काठमाडौं- बाँकेका नन्कुन्नी धोबी र निर्मला कुर्मीको हत्यासम्बन्धमा छानविन गर्न गठित छानविन समितिले सरकारलाई प्रतिवेदन बुझाएको छ। गृह मन्त्रालयका सहसचिव हिरालाल रेग्मीको संयोजकत्वमा गठित छानविन समितिले आइतबार कार्यवाहक प्रधानमन्त्री एवं गृहमन्त्री बालकृष्ण खाणलाई प्रतिवेदन बुझाएको हो।
प्रतिवेदन बुझ्दै कार्यवाहक प्रधानमन्त्री खाणले छानविनबाट निकालिएको निष्कर्ष कार्यान्वयनका लागि सम्बन्धित निकायमा पठाउने बताए। ‘छानविनको निष्कर्ष कार्यान्वयनका लागि सम्बन्धित निकायमा पठाउँछौँ। स्थलगत अध्ययन गरी प्रतिवेदन तयार गरेर बुझाएकोमा धन्यवाद,’ कार्यवाहक प्रधानमन्त्री खाणले भने।
समितिले प्रतिवेदनमा बाँकेको जानकी गाउँपालिका वडा नम्बर-२ नेवाजीकी नकुन्नी धोबीको घटनामा जिल्ला प्रहरी कार्यालय बाँकेमा माताप्रसाद धोबीले रामकुमार धोबी र इतवारी धोबी भन्ने लक्षिराम धोबीविरुद्ध जाहेरी दिएको उल्लेख छ। जाहेरीपछि अनुसन्धान भएर दुवै अभियुक्तविरुद्ध बाँके जिल्ला अदालतमा ज्यानसम्बन्धी कसुरमा अभियोगपत्र पेस गरी गत भदौ १९ गतेको आदेशबाट अभियुक्तहरू पुर्पक्षका लागि कारागारमा थुनामा रहेको र हाल मुद्दा विचाराधीन रहेको प्रतिवेदनमा उल्लेख छ।
हाल नेपालगञ्ज उपमहानगरपालिका वडा नम्बर १७ र साविक परस्पुर गाउँ विकास समिति वडा नम्बर ९ निवासी निर्मला कुर्मीलाई चार बिघा १० कठ्ठा जग्गा हडप्ने नियतले हत्या गरिएको छानविन समितिले प्रतिवेदनमा उल्लेख गरेको छ।
श्रीमान् महलु कुर्मीको २०६२ सालमा मृत्यु भएपछि निर्मला दुई छोराहरूसँग बस्दै आएकी थिइन्। दुई छोराको २०६६ मङ्सिरमा १० दिनमा फरकमा स्वास्थ्यमा अचानक समस्या आएर उपचारका क्रममा मृत्यु भएपछि निर्मलाका श्रीमान् महलु र जेठा छोरा रामसागरको नाममा रहेको घरजग्गाको लालपूर्जा र नागरिकता बादशाह कुर्मीले जिम्मा लिएपछि घरजग्गा खानका लागि लालपूर्जा खोसेर लगेको भन्दै बादशाहको विपक्षमा रहेकाले चर्को विरोध र धर्ना गरेको प्रतिवेदनमा उल्लेख छ। त्यसपछि बादशाहले विधिवत रूपमा जग्गाको लालपूर्जा जिल्ला प्रशासन कार्यालयमा बुझाएको देखिएको प्रतिवेदनमा उल्लेख छ।
त्यसपछि निर्मलाले आफूबाट विभिन्न समयमा ऋण लिएको देखाइ अदालतमा मुद्दा हाली नेपालगञ्ज धम्बोजी बस्ने पार्वती विष्टका नाममा २०६९ भदौ ६ गते जग्गा नामसारी गराएको र त्यसपछि विष्टको नामबाट रत्ना थापाको नाममा सारिएको देखिएको प्रतिवेदनमा उल्लेख छ। उक्त घटनामा समितिले बादशाहसहित आठ जना प्रारम्भिक चरणमा दोषी देखिए पनि बादशाहबाहेक अरु फरार रहेको प्रतिवेदनमा उल्लेख गरेको छ।
समितिले निर्मला कुर्मीको मुद्दामा सम्पत्ति हडप्ने नियतले किर्ते जालझेल आदि भएको विषयमा एवं बाँके जिल्लामा जग्गा किनबेच, हक, भोग, नामसारीलगायतमा छानविन गर्न सम्बन्धित निकायबाट विज्ञसहितको टोली गठन गर्न सिफारिस गरेको छ।
छानविन समितिमा प्रहरी उपरीक्षक रामप्रकाश शाह, उपअनुसन्धान निर्देशक वीरेन्द्रसिंह कार्की, उपसचिव रामप्रसाद लम्साल, जिल्ला प्रशासन कार्यालय बाँकेका प्रशासकीय अधिकृत अमरराज सेजुवाल र मोहम्मद शेर बागवान सदस्य थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768550561.png)
-1764146706.png)
-1768395492.png)
