बिहान १० बजे सुरु हुने भनिएको एमालेको दोस्रो दिनको बन्दसत्र बेलुका ७ बजेमात्र सुरु हुने भनिएको छ। शनिबारको बन्दसत्रले केही नेताको विरोधका बीच पदाधिकारी र केन्द्रीय कमिटी सदस्यको नाम चयन गर्ने अधिकार अध्यक्ष केपी शर्मा ओलीलाई दिएको छ। तर, उनले आइतबार दिनभर प्रयास गर्दा पनि अन्तिम सूची तयार पार्न सकेका छैनन्।
ओलीलाई आफू निकटका नेताहरुले एकै पदमा गरेको दाबीले जति अप्ठ्यारो पारेको छ, अध्यक्षमा भीम रावलको उम्मेदवारी घोषणाले पनि उत्ति नै अप्ठ्यारो पारेको छ। रावलले निर्वाचनको माग गरिरहेका छन्। रावलले निर्वाचनको माग गरिरहँदा आफूलाई अध्यक्षको रुपमा प्रस्तुत गर्दै सम्पूर्ण नाम प्रस्तुत गर्न ओलीलाई नैतिक संकट छ।
बन्दसत्र ढिला गरेर राति पुर्याउनुलाई अध्यक्षका उम्मेदवार रावलले भने धाँधली गर्ने मनशायको रुपमा बुझेका छन्। उनले पार्टीमा अहिलेजस्तो स्वेच्छाचारिता आफूले कहिल्यै नदेखेको बताए। प्रस्तुत छ, रावलसँग नेपाल लाइभका लागि बीपी अनमोलले गरेको कुराकानीः
बन्दसत्र किन सुरु हुन सकेन?
हाम्रो पार्टीको पूर्वनिर्णय बमोजिम १० गते खुलासत्र, आमसभा, ११ गते बिहान विदेशी पाहुनाहरुले मन्तव्य दिने, पार्टी अध्यक्षबाट धारणा राख्ने र बेलुका निर्वाचनको लागि उम्मेदवारी दाखिलासम्बन्धी सम्पूर्ण प्रक्रिया सक्ने र त्यही दिन मतदान यन्त्र कसरी प्रयोग गर्ने भन्ने जानकारी पनि दिने। र, १२ गते बिहान ८ बजेबाट मतदान गर्ने निर्णय थियो। त्यसविपरीत ११ गते बेलुका ४ बजेसम्म केही नगर्ने, राति बैठक बोलाएर अब टीका लगाउनुपर्छ भनेर दिनभरि षड्यन्त्र गरेको पोल खोल्ने।
राति बैठक गर्नु धाँधली गर्ने मनशायबाट भएको जस्तो देखिन्छ। कुनै संस्थागत छलफल नगरीकन यस्तो काम गर्नु भनेको अलोकतान्त्रिक काम हो। यसले पार्टीलाई बलियो बनाउँदैन। आशंका उत्पन्न गराउँछ। पार्टीको प्रणालीको विश्वसनीयतालाई घटाउँछ। यस्तो किन भइरहेको छ, मलाई कुनै जानकारी छैन। म आश्चर्यचकित छु। म पार्टीको उपाध्यक्ष, अध्यक्षमा उम्मेदवार घोषणा गरेको व्यक्ति। मलाई जानकारी छैन। यस्तो स्वेच्छाचारी काम मैले पार्टीमा पहिलोपटक देख्दै छु।
तपाईंसँग ईश्वर पोखरेलले छलफल गर्नुभएको थियो नि? के भन्नुभयो?
मसँग कसैले केही छलफल गर्नुभएको छैन। त्यो कुरा गलत हो।
चार जना नेताले ३०१ जनाको केन्द्रीय कमिटी सदस्यको सूची अध्यक्षलाई बुझाउनुभयो भन्ने कुरा आइरहेको छ नि?
यो महाधिवेशन नेतृत्व निर्वाचन गर्ने महाधिवेशन हो। जबजले पनि प्रतिस्पर्धाबाट अगाडि जानुपर्छ, कार्यकर्ताबाट अनुमोदन हुनुपर्छ भन्छ। यदि कुनै व्यक्तिले खल्तीबाट ३०१ जना निकाल्ने हो भने खर्च गरेर महाधिवेशनको लागि किन चितवन आउनु? ५० लाख खर्च गरेर किन मञ्च बनाएको? काठमाडौंको कसैको घरमा बसेर घोषणा गर्ने र मन लागेको ठाउँमा आमसभा गरे भइहाल्छ नि। यो लोकतन्त्र हो? नेकपा एमाले लोकतान्त्रिक पार्टी होइन भनेर पहिले हामीलाई कति आलोचना गरे। त्यो आरोप सही होइन भनेर हामीले यतिका वर्ष अभ्यास गर्यौं। पार्टीलाई बलियो बनायौं। अनि अहिले आएर दिनभरि बैठक नगर्ने, राति बैठक गर्ने। यो धाँधली गर्ने षड्यन्त्र हो भन्ने मलाई लाग्छ।
बन्दसत्रको हलमा एकपक्षीय ढंगले नामावली पेस गरेर पारित गरियो भने के गर्नुहुन्छ?
म आपत्ति व्यक्त गर्छु। प्रतिवाद गर्छु।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
