काठमाडौं– नेकपा एमालेका सांसद्हरुको अवरोधपछि लुम्बिनी प्रदेश सभाको बैठक आधा घण्टाको लागि स्थगित भएको छ। सोमबार बसेको बैठकमा एमालेका सांसद्हरुले नाराबाजी गरेका थिए।
बैठकको सुरुमै समय लिएर बोलेका एमालेका कुलप्रसाद पोखरेलले नेकपा एमालेले अजय शाही र विमला वलीलाई पदमुक्त गर्न प्रदेश सभा संसद् सचिवालयमा पत्र दर्ता गरेकोमा विषयलाई अलमल्याउने र गर्नै नखोज्ने भएबाट आफूहरु आन्दोलित भएको बताए। 'अबिलम्ब कारबाही किनारा लगाइयोस्', उनले भने।
एमालेका सांसद्हरुले सभामुखलाई कुर्सीको मर्यादा कायम गर्न भनेका थिए। साथै दलीय मर्यादा कायम गर, प्रदेश सभामा दलीय प्रभाव अन्त्य गर लगायतका नारा लगाइएको थियो।
केही बेरको नाराबाजीपछि सभामुखले माओवादी केन्द्रका तुलाराम घर्तीलाई समय दिएका थिए। त्यसपछि उनी बोल्न थालेका थिए। उनले विमला वली आफ्नै दलका सांसद् भएको बताउँदै उनलाई एमालेले हटाउन नसक्ने बताए। 'विपक्षी दलले उठाएको कुरामा म गम्भीर आपत्ति प्रकट गर्न चाहन्छु', उनले भनेका थिए।
'एउटा दलको सदस्यलाई अर्को दलले कारबाही गर्न मिल्छ कि मिल्दैन? मिल्ने हो भने हामीले पनि अर्को कुनै दलकोलाई कारबाही गर्छौं। उहाँहरुको दलको सांसद्लाई कारबाही गर्छौं। चिठी दिन्छौं। त्यो हामी टाँस्न लगाउँछौं। अनि टाँस्नुभएन भने हामीले संसद् अवरोध गर्छौं', उनको भनाइ थियो।
एमालेका सांसद्हरुले संसदीय मर्यादा कायम गर्नु भनिरहनुभएको भए पनि त्यस विपरित बोलिरहनुभएको उनको भनाइ थियो।
त्यसपछि एमालेका सांसद्हरुले झन् चर्कोगरी नाराबाजी लगाइरहे।
केहीबेरको नाराबाजीपछि सभामुख पूर्णबहादुर घर्तीले आजै २:३० मा बैठक सुरु हुने गरी स्थगित गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
