काठमाडौं– अफगानिस्तानबाट भारत हुँदै अवैध रुपमा नेपाल आइपुगेका ११ अफगानी नागरिक माथिको छानबिन अन्तिम चरणमा पुगेको छ। प्रहरीको केन्द्रीय अनुसन्धान ब्यूरो (सीआईबी)ले पक्राउ गरेर अध्यागमनलाई बुझाएसँगै सुरु भएको छानबिन प्रक्रिया अन्तिम चरणमा पुगेको हो।
अध्यागमन विभागका प्रवक्ता झंकनाथ ढकालका अनुसार उनीहरु कसरी नेपाल भित्रिए? भन्ने विषयमा कागजात केलाएर अनुसन्धान गरिएको छ। यस्तै, उनीहरुलाई नेपालसम्म ल्याउने कोही व्यक्ति भए÷नभएको लगायत विषयमा पनि छानबिन गरिएको ढकालले जानकारी दिए।
‘छानबिन अन्तिम चरणमा पुगेको छ। उनीहरुका कागजातका पाटाहरु केलाउनेदेखि कसरी काठमाडौंसम्म आइपुगे भन्ने पाटाहरु हामीले केलाएका छौं। अबको केही दिनमै के गर्ने भन्ने विषय टुंगोमा लाग्छ,’ ढकालले नेपाल लाइभसँग भने।
अध्यागमन स्रोतले भने उनीहरुलाई डिपोर्ट गर्ने तयारी भइरहेको बताएको छ। सोहीअनुसार कागजात तयार गर्ने काम समेत सुरु गरिएको अध्यागमन स्रोतले नेपाल लाइभलाई जानकारी दियो।
‘उहाँहरुलाई अहिले नै शरणार्थी भन्न पनि मिल्दैन। सम्पूर्ण कागजात छ, भारतको भिषा समेत लगाएर भारत हुँदै नेपाल प्रवेश गरेको देखिन्छ। बिना अनुमति अध्यागमन कानुन उल्लघंन गरेर नेपाल प्रवेश गरकाले कानुन अनुसार नै डिपोर्ट गर्ने तयारी भएको छ,’ स्रोतले नेपाल लाइभलाई भन्यो।
अहिले नेपाल प्रवेश गरेका ११ अफगानी नागरिकलाई काठमाडौं राखिएको अवस्थामा भारतमा रहेका अन्य अफगानी समेत भित्रन सक्ने अध्यागमन कार्यालयका अधिकारीहरुको आशंका छ। त्यसैले जतिसक्दो छिटो उनीहरुलाई डिपार्ट गर्नुपर्ने निष्कर्षमा पुगिएको स्रोतको भनाइ छ। विभागले उनीहरुलाई डिपोर्ट गर्न भनेर गृह मन्त्रालयलाई समेत ब्रिफ गरेको जनाइएको छ।
दिल्लीमा ३० हजार भन्दा बढी अफगानी नागरिक रहेको बताइन्छ। भारतबाट अफागनी नागरिक नेपाल प्रवेश गर्नसक्ने भन्दै गृह मन्त्रालयले सुरक्षा निकायलाई जाँचमा कडाइ निर्देशन दिइसकेको छ।
अवैध रुपमा काठमाडौं भित्रिएका ११ अफगानी नागरिकमध्ये ५ जना एकै परिवारका छन्। उनीहरु कात्तिक ३ गते भारतबाट रुपन्देहीको बेलहिया नाका हुँदै काठमाडौं आइपुगेको पाइएको छ। यसअघि नै असोज १२ गते ६ जना अफगानी काठमाडौं आइपुगेको पाइएको थियो। अवैध रुपमा अफगानी नागरिक काठमाडौं आइपुगेको भन्ने जानकारी पाएपछि उनीहरुलाई सीआईबीले कात्तिक ८ गते सिनामंगलस्थित फेसबुक होटलबाट पक्राउ गरेको थियो।
नेपाल प्रवेश गरेका उनीहरुलाई संयुक्त राष्ट्रसंघको नेपालस्थित उच्च आयुक्त (युएनएचसीआर) कार्यालयले अस्थायी कागजात बनाउने प्रक्रिया समेत सुरु गरेको छानबिनका क्रममा खुलेको छ।
पक्राउ परेकामध्ये ६ जनाको मेक्सिकोको भिसा रहेकाले उनीहरुकै अनुरोधमा कात्तिक १४ गते अध्यागमन विभागले मेक्सिको पठाएको थियो।
श्रीलंकाको राजधानी कोलम्बो हुँदै एकै परिवारका ४१ वर्षीय मोहम्मद जामराई स्तानिकजाई, उनकी श्रमती ३८ वर्षीया नाजिफा, छोरीहरू १७ वर्षीया मिसबाह जैनाव र १२ वर्षीया नुरुल हाया र ८ वर्षीय छोरा मोहम्मद रायनलाई उनीहरूकै रोजाइमा मेक्सिको पठाइएको थियो। मेक्सिकोस्थित अध्यागमनले पाँचै जनालाई विमानस्थलबाटै फर्काइदिएको थियो। त्यसपछि उनीहरु पुनः काठमाडौं नै आइपुगेका थिए। फिर्ता भएका ५ सहित ३६ वर्षीय अमनुल्लाह मोहम्मदी, ३० वर्षीय अजमल सरिफ, २३ वर्षीय अकमल जाजाई, २४ वर्षीय रोमाल होतक, २१ वर्षीय हसन्नुल्लाह हस्हेमी र २६ वर्षीय इमरान वाली गरी ११ जना नै अहिले अध्यागमनको हिरासतमा छन्।
तालिबानले सत्ता कब्जा गर्नुभन्दा पहिला नै उनीहरु उपचारको बाहनामा राजधानी काबुलबाट हवाई मार्ग हुँदै दिल्ली पुगेका थिए। दिल्लीमा उनीहरुले नक्कली राशन कार्ड समेत बनाएको पाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
