काठमाडौं- नवगठित नेकपा (एकीकृत समाजवादी)ले दलको मान्यता प्राप्त गरेपछि मन्त्रिमण्डलले पूर्णता पाउने भएको छ। निर्वाचन आयोगले माधवकुमार नेपाल नेतृत्वको नेकपा (एकीकृत समाजवादी) सनाखतका लागि भदौ ९ गते बोलाएको छ। उक्त दिन २ बजेसम्म केन्द्रीय सदस्यको सनाखत लिएपछि सोही दिन दलको प्रमाणपत्र प्रदान गर्ने आयोगको तयारी छ। नेपाल नेतृत्वको उक्त दललाई आयोगले मान्यता दिएसँगै मन्त्रिमण्डल विस्तार हुने ढोका खुल्नेछ।
एमालेको एक धारको नेतृत्व गरेर अघि बढिरहेका माधव नेपालले नयाँ दल बनाएपछि सरकारमा सहभागिता लगभग सुनिश्चित छ। नेकपा (एकीकृत समाजवादी)का केन्द्रीय सदस्य तथा प्रतिनिधि सभा सदस्य मेटमणि चौधरीले भने, ‘भदौ ९ गते आयोगले प्रमाणपत्र उपलब्ध गराएपछि हामी सरकारमा जाने ढोका खुल्छ।’
गठबन्धनको नेतृत्व गर्दै कांग्रेस सभापति शेरबहादुर देउवाले असार २९ गते प्रधानमन्त्रीको शपथ लिएका थिए। नेपाल पक्षको भिन्न दल नभएकै कारण देउवाले मन्त्रिमण्डल विस्तार गर्न सकेका थिएनन्। मन्त्रिमण्डल विस्तार गर्न नसकेको आरोप भोगेको सत्ता गठबन्धनले नेकपा (एकीकृत समाजवादी) लाई छिटो प्रक्रिया टुंगाएर सरकारमा ल्याउने प्रयासमा छ। सोही अनुसार आयोगले उक्त दललाई बुधबार सनाखतका लागि बोलाएको छ। माधव नेपाल नेतृत्वको पार्टी सरकारमा ल्याउने प्रयासले मन्त्रिमण्डल विस्तारमा ढिलो हुन पुगेको कांग्रेस नेता मीन विश्वकर्माले बताए। आयोगले दल दर्ताको प्रमाणपत्र उपलब्ध गराएसँगै सरकारले पूर्णता पाउने उनले बताए।
अध्यादेशमार्फत् एमालेलाई फुटाउने भूमिकाको सहजीकरण देउवा सरकारले गरिदिएको छ। अध्यादेश ल्याउनकै लागि संसद् बैठक ‘हठात् अन्त्य’ गरिएको थियो। संसद अन्त्य गरेकै भोलिपल्ट सरकारले राजनीतिक दल सम्बन्धी ऐनमा संशोधन गरि अध्यादेश ल्याउने निर्णय गरेको थियो। भदौ १ मा मन्त्रिपरिषद्ले गरेको सिफारिसको एक दिनपछि राष्ट्रपतिबाट अध्यादेश जारी भएको थियो। अध्यादेश जारी भएकै दिन ९५ केन्द्रीय सदस्य हुने गरि नेकपा एमाले ( समाजवादी) का लागि निवेदन दिइएको थियो। नयाँ दलको नामबाट ‘एमाले’ हटाउन आयोगले दिएको निर्देशन अनुसार शुक्रबार नेकपा (एकीकृत समाजवादी) दर्ता भएको छ।
माओवादी केन्द्रका अध्यक्ष पुष्पकमल दाहाल ‘प्रचण्ड’ले माधवकुमार नेपालको पार्टीको सनाखत टुंगिएपछि तत्कालै मन्त्रिपरिषद् विस्तार हुने गत बिहीबार नै बताएका थिए। ‘अब मन्त्रिपरिषद् विस्तार गर्न ढिला गर्न हुँदैन, तुरुन्तै टुंग्याउनुपर्छ भनेर समझदारी बनेको छ। यो दर्ता भएको पार्टीको सनाखत हुने बित्तिकै एकै दिनमा मन्त्रिपरिषद् विस्तारलाई टुंग्याउनुपर्ने कुरा भएको छ’, बिहीबार प्रचण्डले भनेका थिए।
सरकारमा माधव पक्षलाई सहभागिता गराउनकै लागि तीन दलले करिब डेढ महिना उनलाई प्रतीक्षा गरेका छन्। जति छिटो माधव नेपाल नेतृत्वको पार्टीको सनाखत हुन्छ, त्यति नै छिटो मन्त्रिपरिषद् विस्तार हुने प्रचण्डको भनाइ थियो।
प्रधानमन्त्रीमा देउवा नियुक्त भएसँगै नेपाललाई सरकारमा ल्याउनका लागि गठबन्धनले भरमग्दूर प्रयास गरेको थियो। देउवा, प्रचण्ड र नेपालबीच पटक पटक संवाद पनि भएको थियो। ती भेट र संवादको परिणाम नयाँ दल जन्मेको छ। साथै, उक्त दल सरकारमा जाने वातावरण बनेको छ।
सत्ता गठबन्धनका दलले प्राप्त गर्ने मन्त्रालयको संख्या पनि करिब टुंगिएको बताइएको छ। कांग्रेसले सात, माओवादी/नेकपा (एकीकृत समाजवादी) र जनता समाजवादीले ६/६ मन्त्रालय प्राप्त गर्ने भएका छन्। कांग्रेसका तीन मन्त्री बनिसकेका छन् भने माओवादी केन्द्रका दुई जना मन्त्रिमण्डलमा सहभागी छन्। सत्तारुढ दलको अर्को घटक जसपाको आधिकारिकता टुंगिएपनि सरकारमा गएको थिएन। नेकपा (एकीकृत समाजवादी)सँगै जसपाले पनि मन्त्रिपरिषद्को हिस्सेदारी पाउने भएको छ।
यता, आयोगको निर्णय कुर्दै सभामुख अग्निप्रसाद सापकोटाले माधव पक्षका सांसदलाई कारबाही प्रक्रिया अघि बढाएका छैनन्। उनी पक्षधर १४ सांसदलाई कारबाही गर्न एमालेले गरेको पत्रलाई उनले कार्यान्वयन गरेका छैनन्। उनीहरुलाई पदमुक्त गर्न सभामुखको कार्यकक्षमा पुगेर एमालेका सांसदले २ दिन दबाब समेत थिए।
नेकपा (एकीकृत समाजवादी)ले दलको मान्यता नपाउन्जेल सापकोटाले आलटाल गर्ने देखिएको छ। आइतबार र सोमबार सार्वजनिक विदा भएकाले कारबाही हुनसक्ने अवस्था छैन। मंगलबार एक दिन बिलम्ब गर्नासाथ अर्को दिन उक्त दलले मान्यता पाउने सम्भावना छ। सापकोटाको भित्रि चाहना आयोगको निर्णयको प्रतीक्षा गर्नको लागि भएको देखिन्छ। नेकपा (एकीकृत समाजवादी) ले दलको मान्यता प्राप्त गरेसँगै एमालेले उनीहरुलाई गरेको कारबाहीको पत्र निष्प्रभावी हुनेछ। तत्पश्चात् कारबाहीको सिफारिस गरिएका समेत मन्त्री बन्ने ढोका खुल्नेछ।
दलको प्रमाणपत्र नपाउँदै नेकपा (एकीकृत समाजवादी) निकट केहीलाई सरकारले नियुक्त गरिसकेको छ। बागमती प्रदेश प्रमुखमा नेपालनिकट नेता यादवचन्द्र शर्मा र रेल्वे कम्पनीको महाप्रबन्धकमा निरञ्जन कुमार झालाई नियुक्त गरिएको छ। राष्ट्रिय योजना आयोगका एक सदस्य पनि नेपालका तर्फबाट नियुक्त गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
