काठमाडौं- काठमाडौं उपत्यकाका विभिन्न आठ स्थानमा शृंखलाबद्ध रुपमा चोरी गर्ने एक व्यक्ति पक्राउ परेका छन्। पक्राउ पर्नेमा रामेछापको दोरम्बा गाउँपालिका-४ घर भइ काठमाडौं कोटेश्वर बस्ने ३१ वर्षीय कमल थापामगर छन्।
उनलाई महानगरीय प्रहरी अपराध महाशाखाको टोलीले बिहीबार कोटेश्वरबाट पक्राउ गरेको हो। पक्राउ परेका थापामगरलाई थप अनुसन्धान र कारबाहीका लागि महानगरीय प्रहरी परिसर काठमाडौं पठाइएको महाशाखाका एसपी कृष्ण कोइरालाले जानकारी दिए।
उनको साथबाट प्रहरीले एक थान मोबाइल, चोरी गर्नका लागि ढोकाको ताला फोड्न प्रयोग गर्ने दुई थान रड, चोरी गर्दा लगाएको ज्याकेट एक थान, चोरी गर्दा प्रयोग गरिएको झोला एक थान र नगद दुई हजार रुपैयाँ बरामद गरेको छ।
काठमाडौं उपत्यकाभित्र रातको समयमा विभिन्न सहकारी तथा वित्तीय संघसंस्थाहरु र दिनको समयमा मानिसहरु घरमा नभएको मौका पारी ढोका फोडेर उनले नगद तथा सुनचाँदीका गरगहना चोरी गर्दै आएको प्रहरीले जनाएको छ।
गत साउन २१ गते सीतापाइलास्थित निर्मल गिरीको घरमा नगद तथा सुनचाँदीका गरगहनासहित तीन लाख ५८ हजार रुपैयाँ थापामगरले चोरी गरेका थिए।
त्यस्तै गत वर्षको मङ्सिर १९ गते रातको समयमा मुलपानीस्थित देवी बचत तथा ऋण सहकारी संस्थाबाट नगद तथा ल्यापटपसमेत गरी अन्दाजी २० लाख रुपैयाँ बराबरको धनमाल थापागरले चोरी गरेको प्रहरीले जनाएको छ।
यस्तै गत फागुन ७ गते तीनकुनेस्थित जुनार हिलटप सहकारी संस्थाबाट एक लाख ३७ हजार ५०० रुपैयाँ उनले चोरी गरेका थिए। २०७७ फागुन महिनामै स्वयम्भूस्थित रुपेश घलानको घरबाट नगद तथा सुनचाँदीका गरगहनासमेत गरी चार लाख ८० हजार रुपैयाँ बराबरको धनमाल थापामगरले नै चोरी गरेको प्रहरीले जनाएको छ। गत फागुनमै कागेश्वरी मनहरा-७ स्थित दिदी सहकारी संस्थाको मुलढोका फोडेर नगद दुई लाख १० हजार रुपैयाँ उनले चोरी गरेका थिए।
गत वैशाखमा सीतापाइलास्थित विश्वनाथ खनालको घरबाट नगद तथा सुनचाँदीको गरगहनासमेत गरी अन्दाजी तीन लाख १० हजार रुपैयाँ बराबरको धनमाल उनले चोरी गरेको आरोप लागेको छ।
त्यस्तै गत असार १९ गते सीतापाइला बुद्धटोलस्थित कृष्ण लामाको घरमा कोही नभएको मौका पारी नगद तथा सुन चाँदीका गरगहना गरी अन्दाजी चार लाख ३० हजार रुपैयाँ बराबरको धनमाल उनैले चोरी गरेको महाशाखाले जनाएको छ।
त्यसको पाँच दिनपछि असार २४ गते स्वयम्भूस्थित आरक्ष बचत तथा ऋण सहकारी संस्थाको ढोका फोडेर नगद तथा सुनचाँदीका गरगहनासमेत गरी करिब एक लाख २३ हजार रुपैयाँ बराबरको धनमाल थापामगरले चोरी गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
