बलिउड र लागु औषधको सम्बन्ध किन बाहिर आउँदैन?

फिचर

इकबाल परवेज बिहीबार, असोज २१, २०७८ ०७:०५

काठमाडौं– बलिउडमा एकपटक फेरि ड्रग्स (लागु औषध)को चर्चा चुलिएको छ। विगतमा जस्तो यसपटक यो मुद्दामा प्रत्यक्ष रुपमा बलिउडका कुनै स्टार सामेल छैनन्। तर, बलिउडका ‘बादशाह’ भनिने शाहरुख खानका छोरा आर्यन ड्रग्ससहित पक्राउ परेका छन्।

शनिबार (२ अक्टुबर)मा भारतको लागु औषध नियन्त्रण निकाय (एनसीबी)ले आधा रातमा मुम्बईबाट गोवा जाँदै गरेको एक जहाज (क्रुज)मा छापा मारेको थियो। एनसीबीले यो घटनामा शाहरुख खानका छोरा आर्यन खानसहित अन्य ८ जनालाई हिरासतमा लिएको छ। यीमध्ये आर्यनसहित अन्य तीनविरुद्ध अनुसन्धान प्रक्रिया अगाडि बढाइएको छ।

अदालतले सोमबार आर्यनसहित अन्य तीन अभियुक्तलाई हिरासतमा राख्ने अवधि ७ अक्टोबरसम्म बढाएको छ। आर्यनका वकिलले बताएअनुसार एनसीबीले उनीसँग कुनै पनि किसिमको लागु औषध फेला पारेको छैन।

अर्कातिर, एनसीबीले भने आर्यनको साथमा लागु औषध भेटिएको दाबी गरेको छ।

आर्यन खानको जमानतको विषयलाई लिएर मुम्बई अदालतमा सुनुवाइ हुँदा आर्यनका वकिल सतीश मानशिन्देले म्यासेज च्याटको आधारमा गिरफ्तार गरिएकाले आर्यनलाई रिहा गरिनुपर्ने जिकिर गरेका थिए। ‘आर्यन पार्टीमा आफैं पुगेका थिएनन्, उनलाई बोलाइएको थियो। आर्यनसँग पास टिकट पनि थिएन, न एनसीबीले आर्यनको ब्यागबाट केही फेला पारेको छ,’ आर्यनका वकिल मानशिन्देको भनाइ छ।

एनसीबीको टोलीले आइतबार आर्यनसँगै अरबाज मर्चेन्ट र मुममुन धमेचालाई एक दिनका लागि हिरासतमा पठाएको थियो। उनीहरुलाई जमानतमा रिहा गरिनुपर्ने मागसहित परेका याचिकामा सोमबार सुनुवाइ भएको थियो। तर, अदालतले रिहा नगरी ७ अक्टोबरसम्म हिरासतमा राखेर अनुसन्धान गर्न अनुमति दियो।

आर्यनसहितका ३ अभियुक्तहरुको मोबाइल फोनबाट लागु औषधको बिक्री गर्ने व्यक्तिसँग भएको कुराकानीको च्याट भेटिएको एनसीबीको दाबी छ। जसकारण उनीहरुलाई हिरासतमा लिएर सोधपुछ भइरहेको छ। सँगै सबै अभियुक्त एकअर्कासँगको सम्पर्क र समन्धमा रहेको एनसीबीले जनाएको छ।

आर्यनभन्दा पहिले बलिउडमा ड्रग्सको कहानी
बलिउडमा पटक–पटक ड्रग्ससँग जोडिएका घटनाहरु बाहिरिरहेका हुन्छन्। शाहरुखका छोरा आर्यनसँगको यो मुद्दा पहिलो होइन्, यसअघि थुप्रै यस्ता घटनाहरु बाहिरिएका छन्।

अभिनेता सुशान्त सिंह राजपुतको मुत्युको अनुसन्धान लागु औषधसम्म पुगेको थियो। लागु औषध सँगको सम्बन्धलाई लिएर पहिले रिया चक्रवर्ती (सुशान्तकी प्रेमिका)का भाइ शौविक चक्रवर्ती र पछि रिहा आफैं पनि हिरासतमा पुगेकी थिइन्।

रिया चक्रवर्तीको विरुद्धमा अभिनेता सुशान्त सिंह राजपुतको मृत्युको विषयमा पनि मुद्दा दर्ता भएको छ, जसमा अहिले पनि सीबीआईले अुनसन्धान गरिरहेको छ।

एनसीबीले अनुसन्धान गरेपछि बलिउडमा लागु औषधको प्रयोगको विषयलाई लिएर ठूलो बहस सिर्जना भएको थियो। भारतीय राज्य सभामा समाजवादी पार्टीकी सांसद जया बच्चनले शून्य समयमा केही मानिसका कारण बलिउड क्षेत्रलाई नै खराब भन्न नमिल्ने बताएकी थिइन्।

भारतीय जनता पार्टीका सांसद रवि किशनले लोकसभामा फिल्म क्षेत्रमा भइरहेको लागु औषधको प्रयोगको विषयलाई उठाएका थिए। सँगै यो किसिमको अपराधमा संलग्नलाई कडा कारबाही गर्न माग गरेका थिए।

लागु औषधको विषय बाहिरिएसँगै अभिनेत्री कंगना रौनतले बलिउडका ९९ प्रतिशतले नशा गर्ने बताएकी थिइन्। अर्कातिर रवीना टण्डनले कंगनालाई ‘टोकरीमा केही स्याउ कुहिएको हुँदा सबै स्याउ नकुहिने’ भन्दै कटाक्ष गरेकी थिइन्।

कंगनाको आरोप
अभिनेत्री कंगना रौनतले बलिउडसँग जोडिएकामध्ये ९९ प्रतिशत व्यक्तिहरुले कुनै न कुनै प्रकारको लागु औषध प्रयोग गर्ने गरेको बताएकी थिइन्।

मुम्बई प्रहरीले लागु औषधको विषयलाई लिएर कंगनामाथि पनि अनुसन्धान गरिरहेको छ। कंगनाका नजिकका साथी अध्ययन सुमनको बयानका कारण उनीमाथि अनुसन्धान भइरहेको छ। उक्त बयानमा सुमनले कंगनाले जबर्जस्ती ड्रग्स सेवन गराउने कोसिस गरेको आरोप लगाएका छन्।

कंगना आफैंले इन्स्टाग्राममा राखेको एक भिडियोमा उनी आफैंले ड्रग्स सेवन गर्ने गरेको बताएकी थिइन्। उक्त भिडियो निकै भाइरल पनि भएको थियो।

यसबीच बलिउडमा कैयौं हस्तीहरुमा एनसीबीले नजर राखिरहेको रिपोर्ट सार्वजनिक भएको थियो। एनसीबीका उपप्रमुख केपीएस मल्होत्राले यसअघि नै भनेका थिए, ‘हामी यो विषयमा अनुसन्धान गरिरहेका छौं। अनुसन्धानमा केही मानिसको नाम संलग्न देखिएको छ। मिडियामा ती मान्छेलाई लिएर भनिएका कुराहरु अनुमान मात्रै हुन्। तर, ज–जसको नाम आएको छ, उनीहरुको अनुसन्धान भइरहेकाले अहिले नै ती नाम सार्वजनिक गर्न सक्दैनौं।’

केपीएस मल्होत्राका अनुसार अनुसन्धानमा लागु औषध कारोबारी तथा यसको प्रयोग गर्ने फिल्म कलाकारलाई पत्ता लगाउने कोसिस भइरहेको छ। लागु औषधको जालोलाई बलिउडमा थप फैलिनबाट रोक्न थप अनुसन्धान भइरहेको केपीएस मल्होत्राले बताएका छन्।

तर, यो विषयमा बलिउडका हस्तीहरुको भने मौनता छ। उनीहरु केही बोलेका छैनन्। भारतीय सञ्चारमाध्यमका अनुसार धेरै बलिउड अभिनेता/अभिनेत्रीलाई सम्पर्क गर्दा पनि उनीहरु केही बोल्न चाहेका छैनन्।

शर्लिन चोपडाको दाबी
बलिउडकी अर्की अभिनेत्री शर्लिन चोपडाले ड्रग्स सेवन गर्ने कुरा स्वीकार्दै कंगना रौनतले जस्तै आरोप लगाएकी थिइन्। उनले भनेकी थिइन्, ‘मलाई विश्वास गर्ने हो भने बलिउठमा पाँच प्रतिशत मान्छे मात्रै छन्, जसले नशा गर्दैनन्।’

शर्लिनको यो दाबी अनुमानको भरमा गरेको देखिन्छ। किनकि, अहिलेसम्म बलिउडका कुनै पनि मानिसहरुले लागु औषधको सेवन व्यापक रुपमा गरिरहेको भन्ने कुरा कुनै पनि अनुसन्धानबाट खुलेको छैन।

तर, शर्लिनले भनेकी छिन्, ‘सुरुवातमा मलाई फिल्ममेकरहरु पार्टीमा बोलाउँथे। मलाई त्यहाँ जाँदा सम्बन्ध विस्तार हुन्छ भन्ने लाग्थ्यो। मान्छेसँग चिनजान हुँदा काम पाउन पनि सहज होला भन्ने थियो। तर, जब मैले बलिउडका पार्टीहरुमा सम्बन्ध विस्तार गर्ने कम र लागु औषधको नशा धेरै हुने थाहा पाए, तब म त्यस्ता पार्टीमा जान छाडिदिएँ।’

एनसीबीका उपप्रमुख मल्होत्राका अनुसार लुकिछिपी लागु औषध सेवन गरेको विषयलाई लिएर यसअघि पनि उजुरीहरु परेका थिए। उनले भने, ‘एक पटक जब यो विषय बाहिर आउँछन्, तब एजेन्सीहरुलाई यस्ता विषयको उजुरी पनि आउँछ। एजेन्सीले अनुसन्धान गर्न थाल्छ। यो मुद्दामा पनि यस्तै भइरहेको छ। अनुसन्धानबाट लागु औषधको सेवन र कारोबारमा जो संलग्न देखिन्छ, उनीहरुलाई कारबाही हुन्छ।’

तर, शर्लिन भने अनुसन्धानबाट केही नहुने बताउँछिन्। उनले भनेकी छिन्, ‘एनसीबीको अनुसन्धानबाट यसको सेवन तथा व्यापार गर्नेहरुको नाम बाहिर त आउँछ। तर, नाम आएका मानिसहरु केही समयलाई लुक्नेछन्। त्यससछि यो विषय पनि विस्तारै सेलाउँदै गएर हराउँछ। तब उनीहरु बाहिर आएर फेरि आफ्नो काममा फर्किनेछन्।’

बलिउडका चर्चित लागु औषध घटना
बलिउडमा कैयौं पटक लागु औषधको प्रयोग र विभिन्न नशा गरेको घटनाहरु बाहिरिएका छन्। तर, आधिकारिक रुपमा भएका अनुसन्धानमा यी कुराहरु पुष्टि भएका छैनन्। केही बलिउड सेलिब्रेटीहरुलाई मात्रै यो विषयमा जेल जानु परेको छ भने थोरैले मात्रै पुनःस्थापना केन्द्र पुग्नु परेको छ।

सञ्जय दत्त
अभिनेता सञ्जय दत्तको विषय यसमा सबैभन्दा माथि छ। बलिउडमा सबैभन्दा चर्चित घटना नै सञ्जय दत्तको ड्रग्सको मुद्दा हो। उनका बुवा सुनील दत्तले उनलाई पुनःस्थापना केन्द्रमा राखेका थिए। केन्द्रबाट फर्किएपछि सञ्जय दत्त पुनः बलिउडमै फर्किए।

दत्तको जीवनमा आधारित फिल्म ‘सञ्जु’मा पनि उनले लागु औषध प्रयोग गर्ने विषयको बयान गरिएको छ।

प्रतीक बब्बर
राज बब्बर र स्मिता पाटिलका छोरा प्रतिक बब्बरले १३ वर्षको उमेरमै लागु औषधको प्रयोग गर्न सुरु गरेको स्वीकारेका थिए। उनलाई पुनःस्थापना केन्द्रमै लगेर लागु औषधको सेवनबाट छुटाइएको थियो। लागु औषधको प्रयोग र यसको भूमरीबाट निस्किएर पुनः सामान्य जीवनमा फर्किन पाएकोमा बब्बर आफूलाई भाग्यमानी समेत ठान्छन्।

फरदीन खान
फिरोज खानका छोरा फरदीन खानलाई सन् २००१ मा मुम्बई प्रहरीले लागु औषधसहित पक्राउ गरेको थियो। खानको यो मुद्दा अदालतसम्म पुग्यो, जहाँ उनले पुनःस्थापना केन्द्र गएर आफ्नो उपचार गराउने बताएका थिए। आफू लागु औषधबाट छुट्कारा पाउन पुनःस्थापना केन्द्र जाने बताएपछि खानलाई अदालतले कुनै पनि किसिमको सजाय तोकेको थिएन्।

डीजे अकिल
सञ्जय खानका ज्वाइँ डिजे अकिललाई सन् २००७ मा दुबईमा लागु औषधको मुद्दामा हिरासतमा लिइएको थियो। तर, उनीविरुद्ध कुनै पनि किसिमको प्रमाण नभएपछि उनलाई यो आरोपबाट मुक्त गरिएको थियो।

विजय राज
बलिउडका चर्चित अभिनेता विजय राजलाई सन् २००५ मा दुबईमा लागु औषधको प्रयोग गरेको आरोपमा पक्राउ गरिएको थियो। विजय त्यति बेला आफ्नो फिल्म ‘दीवाने हुए पागल’को छायाङ्कनका लागि दुबई पुगेका थिए।

विजयले आफूमाथि लागेको यो आरोपलाई आजसम्म खण्डन गर्दै आएका छन्।

राहुल महाजन
भारतीय जनता पार्टीका चर्चित नेता प्रमोद महाजन र भारतीय टेलिभिजन रियालिटि शो ‘बिग बोस’मार्फत चर्चामा आएका राहुल महाजनको नाम पनि एक समय लागु औषधसँग जोडिएको थियो। उनीविरुद्ध लागु औषधको सेवन गरेको आरोप थियो, जुन पुष्टि भएपछि उनी जेल समेत जानु परेको थियो। लागु औषधको ओभर डोजका कारण उनको स्वास्थ्यमा समस्या हुँदा उनलाई गम्भीर हालतमा अस्पताल पुर्‍याइएको बताइएको थियो।

तर, महाजनले भने आजसम्म पनि यो मुद्दालाई गलत भएको बताउँदै आएका छन्।

कस्ता पार्टीमा हुन्छ लागु औषधको सेवन?
मुम्बईका फिल्म स्टारहरुका पार्टी कैयौं किसिमका हुन्छन्, जहाँ फरक–फरक प्रकारले मनोरञ्जन गरिन्छ।

कहिले फिल्मको सफलताको नाममा त कहिले फिल्मको शुभ मुहुर्तको नाममा पार्टीको आयोजना गरिन्छ। यस्ता पार्टीमा फिल्मको टोलीसँगै सञ्चारमाध्यमका प्रतिनिधिहरु पनि सहभागी हुन्छन्। यस्ता पार्टीका धेरै फिल्म स्टारहरु उपस्थित हुन्छन्।

यो किसिमका पार्टीहरुमा रक्सीको व्यवस्था हुन्छ, तर लागु औषध हुँदैन। सञ्चारमाध्यमको उपस्थितिमा बलिउडका कलाकारहरुले आफ्नो जन्मदिन पनि मनाउँछन। तर, त्यहाँ पनि लागु औषध वा कुनै नशालु पदार्थको व्यवस्था गरिएको हुँदैन।

त्यसो भए कहाँ हुन्छ त लागु औषध? कस्ता पार्टीमा यसको सेवन गरिन्छ?

फिल्म स्टारहरुले सार्वजनिक पार्टीबाहेक व्यक्तिगत रुपमा ‘प्राइभेट पार्टी’ पनि आयोजना गर्छन्। यस्ता पार्टीहरुमा मिडियाको उपस्थिति हुँदैन। यस बाहेक डिस्को तथा पबहरुमा पनि बलिउडका स्टारहरुको निकै धेरै पार्टीहरु हुन्छन्। सँगै मुम्बईमा रेव पार्टी पनि निकै चर्चित छ।

बलिउडमा हुने नशाको प्रयोग र यसको सम्बन्ध बेला बेला दुनियाँ सामु प्रस्तुत हुन्छ। तर, धेरै जसो समय भने यो गुपचुप नै रहिरहन्छ।

-बीबीसी हिन्दीबाट

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।