काठमाडौं- राष्ट्रपति विद्यादेवी भण्डारीले प्रदेश २ का प्रदेश प्रमुख राजेश झा (अहिराज)लाई बर्खास्त गरेकी छन्। सोमबारको मन्त्रिपरिषद्को निर्णय अनुसार झालाई बर्खास्त गरिएको हो। झा गत फागुनमा प्रदेश प्रमुखमा नियुक्त भएका थिए।
'सम्माननीय राष्ट्रपति श्रीमती विद्यादेवी भण्डारीज्यूबाट नेपाल सरकार, मन्त्रिपरिषद्को मिति २०७८/४/३२ गतेको बैठकको निर्णय एवम् सम्माननीय प्रधानमन्त्रीज्यूको सिफारिसमा नेपालको संविधानको धारा १६५ को उपधारा (१) को खण्ड (ख) बमोजिम प्रदेश २ का प्रदेश प्रमुख श्री राजेश झालाई पदमुक्त गर्नुभएको छ,' मंगलबार राष्ट्रपति कार्यालयद्वारा जारी विज्ञप्तिमा भनिएको छ।
राष्ट्रपति भण्डारीले मंगलबार नै सो प्रदेशको प्रमुखमा हरिशंकर मिश्रलाई नियुक्त गरेकी छन्। 'सम्माननीय राष्ट्रपति श्रीमती विद्यादेवी भण्डारीज्यूबाट नेपाल सरकार, मन्त्रिपरिषद्को मिति २०७८/४/३२ गतेको बैठकको निर्णय एवम् सम्माननीय प्रधानमन्त्रीज्यूको सिफारिसमा नेपालको संविधानको धारा १६३ को उपधारा (२) बमोजिम श्री हरिशंकर मिश्र, महोत्तरीलाई प्रदेश नं. २ को प्रदेश प्रमुखमा नियुक्त गर्नुभएको छ', राष्ट्रपति कार्यालयद्वारा जारी विज्ञप्तिमा भनिएको छ।
प्रदेश २ का लागि मिश्र चौथो प्रदेश प्रमुख हुन्। २०७४ माघ ३ गते सो प्रदेशमा रत्नेश्वरलाल कायस्थ नियुक्त भएका थिए। त्यस्तै, २०७६ कात्तिक १८ मा तिलक परियार र २०७७ फागुन ७ गते राजेश झा नियुक्त भएका थिए। मंगलबार मिश्र नियुक्त भएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
