काठमाडौं- अफगानिस्तानबाट भागेर बाहिरिएका महिला फिल्मकर्मीले विश्वसामु अफगानको संस्कृति र पहिचानलाई नबिर्सिन आग्रह गरेका छन्। तालिबानले अफगानिस्तानलाई कब्जा गरेपछि देश छाडेका उनीहरुले आफ्नो पहिचानसँगै देशको संस्कृति गुम्ने त्रास भएकाले विश्वलाई यी सबै नभुलिदिन आग्रह गरेका हुन्।
शनिबार ‘भेनिस फिल्म फेस्टिबल’ले आयोजना गरेको कार्यक्रममा बोल्दै अफगान फिल्म संस्थानकी पहिलो महिला सभापति साहरा करिमीले आफू भागेको अनुभवसँगै अफगानिस्तानमा भर्खर हुर्किंदै गरेको फिल्म अब मासिने त्रास व्यक्त गरेकी छन्। आफूले घण्टौंसम्मको अन्योलपछि मात्रै देश छाड्ने निर्णय गरेको उनले बताइन्। करिमीले विश्वका दर्शकसामु परिचित हुँदै गइरहेको अफगानी फिल्मको भविष्य अब के हुने भन्ने चिन्ता व्यक्त गरेकी थिइन्।
‘हाम्रो सपना नै अफगानिस्तानबारे निर्माण भएको भाष्य परिवर्तन गर्ने थियो,’ उनले भनिन्, ‘हामीले फिल्ममार्फत् हाम्रो कथाहरु विभिन्न कोणबाट भन्न थालेका थियौं। देशको सुन्दरता देखाउन थालेका थियौं। अब यो सबै हराएर जानेछ।’
करिमीले आफू र सहकर्मीहरुले लामो समयसम्मको संघर्षले निर्माण गरेको अफगानिस्तानको परिचय अब विस्थापित हुने बताइन्। उनले भनिन्, ‘कलाकारबिनाको देशको कल्पना गर्नुस्, फिल्मकर्मीबिनाको देशको कल्पना गर्नुस्, कसरी देशको अस्तित्व रहन्छ? सायद हामी राजनीतिका दूत होइनौं। तर, हामीले भन्ने कथा, हाम्रो देशको कथाका लागि हामी अन्तर्राष्ट्रिय दूत हौं। अब हामी नै नभएपछि हाम्रा कथा कसले भनिदिन्छन्?’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
