काठमाडौं- नेपाली कांग्रेसका पूर्वमहामन्त्री प्रकाशमान सिंहले सभापति शेरबहादुर देउवा र वरिष्ठ नेता रामचन्द्र पौडेलको नेतृत्वमा पार्टी चल्न नसक्ने बताएका छन्। उनले कांग्रेसलाई बलियो बनाउने हो भने नेतृत्व परिवर्तन गर्नुको विकल्प नभएको उनले बताए।
‘अब देउवा र पौडेलजीबाट पार्टी चल्न सक्दैन,’ सिन्धुलीको कमलामाईमा आयोजित कार्यक्रममा सिंहले भने, ‘पार्टी बलियो बनाएर देशको भविष्य सुन्दर बनाउन नेतृत्व परिवर्तनको विकल्प छैन।’
कांग्रेसमा नेतृत्व परिवर्तनका लागि मिसन र भिजनका साथ आफू प्रस्तुत भएको सिंहको दाबी छ। सिंहले आफूसँग कांग्रेस हाँक्ने दृढ इच्छाशक्ति, विचार र सही योजनाहरु रहेको बताए।
क्षणिक लाभका लागि पार्टी र देशको भविष्य बर्बाद हुनबाट जोगाउन उनले आग्रह समेत गरे। ‘बेथितिबाट कांग्रेस र देश चल्दैन,’ सिंहले भने, ‘पदको लोभ नगर्नुहोस्। पैसाको क्षणिक लाभ नहेर्नुहोस्। भविष्य हेर्नुहोस्। छोरा-नाति-पनातिको भविष्य हेर्नुहोस्। राम्रो नेता चुनेर पठाउनुहोस्। कांग्रेस बचाउनुहोस्।’
कांग्रेस कमजोर हुँदा देश र लोकतन्त्र नै कमजोर हुने उनकाे तर्क छ। कांग्रेस कमजोर हुँदा एमाले अध्यक्ष केपी शर्मा ओलीले दुई पटक प्रतिनिधि सभा विघटनको दुस्साहस गरेको सिंहको भनाइ छ। उनले भने, ‘कांग्रेस कमजोर भए कम्युनिस्टहरुले लोकतन्त्र नै फालिदिन्छन्।’
विगतमा कम्युनिस्टहरुले नसकेपछि कांग्रेसको नेतृत्वको सरकारको पालामा संविधान जारी भएको सिंहले स्मरण गरे। दुई तिहाई मत पाउँदा पनि ओली सरकार टिक्न नसकेको बताउँदै उनले भने, ‘कम्युनिस्टहरुले राजनीतिक स्थायित्व दिन सक्दैनन् भन्ने प्रमाण हो यो।भ्रष्टाचारमा प्रतिष्पर्धा गर्दा गर्दै सरकार ढलेको हो।’
ओलीलाई हावादारी गफमा कसैले जित्न नसक्ने उनको टिप्पणी छ। कम्युनिस्टहरुको लहलहैमा लाग्दा देश समस्यामा फसेको सिंहले बताए।
कार्यक्रममा नेपाली कांग्रेसका केन्द्रीय सदस्य गगन थापाले आगामी निर्वाचनमा कांग्रेस पहिलो दल बन्ने ठोकुवा गरे। उनले चुनावमा कांग्रेस एक्लै प्रतिष्पर्धामा उत्रनुपर्नेमा जोड दिए।
उनले भने, ‘पार्टीको १४औं महाधिवेशनको भोलिपल्टै हामी चारतारे झण्डा उचालेर स्थानीय तहको निर्वाचनमा जुट्नुपर्नेछ, कांग्रेसको स्वभाव नै एक्लै चुनाव लड्ने हो, कसैसँग मिलेर चुनाव लड्ने हाम्रो स्वभाव होइन।’
विगतमा गठबन्धनको केही प्रयास भएपनि सफल नभएको थापाले स्मरण गराए। थापाले भने, ‘हामीले पाएको मत भनेको ३१ लाख हो। पहिलो दल बन्नको लागि ४२ लाख मत चाहिन्छ। हाम्रा मतदातालाई कांग्रेस भनेको उहाँहरुको लागि एउटा विचार हो।’
थापाले अदालतमा अहिले ठूलो दंगा/फसाद परिरहेको टिप्पणी गरे। उनले भने, ‘कांग्रेस अदालतको विषयमा सही ठाउँमा उभिन सकेन र न्यायिक नेतृत्वमा आएको विचलनको विरुद्धमा कांग्रेस छ भन्ने बताएन भने ३० लाख मतदाताले कांग्रेस छोड्छ।’ उनले कांग्रेस महत्वपूर्ण विषयहरुमा स्पष्ट हुनुपर्ने बताए।
विगतमा चितवनमा आफ्ना मतादातो अर्को पार्टीलाई मत हाल्दा काठमाडौंमा कांग्रेसको मत घटेको थापाले स्मरण गरे। फेरि त्यस्तो अवस्था आउन दिन नहुने थापाको भनाइ छ।
उनले भने,‘ चितवनमा आफ्ना मतदाताको मत अर्को पार्टीलाई हाल्दा काठमाडौंमा कांग्रेसेको मतदाता घटे। त्यसैले न्यायालयको विषयमा कांग्रेसले सत्यको पक्षमा बोल्नुपर्छ।’
सिंहले आउँदो महाधिवेशनमा सभापति र थापाले महामन्त्रीमा उम्मेद्वारी घोषणा गरिसकेका छन्। काठमाडौंका सबै पालिकामा भएको अधिवेशनमा सिंह र थापाले गठबन्धन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791107799.jpeg)
-1786602170.png)
