गतवर्ष बाह्रबिसे नगरपालिकाकाे घुम्थाङमा गएकाे पहिराे
काठमाडौं– बाह्रबिसे नगरपालिकाले बाढी र पहिराको उच्च जोखिममा रहेको क्षेत्रमा भौगर्भिक अध्ययनलाई तीव्रता दिएको छ। नगरपालिकाले आइतबार वडा नं ७ को आरूचे, हुण्डुङ, ढकाल गाउँबाट भौगर्भिक अध्ययन सुरु गरेको हो।
जोखिमपूर्ण बस्तीको भौगर्भिक अध्ययनका लागि भू–गर्भविद्सहितको विज्ञ टोलीको नेतृत्व उपप्रमुख सुशीला पाख्रिनले गरेकी छन्। टोलीले नागपुजे, भिरखर्क पहिराको सुरुवात बिन्दु घुम्थाङ टुँडिखेलको फेदी हुँदै घुम्थाङ शेर्पा बस्तीको सिरानसम्मको अध्ययन गरेको उपाध्यक्ष पाख्रिनले जानकारी दिइन्।
अर्को टोलीले भिरखर्क, भिर थाप्लोलगायत बस्तीस्तरीय अध्ययन गरेको छ। गाउँ पुगेको विज्ञ टोलीलाई इलाका प्रहरी, वडाका प्राविधिक, प्रतिबद्ध संस्थाका इञ्जिनियर प्रतिनिधिले सहयोग गरिरहेका छन्।
विज्ञ टोलीले नगरपालिकाको नौ वटै वडामा अध्ययन गर्नेछ। अध्ययन प्रतिवेदनको फाइनल रिपोर्ट आएपछि नगरपालिकाले विस्तृत योजना बनाएर काम बढाउने उपप्रमुख पाख्रिनले बताइन्।
नगरपालिकाले यसअघि वडा नं– ५ खोराङ बस्तीका बाढीपहिराका कारण उच्च जोखिममा रहेका घरपरिवारलाई सुरक्षित स्थानमा सारिसकेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
