एकीकृत समाजवादी ‘अवैध गर्भधारण’बाट जन्मिएको पार्टी, महाधिवेशनमा बोलाउन आवश्यक छैन : योगेश भट्टराई

राजनीति

नेपाल लाइभ बुधबार, कात्तिक १७, २०७८ १४:०४

काठमाडौं- नेकपा एमालेका सचिव योगेश भट्टराईले एमालेबाटै विभाजित भएर बनेको एकीकृत समाजवादीलाई अवैध गर्भधारणबाट जन्मिएको बताएका छन्। एमालेको राष्ट्रिय महाधिवेशनको उद्‌घाटन समारोहमा एकीकृत समाजवादीलाई नबोलाउने उनको भनाइ छ।

बुधबार दशौं राष्ट्रिय महाधिवेशनका सन्दर्भमा जानकारी दिन आयोजित पत्रकार सम्मेलनमा प्रेस विज्ञप्ति पढ्दै केन्द्रीय सदस्य सूर्य थापाले महाधिवेशनमा विभिन्न देशका भाइचारा सम्बन्ध भएका, मित्रवत सम्बन्ध भएका, दक्षिण एसियाका सत्तारुढ र प्रतिपक्षी पार्टी लगायतलाई महाधिवेशनमा सहभागिताका लागि निम्तो दिइएको जानकारी गराएका थिए। सोही क्रममा नेपालका सबै राजनीतिक दलहरुलाई पनि निम्ति दिइएको बताइएका थिए।

एमालेबाटै विभाजित भएको एकीकृत समाजवादीलाई बोलाइन्छ कि बोलाइँदैन भन्ने पत्रकारको प्रश्नमा भट्टराईले सो पार्टीको नाम नलिइकनै जवाफ दिएका थिए।

उनको भनाइ थियो- 'प्रमुख राजनीतिक दलहरुलाई हामी आमन्त्रण गर्छौं। त्यसको पहिचान र ठेगाना स्पष्ट छ। कतिपय स्पष्ट छैन। कतिपय राजनीतिक पार्टीसँगको कतिपय अवैध गर्भधारणबाट बनेका पार्टी छन्। त्यस्ता पार्टीलाई बोलाउन आवश्यक छैन। पहिचान भएका पार्टीलाई आमन्त्रण गरिन्छ।'

एमालेको दशौं राष्ट्रिय महाधिवेशन यही मंसिर १० देखि १२ सम्म चितवनमा आयोजना हुँदैछ। महाधिवेशनबाट नयाँ नेतृत्व चयन गरिनेछ। यसअघि पहिलो विधान महाधिवेशन असोज १५ देखि १७ सम्म गोदाबरीमा भएको थियो।

महाधिवेशनको भव्य ढंगले उद्घाटन हुने भट्टराईले बताए। उनले पाँच लाखको उपस्थिति हुने बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्रधानमन्‍त्री ओलीका बुवा अस्पताल भर्ना, फोक्सोमा समस्या

धरहरा चढ्न विद्यार्थी, ज्येष्ठ नागरिक र अपांगता भएका व्यक्तिलाई ५० प्रतिशत छुट

मानव बेचबिखन गर्न लागेको आरोपमा एक जना पक्राउ