काठमाडौं– चिनियाँ कम्युनिष्ट पार्टीका भूतपूर्व प्रान्तीय नेता एवं पूर्व उपप्रधानमन्त्री झाङ गाओलीमाथि यौन दुर्व्यवहार गरेको आरोप लगाएपछि विश्व चर्चित चिनियाँ टेनिस खेलाडी पेङ सुआई बेपत्ता भएकी छन्। ३५ वर्षीया सुआईले गत नोभेम्बर ३ तारिखमा चिनियाँ सामाजिक सञ्चाल ‘वेइबो’मार्फत गाओलीले यौन सम्पर्कका लागि आफूलाई प्रयोग गरेको आरोप लगाएकी थिइन्।
खुलापत्रको रुपमा लेखेको उक्त पोष्टमा आफू र गाओली कम्तिमा १० वर्षसम्म सम्बन्धमा रहेको उल्लेख गरेकी थिइन् । खुलापत्रमा हाल ७५ वर्षीय गाओलीलाई आफूले मन दिएको भन्दै सुआईले लेखेकी थिइन् ‘आफ्नो घर लगेर मलाई यौन सम्पर्कका लागि बाध्य पार्नुभएको थियो। हो, मसँग कुनै प्रमाण थिएन र प्रमाण सम्भव पनि थिएन।’
‘मैले आफूलाई कतिसम्म घृणित ठानेकी थिएँ भनेर शब्दमा भन्न सक्दिनँ, न त मैले अझै पनि मान्छे हुँ भनेर कैयौं पटक आफैंलाई सोधेको कुरा भन्न सक्छु,’ सुआईको पोष्टमा भनिएको थियो, ‘मैले आफूलाई हिँडिरहेको जिउँदो लास ठानेकी थिएँ।’ तर, उनको पोष्ट केही समयमै इन्टरनेटबाट हटाइएको थियो। सन् २०१२ देखि २०१७ सम्म ७ सदस्यीय पोलिटब्यूरो स्थायी कमिटीमा रहेका गाओलीले सन् २०१८ मा उप–प्रधानमन्त्री पदबाट राजीनामा दिँदै राजनीतिबाट सन्यास लिएका थिए।
आरोप लगाएयता सार्वजनिक रुपमा नदेखिएकी र सामाजिक सञ्जालमासमेत मौन रहेकी सुआईको सुरक्षालाई लिएर विश्वका चर्चित खेलाडीहरुले चिन्ता व्यक्त गर्न थालेका छन्।
यसैबीच विश्व महिला टेनिस संघले चीनमा आयोजना हुने सबै टेनिसका प्रतियोगितामा प्रतिबन्ध लगाएको छ। उसले खेलाडी सुआईको खोजी गरिनुपर्ने माग गर्दै चीनका सबै प्रतियोगितामा प्रतिबन्ध लगाएको हो।
विश्व टेनिस महासंघका अध्यक्ष स्टिभ साइमनले यो निकै गम्भीर विषय रहेको बताएका छन्। उनले सुआई स्वतन्त्र, सुरक्षित र उनी धम्कीपूर्ण अवस्थाबाट बाहिर रहेको हुनसक्ने शंका गरेका छन्। ‘मैले मेरा खेलाडीहरुलाई त्यहाँ खेल्नका लागि कसरी आग्रह गर्न सक्छु?,’ उनले भने,‘ यदि चीनमा २०२२ मा प्रतियोगिता आयोजना गरेको खण्डमा खेलाडीहरुमा सुरक्षा चुनौती थपिन सक्नेबारे सजग रहेका छौं।’
महासंघले सुआईबारे अनुसन्धन गरिनुपर्ने माग गर्दै आएको छ। यता, उनले गएको नोभेम्बरमा अन्तर्राष्ट्रिय ओलम्पिक कमिटीका अध्यक्ष थोमस ब्याचसँग कुरा गर्दै आफू सुरक्षित र ठीक रहेको बताएकी थिइन्। महासंघले भने उनी सुरक्षित रहेको पुष्टि गर्न भिडियो अपूर्ण रहेको बताउँदै आएको छ।
सुआईले गाओलीविरुद्ध लगाएको आरोप चीनमा चलिरहेको ‘मीटु मुभमेन्ट’अन्तर्गत सबैभन्दा हाइप्रोफाइल घटना मानिएको छ। सुआई महिला युगलतर्फ पूर्वविश्व नम्बर एक खेलाडी हुन्। उनले दुईपटक ग्रान्डस्लाम उपाधि जितेकी छिन्। सन् २०१४ को अस्ट्रेलियन ओपनमा उनी ग्रान्डस्लामको एकल स्पर्धामा सेमिफाइनलसम्म पुगेकी थिइन्।
७५ वर्षीय गाओलीले सुआईको आरोपविरुद्ध कुनै प्रतिक्रिया दिएका छैनन्। उनी सन् २०१३ देखि २०१८ सम्म चीनको उपप्रधानमन्त्री थिए। उनी वर्तमान राष्ट्रपति सी चिनफिङनजिक मानिन्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
