काठमाडौं– कोभिडका कारण बन्द रहेका सिनेमा हल साढे ५ महिनापछि सञ्चालनमा आएयता पहिलो पटक नेपाली फिल्म प्रदर्शन भएको छ। करिब दुई वर्षदेखि सिनेमा हलमा नेपाली फिल्म प्रदर्शन हुन सकेका थिएनन्। आजबाट भने सिनेमा हलमा नेपाली फिल्मको प्रदर्शन सुरु भएको छ।
‘डाँडाको वरपिपल’ र ‘धन्धागिरी’को प्रदर्शनसँगै आजबाट सिनेमा हलमा नेपाली फिल्म सुरु भएका हुन्। २१ असोजबाट खुलेका सिनेमा हलमा अंग्रेजी फिल्मको प्रदर्शन गरिएको थियो भने आज असोज २६ बाट भने नेपाली फिल्मको प्रदर्शन सुरु भएको छ।
सोमबार सोभित बस्नेतले निर्देशन गरेको फिल्म ‘डाँडाको वरपिपल’को प्रिमियर भएको थियो। मंगलबारबाट उक्त फिल्म देशैभर प्रदर्शन हुँदै छ। बस्नेतको निर्देशनमा बनेको यो फिल्ममा जातका कारण प्रेममा भएको अवरोध र त्यसले सिर्जना गरेका अफ्ठ्याराको कथालाई समेटिएको छ। फिल्ममा शिव श्रेष्ठ, गौरी मल्ल, भुवन केसी, सलोन बस्नेत, रुविना थापालगायतको अभिनय रहेको छ।
त्यस्तै, नरेन्द्र भट्टराईले निर्देशन गरेको ‘धन्धागिरी’ पनि आजबाट देशभर प्रदर्शन हुँदै छ। देवराज प्रशाई, मुकुन्द घिमिरे, रमेश तामाङ र बसन्त रुम्बाले संयुक्त रुपमा निर्माण गरेको उक्त फिल्म एक्सन विद्याको फिल्म हो। फिल्ममा दिनेश डिसी, छुल्ठिम गुरुङ, रविन श्रेष्ठ, दिनेश खड्का, बिएस राना, फुर्वा दोर्जो तामाङलगायतको अभिनय रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
