फाइल तस्बिर
काठमाडौं- सर्वोच्च अदालतले शुक्रबार माइतीघर मण्डलाबाट पक्राउ परेकी नेपालगञ्जकी रुवी खानलाई जिल्ला प्रहरी कार्यालय बाँकेको हिरासतबाट अन्यत्र नसार्न आदेश दिएको छ।
खानका तर्फबाट अधिवक्ता मोहना अन्सारीले दिएको बन्दी प्रत्यक्षीकरण रिटमा आज सर्वोच्चले यस्तो आदेश दिएको हो। सर्वोच्चका न्यायाधीश आनन्दमोहन भट्टराईको इजलासले खानलाई २८ गते बिहीबार ११ बजे अदालतमा उपस्थित गराउन आदेश दिएको छ।
'..निवेदकको मागबमोजिमको आदेश किन जारी हुन नपर्ने हो? आदेश जारी हुनु नपर्ने आधार र कारण भए सोसमेत साथै राखी विपक्षी नं. २ र ३ बाट लिखित जवाफ प्राप्त भइसकेकोले उनीहरुबाहेक अन्य विपक्षीहरुको हकमा २०७८/०६/२८ गते सुनुवाइ हुने हुँदा महान्यायाधिवक्ताको कार्यालयमार्फत् लिखित जवाफ र बन्दीसहित सोही दिन दिनको ११:०० बजे उपस्थित हुन र प्रस्तुत निवेदनको सुनुवाइ नभएसम्म यी निवेदिकालाई जिल्ला प्रहरी कार्यालय बाँकेको हिरासतबाट यस अदालतमा उपस्थित गराउनेबाहेक अन्य प्रयोजनका लागि अन्यत्र स्थान्तर नगर्नू,' आदेशमा भनिएको छ।
यसअघि आइतबार सर्वोच्चले २४ घण्टाभित्र सशरीर अदालतमा उपस्थित गराउन प्रहरीलाई आदेश जारी गरेको थियो।
न्यायको खोजीमा नेपालगञ्जबाट २० दिन हिँडेर काठमाडौं आएका ११ महिलासहितको १४ जनाको टोलीलाई माइतीघरमा शुक्रबार साँझ धर्ना बसिरहेको बेला प्रहरीले नियन्त्रणमा लिएको थियो। उनलाई बहुविवाहको मुद्दामा रातारात नेपालगञ्ज पुर्याएको थियो।
पक्राउपछि रुवीको अवस्था अज्ञात भएको भन्दै अधिवक्ता अन्सारीले बन्दी प्रत्यक्षीकरणको निवेदन दर्ता गराएकी थिइन्। निवेदनमाथि सुनुवाइ गर्दै सर्वोच्च अदालतले आइतबार प्रहरी वृत्त लैनचौर काठमाडौंमाथि २४ घण्टाभित्र सशरीर अदालतमा उपस्थित गराउन आदेश जारी गरेको थियो। न्यायाधीश दीपककुमार कार्कीको एकल इजलासले महानगरीय प्रहरी वृत्त लैनचौरलाई कारण देखाऊ आदेश जारी गर्दै बन्दीसहित उपस्थित हुन भनेको थियो।
बाँकेको नेपालगञ्ज उपमहानगरपालिका-७ का स्थायी बासिन्दा रुवीलाई शुक्रबार राति प्रहरीले पक्राउ गरेपछि उनको अवस्था सार्वजनिक गर्न माग गर्दै शनिबार र आइतबार माइतीघरमा प्रदर्शनसमेत भएको थियो। प्रहरीले उनलाई पुरानो मुद्दामा नेपालगञ्ज लगेको सूचना गोप्य राखेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
