सुर्खेत- कर्णाली प्रदेश सरकार र संसदको काम-कारवाहीप्रति आपत्ति जनाउँदै प्रमुख प्रतिपक्षी दल नेपाली कांग्रेसका सांसदले संसद् अवरुद्ध पारेका छन्।
दोस्रो संसद् अधिवेशनको आज बसेको नवौं बैठकमा कांग्रेस सांसदहरुले सरकार र संसदको काम-कारवाहीप्रति आपत्ति जनाउँदै संसद् अवरुद्ध पारेका हुन्।
संसद् बैठक सुरु भएपछि विशेष समय लिएर बोल्दै कांग्रेस संसदीय दलका नेता जीवनबहादुर शाहीले सरकार र संसद्को कडा आलोचना गरे। उनले सरकार र संसदका कतिपय गतिविधिले कर्णाली प्रदेशको बेइज्जत हुने काम भएको भन्दै आपत्ति प्रकट गरे।
राष्ट्रियस्तरको राष्ट्रपति रनिङ सिल्ड प्रतियोगितामा सहभागिता जनाउन जाने कर्णालीका खेलाडीहरुलाई आवश्यक पोशाक उपलब्ध नगराउँदा राष्ट्रिय रुपमै कर्णालीको बेइज्जत भएको बताए। उनले कर्णालीको प्रतिनिधित्व गरेर राष्ट्रिय प्रतियोगितामा सहभागिता जनाउने खेलाडीलाई सरकारले पोशाक नदिएर अपमान गर्नुका साथै प्रदेशकै बेइज्जत गरेको आरोप लगाए।
‘यसरी दिनप्रतिदिन हाम्रो प्रदेशको बेइज्जत भइरहेको छ। हामीले कहिलेसम्म सहने?’ शाहीले संसदमा सरकारप्रति प्रश्न गरे।
प्रदेश राजधानीको सडक लगायतका पूर्वाधार विकासमा पनि सरकार गम्भीर नभएको आरोप उनले लगाए। यसबारे सांसदहरुले संसदमा पटक-पटक आवाज उठाउँदा पनि सुनुवाइ नभएको उनको गुनासो थियो।
त्यसैगरी चालू आर्थिक वर्षको तेस्रो चौमासिकका लागि सरकारले नीति तथा कार्यक्रमसहित बजेट ल्याए पनि त्यसको कार्यान्वयनमा सरकारबाटै बेवास्ता भएको भन्दै शाहीले कडा आलोचना गरे। सरकारले बजेट ल्याएलगत्तै रातो किताब ल्याउने भने पनि आजसम्म नल्याइएको र केही मन्त्रीले आफूखुसी योजना छनोट गरेर बजेट बाँडेको भन्दै त्यसले संसद् र सांसदहरुको अपमान गरेको गुनासो उनले गरे।
‘रातो किताबमा नभएको योजनामा कसरी खर्च गरियो?’ उनले प्रश्न गरे।
शाहीले संसदको कामको समेत आलोचना गरे। आगामी आर्थिक वर्षका लागि सरकारले ल्याउन लागेको नीति तथा कार्यक्रम संसदलाई जानकारी नै नभई सञ्चारमाध्यमबाट आफूहरुले थाहा पाएको भन्दै यसले संसद्को अपमान भएको उनको जिकिर थियो। संसदले सम्पादन गर्ने कुनै पनि कामबारे संसदलाई पहिले जानकारी गराएर मात्र बाहिर सार्वजनिक गर्नुपर्नेमा सांसदहरुले नै सञ्चारमाध्यममा समाचार पढेर थाहा पाउनुपर्ने अवस्था आउनु लज्जास्पद भएको उनको टिप्पणी थियो।
पहिलेकै नीति तथा कार्यक्रम र बजेट कार्यान्वयनमा सरकारले चासो नदिएकाले अब नयाँ नीति तथा कार्यक्रम ल्याउनुपर्ने आवश्यकता नभएको टिप्पणी गर्दै शाहीले पहिलेको हिसाबकिताब नहुँदासम्म संसदलाई अघि बढ्न नदिने बताए। साथै, शाहीले कर्णाली–रारा पर्यटन वर्षको शुभारम्भका क्रममा भएको खर्चको हिसाब सार्वजनिक नगरेकोप्रति पनि आपत्ति जनाए।
शाहीले आफ्नो भनाइ राखिसकेपछि कांग्रेसका सांसदहरुले संसद् अवरोध गरेका हुन्। सभामुख राजबहादुर शाहीले संसदमा उठेका विषयमाथि सम्बन्धित पक्षसँग छलफल गरी समाधान गरिने भन्दै बस्न आग्रह गरे पनि कांग्रेस सांसदहरु नबसेपछि उनले आधा घन्टाका लागि बैठक स्थगित गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1764146706.png)
