बझाङ- लगातारको वर्षाका कारण जिल्लामा ठूलो जनधनको क्षति भएको छ। जिल्लाको खप्तडछान्ना गाउँपालिकामा अविरल वर्षापछि पहिरोमा परी चार जनाको ज्यान गएको छ।
मृत्यु हुनेमा खप्तडछान्ना गाउँपालिका-३ माझीगाउँका धर्म रोकाया र उनकी श्रमती रहेका छन्। त्यसैगरी वडा नम्बर ५ कालुखेतीका वीरु गिरी र उनकी श्रीमतीको पनि पहिरोले पुरिएर मृत्यु भएको छ।
लगातार परेको अविरल वर्षाका कारण घर बगाएपछि उनीहरुको पहिरोमा पुरिएर मृत्यु भएको स्थानीयले जनाएका छन्। उक्त गाउँपालिकामा अझ धेरै क्षति भएको हुनसक्ने र गाउँपालिकामा सञ्चार सेवा अवरुद्ध भएका कारण विवरण आउन नसकेको स्थानीय पर्पल रोकायाले बताए।
यस्तै जिल्लामा बाढी र पहिरोका कारण ठुलो क्षति भएको छ। जिल्लाको थलारा गाउँपालिका-४ डिख्ला गाउँमा गाउँमाथिबाट पहिरो खस्दा २३ जना बेपत्ता भएका छन्। त्यहाँ सात घर पूर्णरुपमा पुरिएको जिल्ला प्रहरी कार्यालय बझाङले जानकारी दिएको छ। यस्तै जिल्लाभरि १७० परिवार विस्थापित भएका जानकारी दिइएको छ।
थलारा गाउँपालिका-४ डिख्ला गाउँमा पीडितहरुको उद्धारका लागि नेपाली सेनाको हेलिकप्टर परिचालन गरिएको छ। घटना घटेको ३० घण्टापछिमात्र औषधि र राहत लिएर नेपाली सेनाको हेलिकप्टर प्रभावित क्षेत्रमा आइपुगेको हो। अहिले प्रभावितहरुलाई राहत वितरण तथा बेपत्ता भएकाहरुको खोजी भइरहेको जिल्ला प्रहरी कार्यालय बझाङले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
