काठमाडौं- भारतका सफलमध्येका एक अभिनेता हुन ऋतिक रोशन। उनले अभिनय गरेका ‘जोधा अक्बर’, ‘कोइ मिल गया’, ‘काबिल’लगायतका थुप्रै ब्लक बस्टर फिल्महरु छन्।
तर, ऋतिकले अभिनय गर्न नमानेका पनि केही फिल्म छन्, जसले राम्रो चर्चा र व्यापार गरेका छन्। ऋतिकलाई अभिनय गर्न प्रस्ताव गरिएपनि उनले अस्विकार गरेका ‘स्वदेश’देखि ‘रंग दे बसन्ती’सम्म पाँच फिल्म प्रदर्शनपछि निकै हिट भएका थिए।
१. स्वदेश
आशुतोष गोवारिकेरको फिल्म ‘स्वदेश’ ऋतिकलाई मुख्य भूमिकामा प्रस्ताव गरिएको थियो। ऋतिकले आफूले फिल्मको स्क्रिप्ट पढेपछि आफू उक्त भूमिकामा उपयुक्त हुन्छु भन्ने नलागेका कारण फिल्म अस्विकार गरेको बताएका छन्। निर्देशकको दृष्टिकोणलाई बुझ्न नसकेका कारण आफूले राम्रो फिल्ममा अभिनय गर्न अस्विकार गरेको उनी बताउँछन्। उनले भनेका छन्, ‘स्वदेश प्रदर्शनमा आएपछि आशुतोषको दृष्टिकोण बुझें। अहिले मलाई मन पर्नेमध्येको एक फिल्म ‘स्वदेश’ हो र मन पर्ने निर्देशक आशुतोष हुन्।’
२. दिल चाहता है
फरहान अख्तरको निर्देशनमा बनेको फिल्म ‘दिल चाहता है’ भारतमा मात्रै होइन्, भारत बाहिर पनि हिन्दी सिनेमाका दर्शकमाझमा लोकप्रिय छ। सिनेमामा आमिर खान, अक्षय खन्ना, शैफ अलि खान लगायतको उत्कृष्ट अभिनय छ। तर, निर्देशकले सिनेमा बनाउने सोच गर्दा फिल्ममा अभिनय गरेका कलाकारभन्दा फरक कलाकारलाई अभिनय गराउने सोचेका थिए। फरहानले एक अन्तर्वार्तामा फिल्ममा अक्षय खन्ना, ऋतिक रोशन र अभिषेक बच्चनलाई कास्ट गर्ने सोच बनाएको खुलाएका छन्। तर, कारणवश सोचेभन्दा फरक पात्रहरुले फिल्ममा अभिनय गर्न पुगेको उनले बताएका छन्।
३. मै हुँ ना
शाहरुख खानको सबैभन्दा चर्चित र सफलमध्येको एक फिल्म हो मै हुँ ना। करण जोहरले बनाएको फिल्म ‘कभि खुसी कभि गम’मा सँगै देखिएका शाहरुख र ऋतिकलाई यसअघि पनि सँगै अभिनय गर्ने मौका जुरेको थियो उक्त फिल्ममा। फरहा खानको निर्देशनमा बनेको फिल्म ‘मै हुँ ना’मा शाहरुखसँगै ऋतिकलाई कास्ट गर्ने सोचसहित उनलाई प्रस्ताव गरिएको थियो। तर, ऋतिकले प्रस्ताव अस्विकार गरेपछि उक्त भूमिकामा जायेद खानलाई राखिएको थियो।
४.द पिंक प्यान्थर २
प्राय बलिउडका कलाकारलाई विदेशी फिल्ममा अभिनय गर्ने प्रस्ताव आउँछ। धेरैले यो प्रस्तावलाई स्वीकारेका पनि छन्। ऋतिकलाई पनि त्यस्तै प्रस्ताव आएको थियो। स्टिभ मार्टिनको निर्देशनमा बनेको ‘द पिंक प्यान्थर २’मा ऋतिकलाई अभिनयको प्रस्ताव गरिएको थियो। ऋतिकसँगै उक्त फिल्ममा खेल्ने प्रस्ताव ऐश्वर्या रायलाई पनि गरिएको थियो। ऐश्वर्याले उक्त प्रस्ताव स्वीकारेपछि ऋतिकले भने त्यसलाई अस्वीकार गरिदिए। ‘आफू व्यस्त भएको’ कारण देखाउँदै ऋतिकले फिल्म खेल्न अस्वीकार गरेका थिए।
५. रंग दे बसन्ती
रकेयस ओमप्रकाश मेहराको फिल्म ‘रंग दे बसन्ती’ बलिउडको सदाबहार फिल्म मानिन्छ। उक्त फिल्ममा पनि ऋतिकलाई अभिनयको प्रस्ताव गरिएको थियो। फिल्ममा ऋतिकलाई फिल्मका एक पात्र करन सिंघानियाको भूमिकामा अभिनय गर्न प्रस्ताव आएको थियो। उनले स्क्रिप्टदेखि पात्रको भूमिका पनि मन पराएका थिए। तर, व्यस्तताका कारण उनले फिल्ममा अभिनय गरेनन्। ऋतिकले अस्वीकार गरेपछि फिल्मको प्रस्ताव अर्जुन रामपाल, शाहरुख खान लगायतलाई गरिएको थियो। तर, उनीहरुले पनि यसमा अभिनय नगरेपछि अन्त्यमा सिद्धार्थ सूर्यनारायणले यसमा अभिनय गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
