काठमाडौं- मण्डला थिएटरको ‘मण्डला ड्रामा स्कूल’का पहिलो ब्याचका विद्यार्थीहरुले तयार पारेको नाटक ‘युद्धका घाउहरु’ भर्चुअल रुपमा प्रदर्शन गरिएको छ। विभिन्न चार लघु नाटक समेटिएको यो नाटक सशस्त्र द्वन्द्वको सेरोफेरोमा आधारित छ।
नाटकमा ‘थाहा’, ‘भंवर’, ‘लिई’ र ‘जिउँदो लाश’ लघु नाटक समावेश गरिएका छन्। बेपत्ता पारिएका नागरिकको विषयमा लघु नाटक थाहा तथा जनयुद्धमा महिलाहरुले भोग्नुपरेको दुर्व्यवहारको विषयमा भंवर निर्माण गरिएको छ।
जनयुद्धमा हतियार बनाउने व्यक्तिले माओवादीलाई हतियार बेच्यो भनेर लागेको आरोपको विषयमा तेस्रो नाटक ‘लिई’ बनेको छ भने चौथो नाटक जिउँलो लाशमा धादिङको जोगीमाराबाट कालिकोट एयरपोर्ट बनाउन गएर माओवादी भएको आरोप लगाइ मारिएका मजदुरको कथा समेटिएको छ।
चार लघु नाटकमा गरी कूल १६ जनाले अभिनय गरेका छन्। प्रदीप ढुंगाना, आका नेपाली, सरिता कठायत, दीक्षा चौधरी, हाङ ओ हाङ राई, विष्णुमाया परियार, सुमित्रा पेहिम, सञ्जय विश्वकर्मा, सुस्मिता गुरागाईंलगायत १६ जना विद्यार्थीले सहकार्यमा यी नाटकको निर्माण तथा यसमा अभिनय गरेका हुन्।
नाटक अहिले मण्डला थिएटरको आधिकारिक युट्युब च्यानल तथा फेसबुक पेजमार्फत् लाइभ प्रसारण भइरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।