मंसिरमा महाधिवेशन हुन्छ भनेर ढुक्क हुने अवस्था छैन: गगन थापा

महाधिवेशन विशेष

नेपाल लाइभ बिहीबार, असोज ७, २०७८ १७:३७

काठमाडौं– नेपाली कांग्रेसका नेता गगन थापाले महाधिवेशनको कार्यतालिका पुनः परिवर्तन गरिएकोप्रति असन्तुष्टि व्यक्त गरेका छन्। बुधबारको पार्टी निर्णयले महाधिवेशन मंसिरमा हुनेमा आशंका थपिएको उनले बताए।

कार्यतालिका परिवर्तनका सन्दर्भमा केन्द्रीय समितिको बैठक नै नबसी निर्णय गरिएको प्रति उनले आपत्ति जनाए। बुधबार बसेको नेताहरुको बैठकले वडा अधिवेशन सकिएका जिल्लामा असोज ९ मा गाउँ/नगर अधिवेशन गर्ने निर्णय गरेको थियो। बुधबारको बैठकले १३ जिल्लाको सन्दर्भमा ठोस निर्णय लिन सकेको थिएन। तीन सदस्यीय कार्यदलले नामावली प्रकाशित गरेपछि निर्वाचन समितिलाई आफ्नो तजविजमा नयाँ मिति तोक्ने अधिकार दिइएको छ।

‘एउटाले सारौं र अर्कोले त्यसलाई हुन्छ–हुन्छ भन्ने अवस्था बन्यो। यसरी त उहाँहरुले मंसिरमा जाडो होला। फागुनमा गरौं भन्नुहोला,’ थापाले हिजोको बैठकप्रति असन्तुष्टि राख्दै संसद भवनअघि पत्रकारसँग भने,‘संविधानले दिएको हदम्याद सकिएपछि सार्दै जान झनै सजिलो भएको छ। जति तन्काइ दिए पनि भयो। कसैले जवाफ नदिए पनि भयो। मंसिरमा महाधिवेशन हुन्छ भनेर कार्यकर्तालाई ढुक्कसाथ भन्न मैले सक्ने अवस्था अब छैन।’ हिजोबाट महाधिवेशन मंसिरमा हुने भन्ने विश्वास तोडिएको पनि थापाले टिप्पणी गरे।

क्रियाशील सदस्यताको विवाद टुंगाएर नामावली प्रकाशित गर्न नेताहरु कृष्णप्रसाद सिटौला, डा मीनेन्द्र रिजाल र रमेश लेखकलाई जिम्मेवारी दिइएको थियो। तीन नेताको भूमिकाप्रति थापाले प्रश्न उठाए। केन्द्रीय समिति बैठक बसेर पार्टी नेताहरुलाई कार्यअवधि तोकिएको स्पष्ट पार्दै थापाले भने, ‘केन्द्रीय समितिको बैठकमा आएर यसकारण गर्न सकिएन भन्नु नपर्ने?’ आफूलाई प्राप्त जिम्मेवारी पुरा गर्न नसकेपछि त्यसको जवाफ केन्द्रीय समितिलाई दिनुपर्ने थापाको तर्क छ।

१३ जिल्लाको क्रियाशील सदस्यता विवाद टुंगाउन तीन नेताले नसक्दा महाधिवेशन अनिश्चित बनाउने कार्यमा उनीहरुको पनि भूमिका देखिएको थापाले आरोप लगाए। ‘यसरी सार्ने कार्यले महाधिवेशनलाई अनिश्चित गराउँछ। सार्न पाइँदैन। सार्न हुँदैन पनि,’ उनले भने।

१३ जिल्लाको नामावली प्रकाशित नगर्ने र कार्यतालिका सार्दै जाने हो भने अन्योल थपिने उनको भनाइ छ।

पार्टी सभापति एवम् प्रधानमन्त्री शेरबहादुर देउवाको दोहोरो जिम्मेवारीले पनि महाधिवेशन प्रभावित हुने कुरालाई थप प्रमाणित भएको उनले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

नेतन्याहु, ग्यालेन्ट र डिफविरुद्ध आईसीसीको पक्राउ पुर्जी जारी

यस्तो छ विदेशी मुद्राको विनिमय दर, कुनको बढ्यो, कुनको घट्यो?

मुग्लिन-पोखरा सडकको पूर्वी खण्डमा धमाधम कालोपत्र गरिँदै