काठमाडौं- टोकियो ओलम्पिक २०२० अन्तर्गत जुडोतर्फ पहिलो चरणमा नेपालकी सोनिया भट्टले रसियाकी डोल्गोभा इरिनासँग प्रतिस्पर्धा भएकी छिन्।
बिहीबार सार्वजनिक भएकाे खेल तालिका अनुसार ४८ केजी तौल समूहमा सोनियाको भेट इरिनासँग हुने पक्का भएको हो। यी दुईबीच २४ जुलाई अर्थात शनिबार प्रतिस्पर्धा हुनेछ।
इरिना विश्व वरीयतामा नवौं स्थानमा छिन्। उनले मे महिनामा भएको कजान ग्रान्डस्लाममा रजत पदक जितेकी थिइन्।
सोनिया भने विश्व वरीयतामा १ सय २७औं स्थानमा छिन्। उनले नेपालमा डेढ वर्ष अगाडि आयोजना भएको १३औं दक्षिण एसियाली खेलकुद (साग)मा कास्य पदक जितेकी थिइन्। जुनियर विश्व च्याम्पियनसिपमा पनि उनले सहभागिता जनाइसकेकी छिन्।
सन् २०१९ मा मोरक्कोमा भएको विश्व जुडो च्याम्पियनसिपमा उनले ४८ केजीमुनि तौल समूहमा मोजाम्बिककी खेलाडीलाई पराजित गरेर इतिहास बनाएकी थिइन्।
उनी वाइल्डकार्डमार्फत् ओलम्पिकमा छनोट भएकी हुन्।
डोपिङ प्रकरणका कारण प्रतिबन्धमा परेकाेले ओलम्पिकमा रुसको राष्ट्रिय राष्ट्रिय गान बजाइने छैन। यस्तै, उक्त देशकाे खेलाडीले ओलम्पिक कमिटीको झन्डा मुनि प्रतिस्पर्धा गर्नेछन्।
शनिबार नै नेपालकी सुटिङ खेलाडी कल्पना परियारले महिला १० मिटर एयर राइफलको छनोट चरणमा प्रतिस्पर्धा गर्नेछिन्। यो खेल स्थानीय समयअनुसार बिहान ८:३० बजे सुरू हुनेछ। कल्पना सहभागी प्रतिस्पर्धाको टुंगो पनि शनिबार नै लाग्नेछ।
यता, नेपालका पौडी खेलाडीद्वय गौरिका सिंहले महिला १०० सय फ्रिस्टाइल र एलेक्जान्डर ग्याडिगाड शाहले पुरुष १०० मिटर फ्रिस्टाइलमा प्रतिस्पर्धा गर्नेछन्।
एलेक्सले २७ जुलाईमा प्रतिस्पर्धा गर्नेछन्। एलेक्सले हिट चरण पारे २८ जुलाईमा अर्को चरणमा भिड्नेछ। उनी सहभागी इभेन्टको पदकको टुंगो २९ जुलाईमा लाग्नेछन्।
यता, गौरिकाले २८ जुलाईमा प्रतिस्पर्धा गर्नेछन्। उनी सहभागी एभेन्टमा २९ र ३० जुलाई अर्को चरणमा प्रतिस्पर्धा हुनेछ।
यसैगरी, एथलेटिक्स खेलाडी सरस्वती चौधरीले महिला सय मिटर दौडमा ३० जुलाईमा प्रतिस्पर्धा गर्नेछिन्। महिला सय मिटर दौडको पदकको टुंगो ३१ जुलाईमा लाग्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
