काठमाडाैं- निर्वाचन आयोगले मतदाता नामावली सङ्कलन तथा अद्यावधिक गर्ने कार्य पुन: सुरु गर्ने भएको छ।
सर्वोच्च अदालतको फैसलासँगै केपी शर्मा ओली नेतृत्वको निवर्तमान सरकारले घोषणा गरेको प्रतिनिधि सभा निर्वाचन नहुने भएपछि मतदाता नामावली सङ्कलन तथा अद्यावधिक गर्ने कार्य सुरु गर्न लागिएको हो। आयोगले शुक्रबार विज्ञप्ति जारी गरी साउन ३ गतेबाट निर्वाचन कार्यालयहरूबाट मतदाता नामावली सङ्कलन तथा अद्यावधिक कार्य सुरु गर्ने निर्णय भएको जानकारी दिएको छ।
'मिति २०७८/०२/०८ गते सम्माननीय राष्ट्रपतिज्यूबाट प्रतिनिधि सभा विघटन गरी मिति २०७८/०७/२६ गते पहिलो चरण तथा मिति २०७८/०८/०३ गते दोस्रो चरणमा प्रतिनिधि सभा सदस्य निर्वाचन गर्ने गरी निर्वाचनको मिति तोक्नु भएपश्चात् निर्वाचन कार्यालयहरूबाट भइरहेको मतदाता नामावली सङ्कलन तथा अद्यावधिकसम्बन्धी कार्य आयोगको मिति २०७८/०२/०९ को निर्णयअनुसार स्थगन भएको थियो,' आयोगका प्रवक्ता राजकुमार श्रेष्ठद्वारा जारी विज्ञप्तिमा उल्लेख छ, 'सम्मानित सर्वोच्च अदालतको मिति २०७८/०३/२८ गतेको आदेशबमोजिम प्रतिनिधि सभा पुन:स्थापना भएको कारण पूर्वघोषित मितिमा निर्वाचन नहुने भएकोले मिति २०७८/०४/०३ गतेदेखि निर्वाचन कार्यालयहरूबाट मतदाता नामावली सङ्कलन तथा अद्यावधिक कार्यलाई सूचारू गर्ने गरी आयोगबाट मिति २०७८/०४/०१ मा निर्णय भएको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
