काठमाडौं– होटल संघ नेपालले अर्थमन्त्री जनार्दन शर्मालाई भेटी होटल क्षेत्रको संरक्षण गर्न माग गरेको छ। संघका अध्यक्ष सिर्जना राणाको नेतृत्वमा गएको टोलीले कोभिड महामारीको समयमा होटल उद्योगले भोगिरहेको समस्याबारे अर्थमन्त्रीलाई अवगत गराउँदै संरक्षण गर्न सुझाव प्रस्तुत गरेको हो।
सो अवसरमा संघका अध्यक्ष राणाले कोभिड–१९ का कारण पर्यटन उद्योग विशेषगरी होटल उद्योग नराम्रोसँग थला परी व्यवसाय पलायन हुन थालेको बताएकी थिइन्। आर्थिक वर्ष २०७८/७९ को बजेटले सम्बोधन गरेका विषयका साथै मौद्रिक नीतिले सम्बोधन गरेका विषय यथाशीघ्र कार्यान्वयन गर्नसमेत अर्थमन्त्रीलाई आग्रह गरिन्।
होटल उद्योगलाई उत्पादनमूलक उद्योग सरहको सुविधा प्रदान गर्न र औद्योगिक व्यवसाय ऐन २०७६ तथा आयकर ऐन २०५८ को ११(३) को परिभाषामा समेत राखी कार्यान्वयन गरिदिन संघले अनुरोध गरेको छ।
होटल उद्योगलाई उत्पादनमूलक उद्योगसरहको विद्युत् महसुल दर कायम गरी उपलब्ध गराउनुपर्ने मागसमेत संघको छ।
सामाजिक सुरक्षा कोषमा सरकारको तर्फबाट सहुलियत योगदान रकम जम्मा भएकामा राहत भएकाले यसलाई कम्तीमा एक वर्षसम्म निरन्तरता दिनु पर्ने संघको आग्रह छ।
मौद्रिक नीतिमार्फत घोषणा गरिएको कार्यक्रमको कार्यान्वयन, सहुलियत कर्जा प्रवाह, पुनर्तालिकीकरणलगायत व्यवस्था होटल तथा पर्यटन उद्योगमा सहज र सरलरूपमा वितरण गर्दै कार्यान्वयन पक्षमा जोड दिनुपर्ने सुझावपत्रमा भनिएको छ।
होटल क्षेत्रका लागि लागू गरिएको सहुलियतपूर्ण कर पाँच वर्षका लागि लागू गरिनुपर्ने भन्दै संघले समयमा अधिकांश होटल पुनःनिर्माणका क्रममा रहेको हुँदा होटलमा आयात गरिने सामग्रीमा विशेष भन्सार छुटको व्यवस्था गरिनुपर्ने माग गरेको छ।
साथै पर्यटन पुनरुत्थानका लागि विशेष आर्थिक योजना बनाई होटल उद्योगलाई फरक समूहमा राखी कार्यान्वयन पक्षलाई जोड दिई नियमित अनुगमन संयन्त्रको विकास गरिनुपर्ने पनि अध्यक्ष राणाले बताइन्।
संघको सुझावपत्र बुझ्दै अर्थमन्त्री शर्माले कोभिड– १९ बाट पर्यटन तथा होटल उद्योग अतिप्रभावित भई धान्नै नसक्ने अवस्थामा पुगेको आफूले महसुस गरेको र यस उद्योगको संरक्षण गर्न राज्यले सक्दो सहयोग गर्ने प्रतिबद्धता व्यक्त गरेको संघले विज्ञप्तिमार्फत जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
