काठमाडौं- संसद् सचिवालयले नेकपा एमालेको संसदीय दलका सदस्यहरुको सूची निर्वाचन आयोगलाई पठाएको छ। आयोगले भदौ ४ गते नै सचिवालयलाई पत्र पठाएको भए पनि बीचमा बिदा परेका कारण मंगलबार मात्रै पत्र सचिवालयमा दर्ता भएको थियो।
संसद् सचिवालयका प्रवक्ता रोजनाथ पाण्डेका अनुसार, निर्वाचन आयोगले दल विभाजन गरी नयाँ दल दर्ताका लागि परेको निवेदनमा सनाखत गराउनुअघि विवरण मागेर पत्र लेखेको थियो। आयोगको पत्र अनुसार संसद सचिवालयले मंगलबार नै सांसदहरुको सूची बनाएर पठाएको हो।
संसद् सचिवालयले एमालेका संघीय संसद्का १५४ जनाको सूची पठाएको छ। जसमा १२१ जना प्रतिनिधि सभाका र ३३ जना राष्ट्रिय सभाका सदस्य छन्। राष्ट्रिय सभा सदस्यमा अध्यक्ष गणेशप्रसाद तिमिल्सिना तथा राष्ट्रपतिबाट मनोनित वामदेव गौतम र विमला राई पौडेल पनि समावेश गरिएका छन्।
भदौ १ गते नेकपा एमालेले आफ्ना १४ सांसद्लाई कारबाही गरेको भन्दै पदमुक्त गर्न सचिवालयलाई जानकारी पठाएको थियो। तर, सभामुख अग्निप्रसाद सापकोटाले परामर्श जारी रहेको भन्दै सूचना टाँस गर्न ढिलाइ गरेका थिए। सचिवालयले निर्वाचन आयोगलाई पत्र पठाएसँगै सूचना टाँस गर्नु वा नगर्नुको औचित्य सकिएको संसद् सचिवालयका एक अधिकारीले बताए। 'हामीले पठाएको सूची अनुसार निर्वाचन आयोगले सनाखत गर्नेछ। अब आयोगलाई पनि काम गर्न सहज भएको छ', उनले भने।
एमालेको निरन्तर दबाब
भदौ १ गते नै एमालेले निष्काशन गरेको जानकारी गराउँदै संसद् सचिवालयमा पत्र पठाएको थियो। उसले निष्काशन गरेका सांसद्हरुमा माधवकुमार नेपाल, जीवनराम श्रेष्ठ, मुकुन्द न्यौपाने, रामकुमारी झाँक्री, कल्याणीकुमारी खड्का, लक्ष्मीकुमारी चौधरी, निरादेवी जैरु, पुष्पाकुमारी कर्ण कायस्थ, सरलाकुमारी यादव, कलिला खातुन, विरोध खतिवडा, कृष्णलाल महर्जन, भवानी खापुङ, मेटमणि चौधरी छन्।
तर सभामुखबाट तत्काल सूचना टाँस नभएपछि एमालेले सभामुखलाई दबाब दिँदै आएको थियो। भदौ ३ गते सभामुखको कार्यकक्षमै पुगेर एमाले सांसद्हरुले तत्काल सूचना टाँस गर्न भन्दै धम्की दिएका थिए। उनीहरुले कार्यकक्षमै धर्ना दिनेदेखि बल प्रयोग गर्नेसम्मका चेतावनी दिएका थिए। साथै, भदौ २ गते एमाले अध्यक्ष केपी शर्मा ओलीले पनि सभामुखलाई विभिन्न लाञ्छना लगाएका थिए।
मंगलबारको स्थायी कमिटी बैठकपछि पत्रकारहरुसँग कुरा गर्दै एमाले प्रवक्ता प्रदीप ज्ञवालीले पनि सभामुखले सभामुखको जस्तो भूमिका नखेलेको बताएका थिए। 'उहाँले जे गर्नुभएको छ, संविधानको बर्खिलाप गर्नुभएको छ। संसदीय अभ्यासको बर्खिलाप गर्नुभएको छ। एउटा पार्टीलाई लक्षित गरेर पूर्वाग्रहपूर्ण र कानुनले नचिन्ने र नामान्ने खालका क्रियाकलाप गर्नुभएको छ', ज्ञवालीको भनाइ थियो।
संसद् सचिवालयले भने कारबाहीको विषय विचराधीन भएको भन्दै एमालेका सबै सांसद्हरुको सूची पठाएको हो। 'मिति २०७८/०५/०१ मा दल त्यागसम्बन्धी सूचनाको पत्र संघीय संसद् सचिवालयमा दर्ता भएको एवम् बोधार्थ तहाँ आयोगलाई समेत दिइएको र उक्त विषय नियमानुसार विचाराधीन रहेको,' सचिवालयले आयोगलाई पठाएको पत्रमा भनिएको छ।
एमाले संसदीय दलका उपनेता सुवास नेम्वाङले सचिवालयले पठाएको पत्रमा १४ जनालाई कारबाही गरिएको विषय विचराधीन रहेको उल्लेख भएकाले उनीहरुको सनाखत नहुने बताउँछन्। 'कारबाही विचराधीन रहेको जानकारी आयोगलाई प्राप्त भएपछि निर्वाचन आयोगले ती सम्बन्धित १४ जनाको हकमा सनाखत गर्न मिल्दैन,' नेपाल लाइभसँगको कुराकानीमा उनले भने।
निर्वाचन आयोगमा प्रवक्ता राजकुमार श्रेष्ठले भने संसद् सचिवालयबाट त्यस्तो जवाफ सहित आएको पत्रमा के गरिन्छ भनेर आफूले भन्न नसक्ने बताए। 'आयुक्तहरुको बैठकबाट निर्णय होला,' उनले भने।
आयोगले आज सनाखत गर्दै
निर्वाचन आयोगले अलग्गै दल दर्ताका लागि निवेदन दिएका एमालेका सांसद् तथा केन्द्रीय सदस्यहरुलाई आज निर्वाचन आयोगमा सनाखत गर्ने भएको छ। उनीहरुलाई बुधबार ११ बजेदेखि २ बजेसम्म आयोगको कार्यालयमा आउन भनिएको छ।
माधवकुमार नेपालको नेतृत्वमा नेकपा एकीकृत समाजवादी पार्टी दर्ताका लागि निवेदन परेको थियो। उनले ९५ जना केन्द्रीय सदस्यहरुको सूची निर्वाचन आयोगमा उपलब्ध गराएका छन्। तर, एमालेको केन्द्रीय सदस्यको सूचीमा रहेका झलनाथ खनाल उपचारका क्रममा नयाँ दिल्लीमा रहेकाले सनाखतका लागि उपस्थित हुन सक्ने छैनन्। उनले दिल्लीबाटै सनाखतको व्यवस्था मिलाउन दिएको निवेदन पनि आयोगले अस्वीकार गरेको छ। साथै, सोमप्रसाद पाण्डे, माया ज्ञवाली, शारदा देवी भट्ट तथा राजन राईले आफूहरु एकीकृत समाजवादीतिर लागेकाले सनाखत गराइयोस् भनेर दिएको निवेदन पनि आयोगले अस्वीकार गरेको छ।
नेपाल नेतृत्वको पार्टीमा लाग्नेहरु भदौ ७ गतेदेखि नै चन्द्रागिरिमा भेला गरिरहेका छन्। त्यहाँ झन्डै १०० जना नेताहरु रहेको नेताहरुको भनाइ छ। सहभागी एक सांसद्को अनुसार यतिबेला त्यहाँ ३२ जना सांसद्हरु छन्। जसमा प्रतिनिधि सभाका २३ र राष्ट्रिय सभाका ९ जना छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
