काठमाडौं– नेपाली सेनाले आफ्नो कमाण्ड संरचनामा आमूल परिवर्तन गर्ने बहससहित अघि बढाएको तीन जोर एक कमाण्ड संरचना शुक्रबारदेखि औपचारिक रुपमा कार्यान्वयनमा आएको छ।
सैनिक मुख्यालय, जंगी अड्डामा शुक्रबार आयोजित एक कार्यक्रममा प्रधानसेनापति पूर्णचन्द्र थापाले चारवटै कमाण्ड हेडक्वार्टरका कमाण्डरहरुलाई कमाण्ड झण्डा हस्तान्तरण गरेर यो संरचना औपचारिक रुपमा कार्यान्वयन भएको घोषणा गरे।
२०७२ सालमा संविधान जारी भएपछि सेना सातवटा प्रदेश जस्तै संघीयताको अभ्यासमा गएको थियो। प्रदेश तहमा सेनाका पृतना हेडक्वार्टरहरु सञ्चालनमा थिए। संघीय संरचनामा भइरहेको सैन्य अभ्यास 'उकुसमुकुसपूर्ण' भएपछि सेनाले त्यसको साटो कमाण्ड हेडक्वार्टरको संरचनामा जाने बहस अघि बढाएको थियो। त्यहीअनुसार गत फागुन २० गते सरकारले सेनाको नयाँ कमाण्ड संरचनालाई स्वीकृत गरेको थियो।
सेनाले यसलाई आफ्नो सांगठनिक पुनर्संरचना भनेको छ।
सेनामा यसअघि जंगी अड्डाभन्दा मुनि सातवटा प्रदेशमा सात र उपत्यकामा एकसमेत गरी आठवटा पृतना हेडक्वार्टर थिए। अब कमाण्ड हेडक्वार्टर कार्यान्वयन भएसँगै पृतनाका ती सबै संरचना निष्क्रिय बनेका छन्। जंगी अड्डाले अब सबै ८ वटा पृतना हेडक्वार्टरमा ४ वटा कमाण्ड हेडक्वार्टरमा स्तरोन्नति भएको जनाएको छ।
सेनामा अब पूर्वी कमाण्ड, मध्य कमाण्ड, पश्चिम कमाण्ड र भ्याली कमाण्ड गरी चारवटा कमाण्ड संरचना रहनेछन्। पूर्वी, मध्य र पश्चिम कमाण्डलाई नदी बेसीनका आधारमा स्थापना गरिएको सेनाले जनाएको छ। भ्याली कमाण्ड भने मुलुकको संघीय राजधानीलाई ध्यानमा राखेर खडा गरिएको छ।
चारवटै कमाण्ड हेडक्वार्टरहरु शुक्रबारदेखि पूर्णरुपमा सञ्चालन आएको सेनाले जनाएको छ। सैनिक जनसम्पर्क तथा सूचना निर्देशनालयका अनुसार अधिकृत र सकल दर्जासँग सम्बन्धित दर्बन्दीहरुको हकमा भने क्रमिक रुपमा आगामी ६ वर्षभित्र लक्ष्य पूरा गरिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
