फाइल तस्बिर
काठमाडौं- सहरी विकासमन्त्री रामकुमारी झाँक्रीले पारिवारिक खालका साना निर्माण कम्पनीले सरकारको सार्वजनिक खर्च गर्न नसक्ने बताएकी छन्।
बुधबार काठमाडौंमा नेपाल निर्माण व्यवसायी महासंघले १४औं राष्ट्रिय निर्माण दिवसको अवसरका आयोजना गरेको प्रभातफेरि कार्यक्रममा बोल्दै उनले यस्तो बताएकी हुन्।
मन्त्री झाँक्रीले सरकारको सबैभन्दा ठूलो सार्वजनिक खर्च गर्ने निर्माण कम्पनी पारिवारिक खालको दुई वटा इन्जिनियर, दुई वटा जेसीभी र दुई वटा ट्रिपर राखेर बनाएको कम्पनीले राज्यको सार्वजनिक खर्च गर्न नसक्ने बताइन्। निर्माण व्यवसायी सरकारको खर्च गर्ने महत्त्वपूर्ण क्षेत्र भएको भन्दै निर्माण व्यवसायीहरुले काम गर्ने क्षमतालाई विकास गर्नुपर्ने आवश्यकता रहेको बताइन्।
मन्त्री झाँक्रीले निर्माण कम्पनीको क्षमता विकास गरेर अन्तर्राष्ट्रिय क्षेत्रमासमेत प्रतिस्पर्धा गर्न सक्नुपर्नेमा जोड दिइन्। उनले स्वदेशमा मात्रै नभएर अन्तर्राष्ट्रिय क्षेत्रमासमेत प्रतिस्पर्धा गर्ने कम्पनी बनाउनका लागि धेरै पुँजी भएको कम्पनी बनाउनुपर्ने तर्क गरिन्।
‘पारिवारिक खालका साना कम्पनीले सरकारको सार्वजनिक खर्च गर्न सक्दैनन्। त्यसैले निर्माण कम्पनीको क्षमता विकास गर्नु आवश्यक छ। निर्माण कम्पनीको क्षमता विकास भएमा मात्रै प्राविधिको विस्तार, पारदर्शिता र जवाफदेहिता हुन्छ। त्यसैले अब ढिलो चाँढो सार्वजनिक क्षेत्रमा काम गर्ने निर्माण कम्पनी अनिर्वाय रुपमा सार्वजनिक कम्पनीमा जानुपर्छ,' उनले भनिन्।
सार्वजनिक कम्पनीमा जाँदा सरकारको करको पैसाबाट खर्च गर्ने कम्पनीको लाभांश सर्वसाधरण जनताले पनि पाउनुपर्ने मन्त्री झाँक्रीको तर्क छ। उनले सरकारको विकास निर्माणको पुँजीगत खर्च गर्ने क्षेत्र नै निजी क्षेत्र भएको बताइन्। 'सरकारको सार्वजनिक खर्च गर्ने र विकासशील नेपाल बनाउन प्रमुख भूमिका रहने भएकाले निर्माण व्यवसायीलाई इज्जत चाहिन्छ। त्यसैले सरकारले अहिले भएका कानुनलाई सरलीकृत गर्नु आवश्यक छ। योजना छनोटदेखि कार्यान्वयनसम्मका योजना बनाउनुपर्छ। निर्माण ऐनलाई सामूहिक परिर्वतन गर्नुपर्छ,' मन्त्री झाँक्रीले भनिन्, 'अहिले विविध कारणले नियमावलीमा मात्रै संशोधन गरेका छौं। निर्माण क्षेत्रमा भएका सबै समस्या समाधान गर्न खरिद नियमावली संशोधन गर्न आवश्यक छ। सरकारले त्यसको तयारी गरिरहेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775455666-1775459306.jpeg)
-1764146706.png)
