काठमाडौं- नेपाली कांग्रेसका महामन्त्रीका उम्मेदवार गगन थापाले सडकदेखि सदनसम्म बोल्दा नागरिकलाई भरोसा दिनसक्ने नेतृत्व कांग्रेसलाई चाहिएको बताएका छन्।
काठमाडौंको राष्ट्रिय सभा गृहमा काठमाडौं महानगरको नगर अधिवेशनलाई शनिबार सम्बोधन गर्दै थापाले तलदेखि माथिसम्मको नेतृत्व त्यस खालको हुनुपर्ने बताएका हुन्।
उनले संविधानले नागरिकका लागि धेरै वाचा गरेको भन्दै कांग्रेसले त्यसलाई पूरा गर्छ भनेर भरोसा दिलाउन सक्नुपर्ने बताए। 'यो भन्न सक्ने कांग्रेस आयो भने मात्रै यो राज्य व्यवस्था र प्रणाली जोगिन्छ। कांग्रेसले भनेर मात्रै हुँदैन। भन्ने भनेको कसले हो? कसको मुखबाट भन्ने हो? पार्टीको नेतृत्वको मुखबाट भन्ने हो', उनले भने, 'अब हामीलाई यस्तो नेतृत्व चाहिएको छ। जसले खुलामञ्च, संसद्, सडक, पार्टीको साथीको झुपडीमा उभिएर बोल्दै गर्दा, कांग्रेस छ, कांग्रेसले गर्छ भन्दै गर्दा आम नागरिकलाई बोलेको कुरामा भरोसा दिलाउन सक्ने कांग्रेसको नेतृत्व हामीले यो अधिवेशनबाट बाहिर ल्याउन सक्नुपर्छ।'
थापाले वडा, महानगर वा जहाँ निर्णय गरे पनि प्रत्येक निर्णयले अर्थ बोकेको हुने स्मरण गराए। उनले सहभागीलाई प्रश्न गरे, 'पार्टीभित्र परिवर्तन चाहन्छौं कि चाहँदैनौं? आज कांग्रेस जसरी चलिरहेको छ, यो ठीक छ? यो यथास्थितिलाई हामी जोगाउन चाहन्छौं? वा पार्टीभित्र एउटा ठूलो परिवर्तन चाहिएको छ भन्ने आम जनता र पार्टीका साथीहरुको तर्फबाट आएको सन्देशलाई यस्ता सम्मेलनको निर्णयबाट व्यक्त गर्न चाहन्छौं? हाम्रो अगाडिको प्रश्न यो हो।'
थापाले कांग्रेस अहिले जसरी चलेको छ, त्यसले दुःखित भएर बसेका, अभावमा, रिक्ततामा, छलपटाहटमा बसेका नेपाली जनतालाई भरोसा दिलाउन नसक्ने बताए। 'कांग्रेसभित्र ठूलो सुधारको खाँचो छ। ठूलो शुद्धीकरणको खाँचो छ। कांग्रेसलाई शुद्ध बनाउनुपर्ने छ, सुदृढ बनाउनुपर्ने छ। त्यसका लागि यो अधिवेशनलाई प्रयोग गर्नुपर्ने छ', उनले भने, 'त्यसैले वडा, महानगर लगायत तमाम अधिवेशनबाट कांग्रेसलाई सुधारतर्फ लिएर जाने, सुदृढ बाटोमा लिएर जाने तर्फ संकेत गरोस्। त्यसले एक कदम भने पनि अगाडि बढाओस्।'
काठमाडौं महानगरको सभापतिका लागि नीलकाजी शाक्य र प्रगतिमान रञ्जितले उम्मेदवारी घोषणा गरेका छन्। शाक्यलाई प्रकाशमान सिंह र गगन थापाको समर्थन छ। त्यस्तै, रञ्जितलाई कांग्रेसका केन्द्रीय सभापति शेरबहादुर देउवा र पूर्वमहामन्त्री कृष्णप्रसाद सिटौलाको साथ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768981471.jpg)
-1764146706.png)
