सौराहा- नेकपा (एमाले)ले दुई महिनाअघिको विधान महाधिवेशनबाट पारित विधान संशोधन गरेर केन्द्रीय कमिटीको आकार बढाएको छ। त्यसैगरी, पदाधिकारीको संख्या थप गरेको छ भने पोलिट ब्यूरोलगायतका संरचना पनि थप गरेको छ।
चितवनमा जारी एमालेको १०औं राष्ट्रिय महाधिवेशनको बन्द सत्रले विधान संशोधन गर्ने निर्णय गर्दै केन्द्रीय कमिटी, पदाधिकारी, पोलिटब्यूरो र अन्य निकायबारे थप व्यवस्था गरेको हो। शुक्रबार साँझ बसेको नवौं महाधिवेशनबाट निर्वाचित केन्द्रीय कमिटीको अन्तिम बैठकले विधान संशोधनसम्बन्धी प्रस्ताव बन्दसत्रमा लैजाने निर्णय गरेको थियो। सोहीअनुसार शनिबार साँझ संगठन विभाग प्रमुख विष्णु पौडेलले यससम्बन्धी प्रस्ताव जारी १०औं महाधिवेशनको बन्दसत्रमा पेस गरेका थिए।
विधान संशोधनसँगै एमालेको केन्द्रीय कमिटी अब ३०१ सदस्यीय हुनेछ। यसअघि विधान महाधिवेशनबाट पारित विधानमा एमालेको केन्द्रीय कमिटी २२५ सदस्यीय हुने उल्लेख थियो।
त्यस्तै एमालेले पदाधिकारीको संख्या बढाएर १९ पुर्याउनेगरी विधान संशोधन गरेको छ। यसअघि विधानमा १५ जना पदाधिकारी रहने व्यवस्था थियो। विधान महाधिवेशनबाट पारित विधानमा उपाध्यक्ष चार र उपमहासचिव एक जना रहने व्यवस्था थियो। त्यसलाई संशोधन गरेर उपाध्यक्ष छ र उपमहासचिव तीन जना रहने व्यवस्था गरिएको थियो। अर्थात् विधान संशोधनबाट एमालेले दुई उपाध्यक्ष र दुई उपमहासचिवको पद थप गरेको छ।
एमालेमा पदाधिकारी र केन्द्रीय सदस्यका आकांक्षी धेरै देखिएपछि पद व्यवस्थापनमा परेको सकस हटाउन पदाधिकारीदेखि केन्द्रीय कमिटीकोसमेत आकार बनाउने निर्णय गरिएको थियो। तर, यसले पनि एमालेमा पदको व्यवस्थापन सहज नबनेको देखाएको छ।
पद व्यवस्थापनकै लागि एमालेले पोलिटब्यूरो ब्युँताएको छ। विधान महाधिवेशनले एमालेमा पोलिटब्यूरोको संरचना खारेज गरेको थियो। तर, १०औं महाधिवेशनले विधान संशोधन गर्दै ९९ सदस्यीय पोलिटब्यूरो गठन गर्ने निर्णय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
