काठमाडौं- नेकपा (एमाले)को चितवनमा हुन गइरहेको १०औं राष्ट्रिय महाधिवेशनको सुरक्षा कमान्ड सम्हाल्न नेपाल प्रहरीले एआईजी सहकुल थापालाई खटाएको छ।
महाधिवेशनको सुरक्षा कमान्ड सम्हाल्न प्रहरी प्रधान कार्यालयअन्तर्गत कार्य विभागका एआईजी थापालाई खटाइएको प्रहरी प्रवक्ता एसएसपी बसन्त कुवँरले जानकारी दिए।
‘अन्तर प्रदेश समन्वय गर्नुपर्ने अवस्था भएको कारणले एआईजी खटाउने निर्णय भएको हो,’ उनले भने,‘बागमती मात्र नभएर लुम्बिनी र गण्डकीसहित अन्य सुरक्षा निकायसित पनि समन्वयका लागि यस्तो निर्णय भएको हो।’
एआईजी थापा बिहीबारदेखि नै चितवन पुगेर नेतृत्व गर्ने छन्। एमालेले सुरक्षा व्यवस्थाका विषय गृह सचिवसहित नेपाल प्रहरीका निमित्त प्रहरी महानिरीक्षक र सशस्त्र प्रहरी प्रमुखसँग छलफल गरेको थियो।
यसअघि डिआईजीले नेतृत्व गर्ने भनिए पनि प्रहरी प्रधान कार्यालयले भने एआईजी थापालाई खटाएको हो। एमालेको महाधिवेशनलाई ध्यानमा राख्दै चितवनको सुरक्षा व्यवस्था कडा पारिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
