काठमाडौं- टोकियो ओलम्पिक २०२० को पहिलो स्वर्ण चीनले जितेको छ। चीनकी किएन याङले महिला १० मिटर एयर राइफलमा स्वर्ण जित्दै पदकको खाता खोलेकी हुन्।
२१ वर्षकी याङले २ सय ५१.८ स्कोर जोड्दै स्वर्ण पदक जितेकी हुन्। यस स्पर्धामा रसियन ओलम्पिक कमिटिकी अनास्तासिया गलाशिना रजत पदक जितिन्।
उनले २ सय ५१.१ स्कोर जोडिन्। यता, स्विट्जरल्यान्डकी निना क्रिस्टेनले २३०.६ स्कोरसहित कास्य पदक जितिन्।
अन्तिम प्रहारमा ८.९ को खराब प्रदर्शन गरेपछि अनास्तासिया रजतमा सिमित भइन्। यसअघि अनास्तासिया नै अग्रतामा थिइन्।
याङले अन्तिममा जम्मा ९.८ को स्कोर जोडेकी थिइन्।
सोही स्पर्धामा नेपाली सुटिङ खेलाडी कल्पना परियारले राष्ट्रिय कीर्तिमान बनाउन सफल भएकी छिन्। कल्पनाले छनोट चरणमा ६१६.८ स्कोर बनाउँदै राष्ट्रिय कीर्तिमान बनाएकी हुन्।
यसअघि १३औं दक्षिण एसियाली खेलकुदमा कल्पनाले ६१४.५ स्कोर बनाउँदै राष्ट्रिय कीर्तिमान कायम गरेकी थिइन्।
कल्पनाले राष्ट्रिय कीर्तिमान बनाए पनि ओलम्पिकको अन्तिम चरणमा भने छनोट हुन सकिनन्। कुल ५० खेलाडी मध्ये ४६औं स्थानमा रहेकी उनी पहिलो चरणबाटै बाहिरिइन्।
कल्पनाले पहिलो सिरिजमा १०२.२ स्कोर गरेकी थिइन्। यस्तै, दोस्रोमा १०५.४ तथा तेस्रोमा १०१.१, चौथोमा १०४.१ र पाँचौमा १०३.४ स्कोर गरिन्।
अन्तिम सिरिजमा उनले १००.७ स्कोर गरिन्। उनले समग्रमा ६१६.८ स्कोर गरिन्।
रसियाकी अनास्तासिया ६२८.५ स्कोर बनाउँदै अन्तिम ८ मा पुगेकी थिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
