डो बाउजालाई हटाउँदै जोर्जेलाई प्रशिक्षकमा नियुक्त गरेको थियो।
अर्जेन्टिना र पेरुबीच विश्वकप छनोटमा चौथो पटक निर्णायक प्रतिस्पर्धा हुन लागेको हो। यसअघि सन् १९६९ को छनोटको निर्णायक खेलमा पेरु र अर्जेन्टिनाले २–२ को बराबरी खेलेका थिए। बराबरीपछि अर्जेन्टिनाले सन् १९७० मा मेक्सिको विश्वकपमा स्थान बनाउन सकेन।
अर्जेन्टिनाले सन् १९७४ देखि लगातार विश्वकपमा स्थान बनाउँदै आएको छ। लगातार ११ पटक विश्वकप खेलेको अर्जेन्टिना यसबीचमा दुईपटक च्याम्पियन (सन् १९७८ र १९८६) बन्यो। सन् १९८५ मा पेरुसँग निर्णायक खेलमा २–२ को बराबरी खेलेपछि अर्जेन्टिनाले सन् १९८६ को विश्वकपमा स्थान बनाएको थियो। पेरु प्लेअफमा धकेलिएको थियो। कठिन छनोट पार गरेको अर्जेन्टिनाले पछि विश्वकपको ट्रफी नै उचाल्यो।
सन् २००९ को छनोटमा पनि अर्जेन्टिनी टिम संकटमा परेको थियो। छनोटमा अर्जेन्टिनाले निर्णायक खेलमा पेरुलाई नै पराजित गरेर सन् २०१० को दक्षिण अफ्रिका विश्वकपमा स्थान बनाएको थियो। ११ अक्टोबर २००९ मा भएको छनोट खेलमा अर्जेन्टिनाले पेरुलाई २–१ ले हराएर विश्वकपको टिकट पक्का गरेको थियो। अन्तिम समयमा गोल गरेपछि अर्जेन्टिनाले अंक तालिकामा चौथो स्थान हात पारेर विश्वकपमा स्थान बनाएको थियो। यसपटक पनि अर्जेन्टिनाका लागि पेरुविरुद्धको खेल नै निर्णायक बनेको छ।
शुक्रबार बिहान हुने खेलमा पेरुले ३८ वर्षअघिको इतिहास दोहोर्यारउला वा अर्जेन्टिनाले जितलाई निरन्तरता देला? सबै फुटबलप्रेमीको चासोको विषय बनेको छ।(एजेन्सीको सहयोगमा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
