नेताले पूरा गर्नै नसक्ने वाचा गर्नु, झुटो आश्वासन दिनु अधिकांश देशका लागि सामान्य जस्तै छ। नेपालमा पनि चुनावका लागि बनाइएका घोषणा-पत्र र गरेका वाचा अधिकांश पूरा हुँदैनन्। हाम्रो जस्तै समस्या कोरियामा पनि रहेछ। यही विषयमा बनेको फिल्म त्यहाँ निकै चर्चित बन्यो।
चुनावी माहोलका बेला नेताले झुट बोल्न नसके के हुन्छ? यही विषयलाई रमाइलो ढंगले प्रस्तुत गरिएको कोरियन फिल्म हो, अनेस्ट क्यान्डिडेट।
विश्व कोभिड–१९ को पहिलो लहरसँग जुधिरहेका बेला सन् २०२० मा यो फिल्म डिजिटल प्ल्याटफर्ममा प्रदर्शनमा आएको थियो। वास्तवमा यो फिल्म सन् २०१४ मा बनेको ब्राजेलियन फिल्म ‘ओ क्यान्डिडात्तो अनेस्त्तो’ लाई कोरियामा रिमेक गरिएको हो। यस्तै कथावस्तु रहेको हलिउड फिल्म ‘लायर लायर’ पनि प्रर्दशनमा आएको छ।
फिल्मको मुख्य भुमिकामा एक महिला नेतृ छिन्, जो साङ सोक। झुटैझुटको साहारामा उनले तीन पटक चुनाव जितिसकेकी हुन्छिन्। अब चौँथो पटक चुनाव जित्ने दौडमा छिन्।
फिल्मको मुख्य भुमिकामा एक महिला नेतृ छिन्, जो साङ सोक। झुटैझुटको सहारामा उनले तीन पटक चुनाव जितिसकेकी हुन्छिन्। अब चौँथो पटक चुनाव जित्ने दौडमा छिन्। यसै सिलसिलामा प्रचारका लागि उनले एउटा भिडियो बनाउन लगाउँछिन्। जहाँ उनकी हजुरआमा निकै ठूलो नेतृ भएको, उनैको प्रेरणाले आफू राजनीतिमा आएको भनिएको हुन्छ। हजुरआमाको मृत्यु भइसकेकाले उनको सपना पूरा गर्न चुनाव जित्ने भन्दै मतदाता प्रभावित पार्न खोजिएको हुन्छ।
तर, वास्तविकता फरक हुन्छ। हजुरआमा ज्युँदै हुन्छिन्। उनलाई कसैले नदेख्ने ठाउँमा लुकाएर राखिएको हुन्छ।
एक पटक हजुरआमाले बिरामी भएको झुटो खबर पठाएर आधा रातमा जो साङ सोक र उनको सचिव पार्क हे च्योललाई लुकेको ठाउँमा बोलाउँछिन्। फर्कँदा ठूलो पानी पर्छ। सचिव पार्क हे च्योल नेतृ जो साङ सोकलाई ओत लाग्ने ठाउँमा बसाएर आफू छाता लिन जान्छन्। यता उनले ढुंगाको थुप्रोमा जुनकिरी उडिरहेको देख्छिन्। मनको कुरा पुरा हुने विश्वाससहित उनले ‘देशको नम्बर वान नेता बन्न पाउँ’ भनेर प्रार्थना गर्छिन्।
ठीक त्यहि समयमा नातीनीको झुट देखेर वाक्क बनिसकेकी हजुरआमाले पनि भगवानसँग प्रार्थना गर्छिन्, ‘मेरो नातिनीको झुट बोल्ने बानी हटाइदेऊ, भगवान।’ यति घटना भएपछि त्यहाँ ठूलो चट्याङ पर्छ। नेतृ जो साङ सोक बेहोस हुन्छिन्।
ब्युँझदा उनले झुट बोल्नसक्ने कला गुमाएकी हुन्छिन्। सधैं चिप्लो घसेर बोल्ने सासूबारे नराम्रो कुरा गर्न थाल्छिन्। श्रीमानलाई पनि ‘बेरोजगार’ भन्दै अपमानित गर्छिन्।
टेलिभिजन कार्यक्रममा गएर पत्रकारले सोधेका हरेक कुराको सही जवाफ दिन्छिन्, जसले तहल्का मच्चाउँछ। पत्रकारहरु नेतृ पागल भइन् कि क्या हो भनेर कानेखुशी गर्न थाल्छन्।
उनले लेखेको पुस्तक पनि त्यही समयमा निकै बिक्री हुन्छ। हस्ताक्षर कार्यक्रममा जाँदा आफ्नै मान्छे लगाएर किताब किन्न लगाएको, किताब पनि आफूले नलेखेर घोस्ट राइटरलाई लेख्न लगाएको बताइदिन्छिन्। यी सबै कुराले चुनाव हुन १२ दिन बाँकी रहँदा उनको माहोल पूर्ण रुपमा भत्किन्छ। विपक्षी दलले मौकाको फाइदा उठाउन थाल्छन्।
उनी झुट बोल्नका लागि उपचार गराउन चिकित्सककहाँ पनि जान्छिन्। विभिन्न थेरापी चल्छ। अनुहारभरि सियोले घोप्दा पनि उनी एकलाई दुई भन्न सक्दिनन्, एक नै भन्छिन्।
यसरी झुटैझुटको सहारामा बनेकी नेतृले सत्य बोल्दा चुनाव जित्लिन् या हार्लिन्? फिल्मको ‘क्लाइमेक्स’ नै यही हो। विभिन्न डिजिटल माध्यममा ‘सबटाइटल’ सहित यो फिल्म हेर्न सकिन्छ।
फिल्म हेरिरहँदा जो साङ सोक अर्थात नायिका रा मि रान्कै लागि कथा बनेजस्तो लाग्छ। उनको व्यक्तित्व र अभिनयले फिल्मलाई यथार्थपरक बनाएको छ।
फिल्म उत्कृष्ट बनाउन ठूलो मेहनत सचिव पार्क हे च्योल अर्थात किम मु योलको पनि छ। उनी इमान्दार सचिव हुन्। उनको अभिनय दमदार छ। यता हजुरआमा किम ओक हि अर्थात ना मोन हिको अभिनय पनि उस्तै अब्बल छ। उनी उमेरमा बूढो भए पनि चरित्रमा युवा छिन्। झुटको खेती गर्ने नातिनीलाई माझी औंलो देखाउन समेत पछि नपर्ने हजुरआमाको असन्तुष्टिले पूरै फिल्मलाई मार्गनिर्देश गरेको छ।
फिल्म वास्तविकताबाट भने अलि टाढा पुगेको छ। तर, कल्पनामै भए पनि दर्शकलाई आनन्द आउँछ। नेताहरु साँच्चै झुट बोल्न नसक्ने भए देश कस्तो हुन्थ्यो होला भन्ने सोचाइले रमाइलो गराउँछ। अझै राजनीतिक अस्थिरताकै कारण समस्यामा परेको देशका दर्शक त प्रभावित हुने भइहाले।
इन्टरनेट मुभी डेटाबेस (आइएमडीबी) रेटिङ ६.३ पाएको फिल्म समग्रमा उत्कृष्ट छ। राजनीतिक कथामा बनेको र हाँस्य रस मिसिएको फिल्म हेर्न चाहनेका लागि त फिल्मले भरपुर मनोरञ्जन दिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
