तस्बिर: पत्रकार बीपी साहको फेसबुकबाट।
काठमाडौं– जनकपुरस्थित खानेपानी संस्थानका निमित्त प्रमुख राजेश कुशवाहालाई अर्धनग्न बनाएर नगर परिक्रमा गराउने सीके राउतका कार्यकर्तालाई मुद्दा चलाइने भएको छ।
राउत नेतृत्वको जनमत पार्टीका कार्यकर्ताविरुद्ध आपराधिक उपद्रव मुद्दा चलाउने तयारी भएको हो। धनुषाका प्रहरी उपरीक्षक (एसपी) प्रकाश रानाभाटले कुशवाहालाई अर्धनग्न बनाएर नगर परिक्रमा गराउनेहरुको पहिचान भइसकेको र पक्राउ गरेर मुद्दा चलाइने बताए।
कति जनाविरुद्ध मुद्दा चलाउने भन्ने अहिले नै यकिन भइनसकेको एसपी रानाभाटले बताए। ‘ठूलो संख्यामा रहेका राउत कार्यकर्ताले अर्धनग्न बनाएर नगर परिक्रमा गराएका भन्ने छ। तीमध्ये क–कसको भूमिका के छ? त्यो पहिचान भइसकेपछि मुद्दा चल्छ। अहिले नै यति जनाविरुद्ध भन्ने छैन।’
राउतका कार्यकर्ताले बिहीबार कुशवाहलाई अर्थनग्न बनाइ हिलो दलेर नगर घुमाएका थिए। त्यसको चौतर्फी विरोध समेत भएको थियो।
उनीहरुले जनकपुर उपमहानगरपालिकाका मेयर र प्रदेश सरकारविरुद्ध प्रदर्शन आयोजना गरेका थिए। राउत कार्यकर्ताले बाँसको भाटासहित जनकपुरको रामानन्द चोकमा रहेको खानेपानी संस्थानको कार्यालयमा पुगेर कुशवाहलाई नियन्त्रणमा लिएका थिए।
ठूलो समूहसहित पुगेका जनमत पार्टीका कार्यकर्ताले कुशवाहलाई अर्थनग्न बनाएर हातपातसमेत गरेका थिए। त्यसपछि हिलो दलेर नगर घुमाएका थिए।
नगर परिक्रमाका क्रममा उनीहरुले प्रदेश सरकार विरुद्ध नाराबाजी पनि गरेका थिए। उनीहरूले प्रदेश २ को सरकार, जनकपुर उपमहानगरपालिकाका मेयर तथा खानेपानी संस्थानको नेतृत्व भ्रष्टाचारमा डुबेको आरोप लगाउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
