चितवन- गत असोज १५ देखि १७ गतेसम्म ललितपुरमा भएको एमालेको प्रथम विधान महाधिवेशनमा देशभरबाट ६ हजारको संख्यामा प्रतिनिधि सहभागी भए।
ठूलो संख्यामा प्रतिनिधि सहभागी हुँदा व्यवस्थापन गर्न केही कठिनाइ भयो। देशभरबाट आएका प्रतिनिधिलाई आफ्नो परिचय पत्र र झोला पाउन निकै सकस भयो।
कतिपय महाधिवेशन प्रतिनिधिहरुले अन्तिम दिनसम्म पनि प्रतिनिधि परिचय पत्र पाएका थिएनन्।
महाधिवेशन सकिएपछि कतिका प्रतिनिधि परिचय पत्र जिल्लामा पठाइएको थियो। तर, विधान महाधिवेशन भएको दुई महिनापछि आयोजना हुन गइरहेको एमालेको दशौं राष्ट्रिय महाधिवेशनमा भने यो समस्या नहुने आयोजकले जनाएको छ।
‘विधान महाधिवेशनमा जुन समस्या हामीले भोगेका थियौं। त्यो अहिले हुँदैन। त्यतिखेरको पाठ सिकेर अहिले सुधार गरेका छौं,’ केन्द्रीय सदस्य एवं स्वयंसेवक परिचालन कमिटीका संयोजक विनोद श्रेष्ठले भने, ‘प्रतिनिधिले आफू बस्ने होटलकै कोठामा परिचय पत्र र झोला लगायत आवश्यक सामानहरु प्राप्त गर्नेछन्।’
बारकोडसहितको परिचयपत्र
प्रविधिलाई भरपुर उपयोग गर्दै आएको नेकपा एमालेले यसपटकको दशौं राष्ट्रिय महाधिवेशनमा सहभागी हुने प्रतिनिधिहरुको परिचय पत्र पनि प्रविधियुक्त बनाएको छ।
परिचय पत्र बारकोडसहित उल्लेख गरिएको छ। जुन बारकोड मेसिनले स्क्यानिङ गरेपछि प्रमाणित भएपछि प्रतिनिधि बन्दसत्रमा प्रवेश पाउने छन्।
‘बन्दसत्रमा प्रवेश गर्दा होस् वा मतदानमा भाग लिँदा, खाना खाने बेला पनि बारकोडको माध्यमबाट स्क्यानिङ हुन्छ,’ श्रेष्ठले भने, ‘यो हामीले व्यवस्थित र सहज व्यवस्थापन गर्न सकियोस् भनेर व्यवस्था गरेका हौं।’
एमाले केन्द्रीय सदस्य एवं महाधिवेशन मूल आयोजक कमिटीका सदस्य कपिलदेव पोखरेलले सौराहमा ३५ सय कोठाहरु प्रतिनिधिका लागि छुट्टाइएको भन्दै व्यवस्थापनको सबै तयारी सकिएको बताए।
‘हामीले दशवटा कलष्टर छुट्टाएर प्रतिनिधिको राख्ने छौं,’ उनले भने, ‘त्यसका लागि सम्बन्धित होटल व्यवसायीहरुलाई पनि हामीले भनिसकेका छौं। सौराहमा पनि स्थानीय यातायातको माध्यमबाट सबै आ–आफ्नो बस्ने होटलमा जान सकिने मिलाइएको छ।’
होटलमा नै सबै प्रतिनिधिहरुको नामदर्ता गर्ने काम हुने छ।
‘पहिलो दिन मंसिर १० गते साँझको खाना उहाँहरु बसेकै होटलमा खानुहुन्छ,’ उनले भने, ‘भोलिपल्ट बिहान ब्रेकफास्ट खाएर, सेभेन स्टार परिसरको बन्दसत्रमा आएर यहीँ मेसमा खाना खानुहुन्छ।’
प्रतिनिधिहरुलाई तीनदिन मात्रै व्यवस्थापन गरिने छ। ‘तीन रातका लागि प्रतिनिधिको व्यवस्थापन हुन्छ। १२ गते चुनाव भएर त्यही साँझ नतिजा आउँछ,’ उनले भने, ‘१३ गते बिहान हामी सबै प्रतिनिधिहरुलाई सौराहबाट बिदाइ गर्नेछौं।’
बासस्थान र यातायातका लागि १० वटा नै कलष्टर निर्माण गरिएकाले ती कलष्टरकै पदाधिकारीहरुले काम गर्ने उनी बताउँछन्। एमालेको दशौं राष्ट्रिय महाधिवेशन यही मंसिर १० देखि १२ गतेसम्म चितवनमा हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1768395492.png)
