काठमाडौं- नेकपा एमाले र माओवादी केन्द्रले आगामी प्रतिनिधि र प्रदेशसभा निर्वाचनमा तालमेलको तयारी अगाडि बढाएका छन्।
सोमबार भएको छलफल सकारात्मक भएको भन्दै दुवै पार्टीका नेताहरुले थप सम्वाद गरी निर्णय गर्ने सहमति गरेको माओवादी नेता नारायणकाजी श्रेष्ठले बताए।
‘हालसम्मका छलफल सकारात्मक छन्,’ श्रेष्ठले भने, ‘भोलिको वार्तापछि ठोस निष्कर्ष निस्कन्छ।’ दुवै पक्षका तर्फबाट केही प्रस्ताव आएको तर त्यसलाई कसरी लैजाने भन्ने विषयमा पार्टीभित्र आन्तरिक छलफल गर्न आवश्यक भएकाले बैठक मंगलबारलाई सारिएको उनले बताए।
राजधानीमा सोमबार भएको छलफलमा माओवादीका तर्फबाट अध्यक्ष पुष्पकमल दाहाल, नारायणकाजी श्रेष्ठ र रामबहादुर थापा वादलको सहभागिता थियो।
एमालेका तर्फबाट अध्यक्ष केपी ओली, पूर्व प्रधानमन्त्री माधवकुमार नेपाल, झलनाथ खनाल र बामदेव गौतम सहभागी थिए।
एमाले सचिव योगेश भट्टराईले पनि छलफल सकारात्मक भएको जानकारी दिएका छन्।
एमाले अध्यक्ष ओली सरकारको नेतृत्वकालमा कायम रहेको गठबन्धनलाई ब्युँताएर पुनः निर्वाचनमा मोर्चाबन्दी गर्ने प्रयास स्वरुप छलफल चलेको भट्टराइले बताए।
सचिव भट्टराईले विभिन्न धारमा छरिएर रहेका कम्युनिस्टलाई एक ठाउँमा उभ्याउने गरी छलफल अघि बढेको बताए।
प्रदेश र प्रतिनिधिसभा लक्षितभन्दा पनि एउटै निर्वाचन चिह्नमा कसरी भाग लिने भन्ने विषयमा बहस केन्द्रित भएको उनको भनाइ छ। फरक चिह्नमा निर्वाचनमा भाग लिँदा मतदाता अलमलिएकाले एउटै निर्वाचन चिह्न सूर्यमा निर्वाचन लड्ने प्रस्ताव एमाले नेताहरुले राखेको उनले जानकारी दिए। सूर्य चिह्नमा निर्वाचन लड्न माओवादी केन्द्रका तर्फबाट आपत्ति नभएको तर सिटमा भने कुरा चलिरेहको उनले दाबी गरे।
माओवादी केन्द्रले प्रदेश र प्रतिनिधिसभा दुवैमा ४० प्रतिशत सिट माग गरेको छ। ६० प्रतिशत एमालेले लिने सहमति भएमा सूर्य चिह्नमै मत माग्ने पक्षमा माओवादी सकारात्मक रहेको भट्टराईले बताए।
माओवादी केन्द्रले प्रदेश नम्बर २, ५ र ६ को मुख्यमन्त्री पाउनुपर्ने अडान राखेको छ। तर, एमालेले भने निर्वाचनको नतिजापछि मात्र यस विषयमा टुंगो लगाउनुपर्ने अडान राख्दै आएको छ।
राष्ट्रपति, उपराष्ट्रपति, सभामुख र आगामी सरकारको नेतृत्व कसले गर्ने भन्ने विषयमा पनि लिखित सहमति गर्नुपर्ने माओवादी केन्द्रको माग छ। यसअघि केपी ओली सरकार निर्माण गर्दा भएका सहमतिको पालना नभएकाले यसपटक मौखिकमा विश्वास गर्न नसकिने तर्क माओवादी पक्षले गर्दै आएको छ।
यसैबीच, माओवादी केन्द्रको केन्द्रीय सचिवालय बैठकले एमालेसँग पार्टी एकता र आसन्न संघ एवं प्रदेशसभाको निर्वाचनमा चुनावी तालमेल गर्ने अधिकार अध्यक्ष प्रचण्डलाई दिएको छ।
सोमबार पार्टी केन्द्रीय कार्यालय पेरिसडाँडामा बसेको बैठक आसन्न निर्वाचनमा तालमेल र एमालेसँग पार्टी एकताका विषयमा केन्द्रित थियो।
बैठकले एमालेसँग चुनावी तालमेल र पार्टी एकताको अन्तिम निर्णय गर्ने अधिकार अध्यक्ष प्रचण्डलाई दिएको हो। नेताहरु नारायणकाजी श्रेष्ठ र रामबहादुर थापा ‘बादल’सँग आवश्यक परामर्शपछि एकता र तालमेलबारे अध्यक्ष प्रचण्डले अन्तिम निर्णय लिने पार्टी प्रवक्ता पम्फा भुसालले जानकारी दिइन्।
यो पनि पढौं
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1794455419.jpg)
-1786602170.png)
