फाइल तस्बिर
काठमाडौं- लिटिल बुद्ध उर्फ रामबहादुर बम्जन विगत डेढ वर्षदेखि नेपाल प्रहरीको ‘मस्ट वाण्टेड’ (सर्वाधिक खोजी) सूचीमा छन्। आफ्नै आश्रमका आनीलाई बलात्कार गरेको आरोपमा २०७६ माघ २३ गते जिल्ला अदालत सर्लाहीबाट पक्राउ पुर्जी जारी भएसँगै उनी प्रहरीको सर्वाधिक खोजी सूचीमा परेका थिए।
पक्राउ पुर्जी जारी भएसँगै बम्जनको व्यापक खोजी जारी राखे पनि डेढ वर्ष बितिसक्दासमेत उनको सुइँकोसम्म प्रहरीले पाउन सकेको छैन। उनी कहाँ छन्, के गरेर बसेका छन् भन्ने विषयमा अहिलेसम्म प्रहरीले केलाउन सकेको छैन।
प्रहरीले बम्जनलाई पक्राउ गर्न भनेर महिनौं लगाएर गरेको अनुसन्धान र अपरेसनसमेत पटक-पटक फेल खाएका छन्। लोकल प्रहरीदेखि अनुसन्धानको विशिष्टीकृत एकाइसम्मले बम्जनको पक्राउको अपरेसन गरे पनि त्यो सफल हुन सकेको छैन। यद्यपि, उनीमाथिको निगरानी र खोजी भने जारी रहेको प्रहरीले बताउँदै आएको छ। केन्द्रीय अनुसन्धान ब्यूरो सीआईबीका निर्देशक तथा डीआईजी धीरजप्रताप सिंह बम्जनको अवस्थाबारे प्रहरीले सूक्ष्म रुपमा निगरानी गरिरहेको बताउँछन्। ‘बम्जनको खोजी जारी छ। तर, अहिलेसम्म केही पत्ता लगाउन सकिएको छैन। आश्रममा बाहिरी मान्छेसमेत छिर्न समस्या हुने भएकाले उनको खोजीमा पनि जटिलता भइरहेको छ,’ डीआईजी सिंह भन्छन्।
उनलाई पक्राउ गर्न भनेर सीआईबीले मात्रै तीन पटक अपरेसन गरेको थियो। तर, तीनवटै अपरेसन फेल भएका थिए। सिन्धुली सदरमुकामबाट पाँच किलोमिटर पश्चिमतर्फको घना जङ्गलमा करिब ४० बिघा जमिन बोधीमार्ग दर्शनमैत्री धर्मको नाममा बम्जनको आश्रम छ।
रामबहादुर बम्जन
त्यही बोधीमार्ग धर्मका अनुयायीहरुलाई बम्जनले प्रशिक्षण दिँदै आएका थिए। यो सूचना पाएपछि सीआईबीले चार महिनादेखि गत वर्षको असार ४ गते साता अपरेसन गरेको थियो। तर प्रहरी सफल हुन सकेको थिएन। करिब १० घण्टा लामो अपरेसन गरे पनि प्रहरी सफल हुन सकेको थिएन। कुकुरदेखि अत्याधुनिक मेसिनसमेतको सहयोगमा बम्जनको खोजी भए पनि प्रहरी रित्तो हात फर्किएको थियो।
कानुनी प्रावधानअनुसार पीडित १८ वर्ष पूरा भएको एक वर्षभित्र मुद्दा दर्ता गरिसक्नुपर्ने भएकाले अब बम्जनलाई फरार आरोपी बनाएरै भए पनि प्रहरीले जिल्ला अदालत सर्लाहीमा २०७७ असार १९ गते मुद्दा दायर गरिसकेको छ।
तीन पटक अपरेसन गर्दा पनि बम्जन फेला नपरेपछि उनलाई पक्राउ गर्न भनेर प्रहरी हेडक्वार्टरले ७७ जिल्ला प्रहरी कार्यालयलाई सर्कुलर नै गरेको थियो। तर अहिलेसम्म पनि बम्जनको कुनै गतिविधि फेला नपरेपछि प्रहरी अधिकारीहरु उनी भारत प्रवेश गरेको हुनसक्ने आशंका गर्छन्। एक प्रहरी अधिकृतले नेपाल लाइभलाई सुनाए, ‘अहिलेसम्म पनि केही शंकास्पद गतिविधि नदेखिएकाले उनी भारत नै छिरे कि भन्ने हाम्रो आशंका छ। यद्यपि, उनका अनुयायीहरु भने ध्यानमा रहेको भन्ने जवाफ दिने गरेका छन्।’
मुलुकी अपराधसंहिता २०७४ नआएको भए सम्भवत: बम्जनविरुद्ध जबरजस्ती करणीको मुद्दा लाग्ने थिएन। उनीमाथि लागेको आरोपले एक वर्ष नाघिसकेको थियो। तर मुलुकी अपराध संहितामा जबर्जस्ती करणी मुद्दामा पीडित नाबालिका भएको अवस्थामा १८ वर्ष उमेर पुगेको एक वर्षभित्र मुद्दा दायर गरिसक्नुपर्ने प्रावधान छ।
सोही प्रावधानमा टेकेर २०७६ माघ २३ गते जबरजस्ती करणी गरेको कसुरमा जिल्ला अदालत सर्लाहीबाट बम्जनविरुद्ध पक्राउ पुर्जी जारी भएको थियो। अनुसन्धान प्रक्रिया अनुसार पुर्जी जारी भएपछि पक्राउ गरी बयान लिने काम प्रहरीको हो। तर बम्जन पक्राउ नपरेकाले बयान लिन प्रहरी असफल भएको थियो।
फाइल तस्बिर: बम्जनको आश्रममा तालिमप्राप्त कुकुर लगाएर अनुसन्धान गर्दै प्रहरी।
कानुनी प्रावधानअनुसार पीडित १८ वर्ष पूरा भएको एक वर्षभित्र मुद्दा दर्ता गरिसक्नुपर्ने भएकाले अब बम्जनलाई फरार आरोपी बनाएरै भए पनि प्रहरीले जिल्ला अदालत सर्लाहीमा २०७७ असार १९ गते मुद्दा दायर गरिसकेको छ। मुद्दा दर्ता भइसकेपछि अदालतमा उपस्थित भएर बम्जन आफैंले आफूमाथि लागेको आरोपको प्रतिवाद गर्नुपर्ने भए पनि उनी अदालतमासमेत उपस्थित भएका छैनन्। उनी अदालतमा उपस्थित नभए पनि अदालतले भने मुद्दाको प्रक्रिया अघि बढाइरहेको छ।
बम्जनमाथि बलात्कारका साथै व्यक्ति बेपत्ता पारेको आरोप पनि लागेको छ। आनीहरू सर्लाहीकी रीता बोट, नुवोकोटकी कर्मा तामाङ र मकवानपुरकी फूलमाया रूम्बा बम्जन आश्रमबाट बेपत्ता भएको र उनलाई बम्जनले बेपत्ता पारेको आरोप छ। बम्जनमाथि हत्यामा संलग्न रहेको आशंकामा पनि अनुसन्धान भएको थियो। सीआईबीको टोलीले बम्जनको सिन्धुपाल्चोक आश्रमस्थलमा पुगेर अनुयायीको हत्या गरेर शव गाडेको आशंकामा खोजी गर्दा एक खाल्डोमा नूनको पोका फेला परेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779449565.png)
-1764146706.png)
