फाइल तस्बिर
काठमाडौं- बुधबार अबेर दुई नयाँ राजनीतिक दलले मान्यता पाएको छ। नयाँ दल गठनका लागि निवेदन दिएका माधवकुमार नेपाल र महन्थ ठाकुर नेतृत्वको नेकपा (एकीकृत समाजवादी) र लोकतान्त्रिक समाजवादी पार्टी अस्तित्वमा आएका हुन्। ती दलका निम्ति बुधबार निर्वाचन आयोगमा सनाखत गरिएको थियो।
एमाले विभाजन गरी गठन गरिएको एकीकृत समाजवादीको पक्षमा ३० संघीय सांसद् र ५५ केन्द्रीय सदस्यले सनाखत गरेका थिए। त्यस्तै लोसपाको पक्षमा १४ संघीय सांसद् र १७ केन्द्रीय कार्यकारिणी समिति सदस्यले सनाखत गरेका छन्।
पछिल्लो विभाजनसँगै संघीय संसद्मा दुई नयाँ दल थपिएका छन्, जुन चौथो र छैटौं हैसियतको दल जन्मिएका हुन्।
प्रतिनिधि सभामामा अंकगणित
२७५ सदस्यीय प्रतिनिधि सभामा माओवादी केन्द्रले चार जना (टोपबहादुर रायमाझी, लेखराज भट्ट, प्रभु साह र गौरीशंकर चौधरी) लाई पदमुक्त गरेको थियो। त्यस्तै, कांग्रेसका दुई (विजय गच्छदार र मो. अफताव आलम) र एकीकृत रहेको अवस्थामा रहँदाको जसपाका दुई (हरिनारायण रौनियार र रेशम चौधरी) निलम्बन छन्।
एमाले विभाजन भए पनि सबैभन्दा ठूलो दल भने उही हुनेछ। प्रतिनिधि सभामा एमालेका १२१ सदस्य थिए। अब उसका ९८ सांसद् रहनेछन्। दोस्रो ठूलो दल कांग्रेसका ६३ जना सांसद् छन्। तीमध्ये दुई जना निलम्बनमा छन्।
तेस्रो ठूलो दल माओवादी केन्द्र यथावत् रहनेछ। सुरुवातमा ५३ सदस्य रहेको उसले चार जनालाई पदमुक्त गरेको थियो। अब उसँग सभामुखसहित ४९ जना सदस्य छन्।
चौथो ठूलो दल माधवकुमार नेपाल नेतृत्वको नेकपा एकीकृत समाजवादीसँग २३ सांसद् छन्। विभाजन गर्दा प्रतिनिधि सभाका २३ सांसद्ले सनाखत गरेका थिए। थप चार सांसद्ले पनि सनाखतका लागि निवेदन दिएका थिए। त्यसलाई भने निर्वाचन आयोगले अस्वीकार गरेको थिए। उनीहरुले पछि कुनै उपायद्वारा एकीकृत समाजवादीतिर जाने अवस्था बनेमा सो दलका २७ सांसद् हुनेछन्। त्यस्तै एमालेको आधार घटेर ९४ जना पुग्नेछ।
जसपा विभाजन भएसँगै उसँग २० सांसद् कायम भएका छन्। त्यसमध्ये एकजना हरिनारायण रौनियार निलम्बनमा छन्। अब ऊ संसद्को पाँचौं ठूलो दल भएको छ।
जसपा विभाजित भएर लोकतान्त्रिक समाजवादी पार्टीसँग १४ सांसद् हुने भएका छन्। तीमध्ये एकजना रेशम चौधरी निलम्बनमा छन्। बुधबार गरिएको सनाखतमा उनले हस्ताक्षर गर्न नपाए पनि उनी लोसपातिर लाग्ने भएका छन्। यो दल प्रतिनिधि सभाको छैटौं दल हुनेछ।
यसबाहेक संसद्मा राष्ट्रिय जनमोर्चाका एक, नेमकिपाका एक, राप्रपाका एक र स्वतन्त्र सांसद् एक जना छन्।
राष्ट्रिय सभामा पनि बदलियो समीकरण
बुधबार भएको दुई दलको विभाजनअघि राष्ट्रिय सभामा एमालेका तर्फबाट राष्ट्रिय सभा अध्यक्ष र राष्ट्रपतिबाट मनोनित दुई सांसद् सहित ३३ जना सांसद् थिए। त्यस्तै, माओवादी केन्द्रका तर्फबाट राष्ट्रिय सभाका उपाध्यक्ष र राष्ट्रपतिबाट मनोनित सहित १५ जना थिए। त्यस्तै कांग्रेसका सात जना र जसपाका ३ जना सांसद् थिए। त्यस्तै, एक जना स्वतन्त्र सांसद् छन्। एमाले र जसपा विभाजन भएपछि भने राष्ट्रिय सभामा तेस्रो र छैटौं दलको जन्म भएको छ।
अब राष्ट्रिय सभाको सबैभन्दा ठूलो दल एमाले २६ सिटमा खुम्चिएको छ। जसमा राष्ट्रिय सभाका अध्यक्ष गणेशप्रसाद तिमिल्सिना र राष्ट्रपतिबाट मनोनित विमला राई पौडेर र वामदेव गौतम पनि छन्।
दोस्रो ठूलो दल माओवादी केन्द्रसँग १५ जना यथावत् छन्। जसमा उपाध्यक्ष शशिकला दाहाल र राष्ट्रपतिबाट मनोनित रामनारायण विडारी छन्।
माधवकुमार नेपाल नेतृत्वको नयाँ दल नेकपा एकीकृत समाजवादी पार्टी तेस्रो ठूलो दल हुने भएको छ। सांसद् संख्याका आधारमा यो पार्टी र कांग्रेससँग बराबर सातसात जना सांसद् छन्। तर, स्वतन्त्र सांसद् खिमलाल देवकोटा पनि नेपाल निकट भएको र उनकै जोडबलमा निर्वाचित भएकाले औपचारिक/अनौपचारिक रुपमा माधव नेपालको साथमा आठ सांसद् हुनेछन्।
चौथो ठूलो पार्टी कांग्रेस हुनेछ। उसका सात जना सांसद् यथावत् छन्। जसपासँग अब दुई सांसद् बाँकी छन्। त्यस्तै, जसपा विभाजित भएर गठन भएको लोकतान्त्रिक समाजवादी पार्टीसँग भने एक सांसद् छन्।
सांसद् खिमलाल देवकोटा भने स्वतन्त्र हैसियतमा रहनेछन्। उनी माधव नेपाल निकट भएकाले त्यही दलमा जोडिने सम्भावना पनि छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
