एमाले महाधिवेशन उद्घाटनस्थलमा तयार पारिँदै गरेको मञ्च।
काठमाडौं- नेकपा एमालेको दशौं राष्ट्रिय महाधिवेशन शुक्रबारदेखि चितवनमा सुरु हुँदैछ। महाधिवेशनको उद्घाटन सत्र नारायणगढस्थित नारायणी किनारमा गरिनेछ भने बन्दसत्र चितवनको सेभेन स्टार होटलमा गरिनेछ।
मंसिर ११ गते उम्मेदवारी दर्ता गर्ने कार्यक्रम तय भएको छ। उक्त दिन उम्मेदवारी फिर्ता लिने समय पनि तोकिनेछ। र, बेलुका ६ बजे अन्तिम नामावली प्रकाशन गर्ने कार्यक्रम छ। मंसिर १२ गते मतदान प्रक्रिया सुरु हुने छ। महाधिवेशनमा प्यानल बनाएर चुनाव लड्न पाइने छैन।
एकसय वटा विद्युतीय मतदान मेसिन (इलेक्ट्रोनिक भोटिङ मेसिन) बाट मतदान गराउने तयारी गरिएको छ। एमालेको निर्वाचन आयोगले ९२ वटा मेसिनहरु निर्वाचनका लागि प्रयोग गर्ने छ। तीन वटा मेसिनहरु नमुना मतदानका लागि आयोगको कार्यालय अगाडि खुला रुपमा राखिने छ। त्यसबाट मतदान गर्ने तयारी सिकाइनेछ। पाँच वटा मेसिनहरु विकल्पको रुपमा राखिनेछ। मतदानका क्रममा कुनै मेसिनमा खराबी आएमा विकल्पमा राखिएका मेसिन प्रयोग गरिनेछ।
महाधिवेशनमा २ हजार १७५ जना प्रतिनिधि सहभागी हुनेछन्। उनीहरुले १५ पदाधिकारीसहित २२५ जना केन्द्रीय सदस्यको चयन गर्नेछन्।
पदाधिकारी (सबै खुला) -१५
अध्यक्ष-१
वरिष्ठ उपाध्यक्ष-१
उपाध्यक्ष-४
महासचिव- १
उपमहासचिव- १
सचिव- ७
केन्द्रीय कमिटी (खुला प्रतिस्पर्धा)- ९८
खुला- ६०
महिला- ३८
केन्द्रीय कमिटी (भौगोलिक क्षेत्र)- ४६ (३० खुला र १६ महिला)
सात प्रदेश- ४६ (प्रत्येक प्रदेशबाट ४ खुला र २ महिला)
उपत्यका विशेष- २ (१ खुला र १ महिला)
सम्पर्क समन्वय- २ (१ खुला र १ महिला)
केन्द्रीय कमिटी (समावेशी)- ६६ (खुला ४५ र महिला २१)
आदिवासी जनजाति- २२ (१५ खुला र ७ महिला)
मधेसी- १६ (११ खुला र ५ महिला)
दलित- १० (७ खुला र ३ महिला)
थारु- ६ (४ खुला र २ महिला)
मुस्लिम- ४ (३ खुला र १ महिला)
श्रमिक- ५ (३ खुला र २ महिला)
पिछडिएको क्षेत्र- ३ (२ खुला र १ महिला)
महाधिवेशनले केन्द्रीय अनुशासन आयोग र केन्द्रीय लेखा आयोगका पदाधिकारी सहितको सदस्यहरु पनि निर्वाचित गर्नेछ। दुवै आयोगमा पदाधिकारीसहित १५ जना सदस्य हुनेछन्।
दुवै आयोगको निर्वाचित हुने सदस्यको ढाँचा यस्तो छ-
अध्यक्ष- १ (खुला)
उपाध्यक्ष- १ (खुला)
सचिव- १ (खुला)
सदस्य- १२ (७ खुला र ५ महिला)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
