काठमाडौं– सरकारले वीर अस्पतालमा बेड (शय्या)को संख्या थप गर्ने निर्णय गरेको छ। ४६० शय्या रहेको वीरमा सरकारले ५०६ शय्या थप गर्ने निर्णय गरेको हो। यो निर्णयसँगै अब वीर अस्पताल ९६६ शय्याको हुने भएको छ।
शय्या थप गरेसँगै सरकारले वीर अस्पतालमा ८३१ जनाको पुल दरबन्दी समेत थप गरेको छ। वीर अस्पताल चिकित्सा विज्ञान राष्ट्रिय प्रतिष्ठान अन्तर्गत रहेका कारण तत्काललाई पुल दरबन्दी थप गरिएको हो। प्रतिष्ठानको आफ्नै ऐन छ।
स्वास्थ्य मन्त्रालय स्रोतका अनुसार वीर अस्पतालमा १२औं तहका कर्मचारी कार्यकारी निर्देशक रहने गरी पुल दरबन्दी थपिएको हो। असार २१ गते बसेको बैठकले दरबन्दी र शय्या थप गर्ने निर्णय गरेको हो।
मन्त्रिपरिषद्को निर्णयानुसार अब वीर अस्पतालमा पुल दरबन्दीमा थपिएका ८३१ जनासहित १ हजार ५१८ जनाको दरबन्दी भएको छ।
यसका साथै वीरमा पहिला १९ वटा विभाग थिए भने त्यसलाई बढाएर २९ पुर्याइएको छ। यस्तै ७ वटा इकाइलाई बढाएर ९ पुर्याइएको छ।
कुन पदमा कति थपिए?
वीरमा १२औं तहका कार्यकारी निर्देशकसहित प्रशासनतर्फको सहसचिव १ जनाको पनि दरबन्दी राखिएको छ।
यस्तै, विभिन्न समूहमा ११ औं तहका १७ जना, ९ र १० औं तहका ११६ जना, ८औं तहका मेडिकल अफिसर ४९ जना, डेन्टल सर्जन ४ जना, नर्सिङ अधिकृत ७ र ८औं तहका १९ जना, ७ र ८ औं तहका प्राविधिक अधिकृत ३३ जना, राजपत्रांकित तृतीय श्रेणीअन्तर्गत प्रशासन, लेखा तथा विविध समूहका २ जना, राजपत्र अनंकित प्रथम श्रेणी (नायव सुब्बा) प्रशासन तथा लेखा समूह गरी ११ जना, स्टाफ नर्स ५,६ र ७औं तहमा ६८५, स्वास्थ्य प्राविधिक ५३ जना र १५५ जना श्रेणीविहीन कर्माचारीको दरबन्दी थप भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784709543.png)
-1764146706.png)
